ព្រះវិហារ៖ នេះ គឺជាស្លាកអក្សររបស់ទាហានថៃ ដែលបានលើកដាក់នៅតំបន់ព្រំដែនសម្បុកឃ្មុំ នៅជិតប្រាសាទព្រះវិហារ កាលពីថ្ងៃពុធ ទី២៦ មករា នៅពេលពួកទាហានឈុតខ្មៅ និងឈុតប៉ារ៉ាសៀម បានលើកគ្នាត្រឡប់ចូលមកដណ្តើមកាន់កាប់តំបន់សម្បុកឃ្មុំវិញ។ ស្លាកអក្សរនេះ ត្រូវបានសរសេរថា
តំបន់នេះជាតំបន់អះអាងសិទ្ធិ(៤,៦គីឡូម៉ែត្រការ៉េ) នឹងដឹងច្បាស់នៅពេលគណៈកម្មាធិការព្រំដែនរួមថៃ-កម្ពុជា (JBC) ដំណើរការវាស់វែងរៀបរយ។
ស្លាកអក្សរនេះ ត្រូវបានលើកឡើង ក្រោយពីភាគីថៃបានទទូចឲ្យកម្ពុជាដកចេញនូវផ្ទាំងសិលាចារឹកមួយ ដែលមានសរសេរថា
ទីនេះ! ជាកន្លែងកងទ័ពសៀមចូលឈ្លានពាននៅថ្ងៃទិ១៥ ខែកក្កដា ឆ្នាំ២០០៨ ហើយដកទៅវិញនៅម៉ោង ១០:៣០នាទីព្រឹកថ្ងៃទី០១ ខែធ្នូ ឆ្នាំ២០១០។
ទាហានកម្ពុជា បានដកចេញនូវផ្ទាំងថ្មចារឹកនេះ ហើយដាក់ជំនួសនូវផ្ទាំងសិលាចារឹកថ្មី ដែលមានសរសេរថា
ទីនេះ! ជាទឹកដីកម្ពុជា កាលពីថ្ងៃអង្គារ ទី២៥ មករា។
ទោះជាយ៉ាងណា ផ្ទាំងសិលាចារឹកដ៏ចម្រូងចម្រាស់ចុងក្រោយនេះ ត្រូវបានដកចេញ និងវាយកម្ទេចចោលហើយ បន្ទាប់ពីមេបញ្ជាការកងទ័ពកម្ពុជា លោកឧត្តមសេនីយ៍ ជា តារា និងមេបញ្ជាការកងទ័ពថៃ លោក ថាវ៉ាត់ឆៃ សាមុទសាខន បានជួបចរចាគ្នាយ៉ាងតឹងតែង ដើម្បីបញ្ចៀសការប្រឈមមុខដាក់គ្នារវាងកងទ័ពនៃប្រទេសទាំងពីរ។
ចំណែកភាគីថៃ ក៏បានយល់ព្រមលុបចោលអក្សរដែលត្រូវបានកងទ័ពថៃសរសេរនៅលើ ផ្ទាំងថ្មក្រោយវត្ត និងដកចេញនូវស្លាកដែលទើបនឹងដាក់មិនបានប៉ុន្មានម៉ោងផងនោះ។
http://khmer.phnompenhpost.com/index...ion&Itemid=102