រាជធានីភ្នំពេញ ៖ តាមទីផ្សារក្នុងរាជធានីភ្នំពេញ នៅព្រឹកថ្ងៃទី៣១ មករា គេសង្កេតឃើញមានដាក់តាំងលក់របស់របរដែលពាក់ព័ន្ធនឹងពិធីបុណ្យ ចូលឆ្នាំប្រពៃណីចិន-វៀតណាម មានតាំងពីក្រដាសសែន ផ្កាស្បៃរឿងពណ៌លឿង ផ្កាអង្គារសីល បន្លែ ផ្លែឈើ សាច់ជ្រូក សាច់មាន់ ជាដើម ។
បុណ្យចូលឆ្នាំប្រពៃណីចិន-វៀតណាមត្រូវនឹង ថ្ងៃទី២ មករា ខាងមុខនេះ នៅផ្សារដើមគ ដែលជាទីផ្សារចែកចាយដ៏ធំកណ្តាលក្រុង បានសំរុកនាំចូលស្តុកបន្លែផ្លែឈើគ្រប់ប្រភេទ សំរាប់បំពេញតំរូវការរបស់អតិថិជន ។ អ្នកយកព័ត៌មានយើងបានជួបសំភាសន៍ជាមួយអាជីវករលក់បន្លែ ម្នាក់ឈ្មោះលាង ហេង ភេទស្រី អាយុ៤៤ឆ្នាំ បានឱ្យដឹងថា បន្លែដែលគាត់លក់បច្ចុប្បន្ននាំមកពីប្រទេសវៀតណាមមានស្ពៃបូកគោ ស្ពៃក្តោប ការ៉ុត ប៉េងប៉ោះ ម្ទេសហាវ៉ៃ ខ្ទឹមបារាំង សណ្តែកបារាំង ដំឡូងបារាំង ផ្លែស៊ូ ។
ចំណែកទំនិញដែលពេញនិយមសំរាប់ប្រជាពលរដ្ឋមាន សែស្រឡាយកាត់ចិនដែរនោះដូចជា ក្រដាសសែន ផ្កាអង្គារសីល ផ្កាស្បៃរឿងពណ៌លឿង ផ្លែឈើពណ៌ក្រហម ផ្លែប៉ោម ក្រូចពោធិ៍សាត់ចិន ទំពាំងបាយជូរ ផ្លែឪឡឹកសាច់ក្រហម ផ្លែឪឡឹកសាច់លឿង ផ្លែល្មុត ជាដើម ។
ចំពោះតម្លៃទំនិញក្នុងផ្សារដើមគវិញឡើងថ្លៃខុស ពីថ្ងៃធម្មតាបន្ដិច គឺសាច់ជ្រូក១គីឡូក្រាម ១៥.០០០រៀល សាច់មាន់ធ្វើហើយ១គីឡូក្រាម២០.០០០រៀល មាន់រស់១គីឡូក្រាម២០.០០០រៀល ផ្លែឪឡឹកធំ១ថ្លៃ៣០.០០០រៀល ឪឡឹកពណ៌លឿង១ថ្លៃ២០.០០០រៀល ក្រូចពោធិ៍សាត់ចិន១គីឡូក្រាម៨.០០០រៀល ប៉ោម១គីឡូក្រាម១២.០០០រៀល (លេខ១) ស្ពៃក្ដោប១គីឡូក្រាម២.៥០០រៀល ការ៉ុត១គីឡូក្រាម៣.០០០រៀល ស្ពៃបូកគោ១គីឡូក្រាម៤.០០០រៀល ។
គួរកត់សំគាល់ផងដែរថា អាជីវករបានអះអាងថា ការរៀបរាប់នេះគឺតំលៃសំរាប់លក់ថ្ងៃនេះ ហើយអាចឡើងថ្លៃនៅថ្ងៃចូលឆ្នាំប្រពៃណីចិន-វៀតណាមខាងមុខនេះ ។ អ្នកលក់និយាយថា មិនអាចប៉ាន់ប្រមាណបានទេ ព្រោះជារដូវបុណ្យដែលក្នុងមួយឆ្នាំមានតែម្ដង ចៀសមិនរួចត្រូវឡើងថ្លៃអ៊ីចឹងហើយ ៕
http://kohsantepheapdaily.com.kh/art...31-022117.html