ខេត្តកំពង់ស្ពឺ ៖ សំរែកដែលលាន់ឮគ្រលួចក្នុងភាពរន្ធត់ញាប់ញ័រពីសំណាក់ ស្ត្រីម្នាក់ដែលស្រែកឱ្យអ្នកភូមិជួយ បានបង្កឱ្យមានការភ្ញាក់ផ្អើល និងឆោឡោទាំងព្រឹកព្រលឹមថ្ងៃទី២៧ មករា ។ ហេតុការណ៍គួរឱ្យតក់ស្លុតទាំងព្រឹកនេះ បង្កឡើងដោយបុរសឈាមក្តៅឆ្កួតលេលាម្នាក់ដែលបានខ្ទប់ទ្វារ ផ្ទះជាប់ហើយធ្វើសកម្មភាពវាយប្រពន្ធដូចកំរោលចូល ។ ទោះបីជាដឹងថា ខ្លួនជាស្ត្រីទន់ខ្សោយ និងកំពុងប្រឈមនឹងសេចក្តីស្លាប់ដោយសារតែការវាយ របស់ប្តីក៏ដោយ ក៏នៅតែគិតដល់កូនតូចៗ ៤នាក់ដែលជាប់នៅក្នុងផ្ទះដែរ ហើយក៏អាចប្រឈមនឹងការវាយសម្លាប់ពីសំណាក់បុរសជាឪពុក ទើបស្ត្រីជាប្រពន្ធបានស្រែកឱ្យបងប្អូនក្បែរផ្ទះជួយជំលៀស កូនតូចៗចំនួន៤នាក់ចេញពីផ្ទះ ចំណែកខ្លួនឯងត្រូវប្តីវាយរហូតដល់ស្លាប់ដោយពុំមានអ្នកភូមិ ណាម្នាក់ហ៊ានចូលជួយសង្គ្រោះឡើយ ។
មន្ត្រីប៉ូលិសស្រុកភ្នំស្រួចឱ្យដឹងថា ហេតុការណ៍នេះបានកើតឡើងនាវេលាម៉ោង៥ព្រឹក នៅក្នុងភូមិច្រេស ឃុំអូរ ស្រុកភ្នំស្រួច ។ ដោយសារមានការភ្ញាក់ផ្អើលជ្រួលច្របល់ពេញភូមិ សមត្ថកិច្ចប៉ូលិសស្រុក-ខេត្ត និងកងរាជអាវុធហត្ថបានចុះទៅធ្វើអន្តរាគមន៍បន្ទាន់ ឃើញស្ថានភាពវាយគ្នាក្តុងក្តាំងលើផ្ទះដោយបិទទ្វារជិត ។ ពេលនោះសមត្ថកិច្ចបានហៅឱ្យបើកទ្វារចុះមកក្រោម ប៉ុន្តែបុរសជាប្តីមិនព្រម ហើយដោយនៅតែបង្កភាពគ្រោះថ្នាក់ដល់សមត្ថកិច្ច ទើបមានការសំរេចចិត្តនាំគ្នាដាក់ជណ្តើរគាស់ជញ្ជាំងផ្ទះចូល ទៅចាប់បុរសនោះ ដែលមានដំបងដើមខ្លុងមួយកំណាត់ប្រវែងប្រហែល៨តឹក គ្រវីគ្រវាត់សំដៅសមត្ថកិច្ច តែទីបំផុត មន្ត្រីសមត្ថកិច្ចច្រើននាក់បានចាប់វាយខ្នោះបុរសនោះទាំងជើង ទាំងដៃជាប់ក្រញង់ ។ ឯប្រពន្ធបានដេកស្តូកស្តឹងស្លាប់ក្នុងថ្លុកឈាមបាត់ទៅហើយ ។
មន្ត្រីប៉ូលិសព្រហ្មទណ្ឌផ្នែកបច្ចេកទេស រួមទាំងកងរាជអាវុធហត្ថដែលបានធ្វើការត្រួតពិនិត្យនៅលើផ្ទះ កើតហេតុនោះឱ្យដឹងថា ជនល្មើសជាប្តីសំលាប់ប្រពន្ធឈ្មោះអ៊ុក ឃីម ហៅផុន ហ៊ីម អាយុ៣៥ឆ្នាំ ឯប្រពន្ធដែលស្លាប់ឈ្មោះស៊ឹម ស៊ីម អាយុ៣៤ឆ្នាំ មានកូនតូចៗចំនួន៤នាក់ ដែលត្រូវបានបងប្អូនអ្នកភូមិច្រេសជំលៀសរួចផុតពីសេចក្តីស្លាប់ ។ អ្នកភូមិបាននិយាយថា ប្តីប្រពន្ធនេះមានរបរធ្វើស្រែ ជួនកាលពេលទំនេរទៅកាប់ឈើកាប់អុសលក់ ។ បុរសជាប្តីនេះមានជំងឺម្តងៗធ្ងន់ធ្ងរ ដោយសារគ្រុនចាញ់ និងហាក់ដូចជាកំរោលចូល ដែលបង្កឱ្យកាចមិនដឹងខុសត្រូវយូរៗម្តង ពុំអាចឃាត់បាន ។ អ្នកភូមិនិយាយទៀតថា ពេលប្តីឈឺប្រពន្ធបានជូនទៅព្យាបាលនៅមន្ទីរពេទ្យអស់ជាច្រើនខែ តែពុំជា និងបានលក់គោ ព្រមទាំងទ្រព្យសម្បត្តិចង់អស់ពីផ្ទះទៅហើយ ។ ប្តីកំណាចកំរោលចូលរូបនេះបានវាយសម្លាប់ប្រពន្ធទាំងវ័យក្មេង ព្រមទាំងបន្សល់ទុកកូនតូចៗចំនួន៤នាក់ ដែលកូនច្បងអាយុ១២ឆ្នាំ និងកូនទី៤ អាយុត្រឹមតែ៩ខែប៉ុណ្ណោះ ។ ជារឿងអាណោចអាធ័មបំផុតដែលម្តាយស្លាប់ ឪពុកត្រូវជាប់ពន្ធនាគារ តើពួកក្មេងៗដែលជាកូនត្រូវរស់នៅបែបណា ?
http://kohsantepheapdaily.com.kh/art...127-19133.html