រាជធានីភ្នំពេញ ៖ រថយន្តមួយគ្រឿងម៉ាកកូរ៉ូឡា ស៊េរី៩៤ ពណ៌ក្រហម ពាក់ស្លាកលេខភ្នំពេញ 2B 8028 បានបើកបោះពួយបុកក្បាលរបាំងថ្មខណ្ឌចែកផ្លូវ បណ្តាលឱ្យក្រឡាប់ជាច្រើនត្រឡប់ឡើងលើចិញ្ចើមផ្លូវ ។ ហេតុការណ៍ គ្រោះថ្នាក់នេះបានកើតឡើងកាលពីវេលាម៉ោង១០ និង៤៥នាទីយប់ថ្ងៃទី៣០ មករា នៅតាមមហាវិថីសហព័ន្ធរុស្ស៊ី មុខក្រុមហ៊ុនដួងឈីវ ខាងលិចស្តុបអំបាសាឌ័រ ក្នុងសង្កាត់ទឹកល្អក់ទី១ ខណ្ឌទួលគោកទោះជាយ៉ាងណាពុំបណ្តាលឱ្យមានមនុស្សរងគ្រោះថ្នាក់ ដល់អាយុជីវិតឡើយ គឺមានតែអ្នកបើកបរដែលគេពុំស្គាល់ឈ្មោះម្នាក់រងរបួសធ្ងន់ ហើយត្រូវបានបញ្ជូនទៅកាន់មន្ទីរពេទ្យ ។
តាមសាក្សីនៅកន្លែងកើតហេតុបានឱ្យដឹងថា គេឃើញរថយន្តកូរ៉ូឡា ពណ៌ក្រហមមួយគ្រឿងនេះដែលមានមនុស្សជិះតែម្នាក់ឯង ធ្វើដំណើរតាមមហាវិថីសហព័ន្ធរុស្ស៊ីក្នុងទិសដៅពីលិចទៅទិសខាងកើត ។ នៅពេលធ្វើដំណើរហួសខ្លោងទ្វារវិទ្យាស្ថាន បច្ចេកវិទ្យាកម្ពុជាបានបន្តិច មិនដឹងមូលហេតុអ្វីទេ ក៏ជ្រុលចង្កូតទៅបុកក្បាលរបាំងថ្មខណ្ឌចែកផ្លូវពេញទំហឹងបណ្តាលឱ្យ ក្រឡាប់តែម្តង ចំណែកក្បាលរបាំងថ្មក៏បានបាក់អស់មួយកំណាត់ដែរ ។
តាមព័ត៌មានឱ្យដឹងថា នៅពេលបុកក្បាលរបាំថ្មនោះរថយន្តបានក្រឡាប់ទៅខាងស្តាំដៃ ជាច្រើនត្រឡប់ឡើងទៅលើចិញ្ចើមផ្លូវ ហើយបុរសម្នាក់ដែលជាអ្នកបើកបរបានរងរបួសធ្ងន់ និងត្រូវរថយន្តបញ្ជូនទៅកាន់មន្ទីរព្យាបាលឯកជនភ្លាមៗ ។ នៅយប់នោះប៉ូលិសមូលដ្ឋានបានចុះទៅកន្លែងកើតហេតុ ហើយទាក់ទងរថយន្តស្ទូចរបស់ការិយាល័យចរាចរណ៍ជើងគោកស្ទូចយកទៅកាន់ សាលារាជធានីភ្នំពេញ ដើម្បីដោះស្រាយសងការខូចខាត ។ គួរបញ្ជាក់ថា ក្បាលរបាំងថ្ម នៅចំណុចខាងលើ តែងកើតមានគ្រោះថ្នាក់ចរាចរណ៍ជាបន្តបន្ទាប់ ហើយនេះជាលើកទី៣បានបើកបុកក្បាលរបាំងថ្ម ហើយក្រឡាប់ ៕
http://kohsantepheapdaily.com.kh/art...31-025016.html