រាជធានីភ្នំពេញ ៖ គ្រោះថ្នាក់ចរាចរណ៍គួរឱ្យរន្ធត់មួយបង្កឡើងដោយរថយន្តដឹកស្រាបៀរ មួយគ្រឿង បើកបោះពួយបុកម៉ូតូពីក្រោយ បណ្តាលឱ្យអ្នកបើកម៉ូតូប៉ើងខ្ទាតចេញពីម៉ូតូ ហើយរថយន្តនោះក៏បើកកិនពីលើបែកក្បាលស្លាប់យ៉ាងអាណោចអាធ័ម កាលពីវេលាម៉ោង៧និង៣០នាទីព្រឹកថ្ងៃទី២៧ មករា លើកំណាត់ផ្លូវជាតិលេខ១ ក្នុងភូមិបឹងឈូក សង្កាត់និរោធ ខណ្ឌមានជ័យ ។ ជនរងគ្រោះនៅក្នុងគ្រោះថ្នាក់ចរាចរនេះឈ្មោះឃុន រ៉ា ភេទប្រុស អាយុ២៨ឆ្នាំ ស្នាក់នៅភូមិកោះនារាណ៍ សង្កាត់និរោធ ខណ្ឌមានជ័យ ត្រូវរថយន្តកិនបែកក្បាលស្លាប់ភ្លាមៗនៅនឹងកន្លែង ។
តាមសាក្សីដែលឃើញហេតុការណ៍បានឱ្យដឹងថា នៅវេលាម៉ោងខាងលើ គេឃើញរថយន្តបង្កហេតុម៉ាកហ៊ីយ៉ាន់ដាយ ពណ៌លឿង ពាក់ស្លាកលេខ ភ្នំពេញ 3A-0913 ដែលមានដឹកស្រាបៀរផងនោះ បើកបោះពួយយ៉ាងលឿនស្របពីក្រោយម៉ូតូ ។ ពេលមកដល់ចំណុចកើតហេតុ មិនដឹងជាយ៉ាងម៉េច ស្រាប់តែរថយន្តនេះជ្រុលទៅបុកម៉ូតូរបស់ជនរងគ្រោះម៉ាកឌ្រីម C125 ពណ៌ខ្មៅ ពីក្រោយយ៉ាងពេញទំហឹងបណ្តាលឱ្យទាំងមនុស្ស ទាំងម៉ូតូខ្ទាតចេញពីគ្នា រួចហើយ រថយន្តជាន់ហ្វ្រាំងមិនទាន់ ក៏កិនពីលើបុរសរងគ្រោះបែកក្បាលស្លាប់ភ្លាមៗតែម្តង បង្កឱ្យមានការភ្ញាក់ផ្អើលពីប្រជាពលរដ្ឋមកចោមរោមមើល ហើយចាប់ឃាត់អ្នកបើកបររថយន្តដឹកស្រាបៀរនោះជាប់ ។ ក្រោយមកទាំងអ្នកបើកបរ និងរថយន្តត្រូវសមត្ថកិច្ចបញ្ជូនទៅកាន់អធិការដ្ឋានខណ្ឌដើម្បី រង់ចាំធ្វើការដោះស្រាយ៕
http://kohsantepheapdaily.com.kh/art...27-005219.html