រាជធានីភ្នំពេញ ៖ ឧបទ្ទវហេតុគ្រោះថ្នាក់ចរាចរណ៍មួយបានកើតឡើងរវាងរថយន្តពាក់ស្លាកលេខ ខេមរភូមិន្ទ និងម៉ូតូអ្នកដំណើរមួយគ្រឿងបង្កឱ្យមានការភ្ញាក់ផ្អើលយ៉ាងខ្លាំងដោយសារតែខាងភាគីទាហ ានមិននិយាយពីច្បាប់ទំលាប់អាងខ្លួនជាទាហានគំរាមកំហែងអ្នកបើកម៉ូតូ ។ មិនតែប៉ុណ្ណោះបានលើកយកម៉ូតូរបស់ភាគីម្ខាងទៀតដាក់លើរថយន្តរបស់ខ្លួនដឹកយកចេញទៅ ទាំងតក់ក្រហល់ ដែលសកម្មភាពខាងលើមិនខុសពីចោរប្លន់នោះឡើយ ។ #ហេតុការណ៍នោះបានកើតឡើងកាលពីវេលាម៉ោង៧និង១០នាទីយប់ថ្ងៃទី១៨ ខែធ្នូ ឆ្នាំ២០១០ នៅចំណុចផ្លូវខ្វែងភូមិចំការឪឡឹក សង្កាត់កាកាប ខណ្ឌដង្កោ ។ ប្រជាពលរដ្ឋនិយាយថា រថយន្តមួយគ្រឿងនោះម៉ាកតូយ៉ូតា វីហ្គោ ពណ៌ស ពាក់ស្លាកលេខខេមរភូមិន្ទ ០២-២-១៩៣០ បើកបរដោយមន្ត្រីយោធាម្នាក់និងមានដឹកប្រពន្ធកូនព្រមទាំងទាហានស្លៀកពាក់ស៊ីវិលម្នាក់ ផង ។ រថយន្តនោះមានបំពាក់ស៊ីរ៉ែនទៀតផង ចំណែកឯម៉ូតូរងគ្រោះម៉ាកវ៉េវអាល់ហ្វា ពណ៌ខ្មៅ បើកបរដោយបុរសមិនស្គាល់ឈ្មោះម្នាក់ ហើយថាម៉ូតូនោះខ្ចីគេជិះទៀតផង ។
ប្រជាពលរដ្ឋបានបន្តទៀតថា មុនពេលកើតហេតុគេបានឃើញរថយន្ត១គ្រឿងនោះបើកបរធ្វើដំណើរក្នុងទិសដៅពីជើងទៅត្បូង ចំណែកឯម៉ូតូជិះម្នាក់ឯង ក្នុងទិសដៅពីលិចទៅកើត ។ លុះពេលទៅដល់ត្រង់ចំណុចផ្លូវខ្វែងខាងលើម៉ូតូបានបត់ឆ្វេងសំដៅទៅទិសខាងជើងវិញ ក៏បានបុកជាមួយរថយន្តបណ្តាលឱ្យរថយន្តទាហាននោះរងការខូចខាតកាងខាងមុខបន្តិចបន្តួច ។ ប្រភពដដែលបានបន្តទៀតថា ពេលនោះម៉ូតូក៏រងនូវការខូចខាតខ្លះៗដែរ ហើយខាងទាហានបានទាមទារឱ្យភាគីអ្នកជិះម៉ូតូសងថ្លៃខូចខាតរថយន្ត ប៉ុន្តែដោយទារច្រើនពេកភាគីម៉ូតូអត់លុយសងទើបក្រុមភាគីរថយន្តបានលើកយកម៉ូតូនោះ ដាក់លើរថយន្តរួចបើកចេញទៅយ៉ាងតក់ក្រហល់ដូចចោរប្លន់មិនបានទុកឱ្យសមត្ថកិច្ចប៉ូលិសចុ ះវាស់វែងតាមច្បាប់ឡើយ ។
ប្រជាពលរដ្ឋបានបន្តថា ភាគីរថយន្តអាងអំណាចទោះដឹងថាធ្វើបែបនេះខុសច្បាប់ក៏នៅតែធ្វើដែរ ហើយការលើកម៉ូតូភាគីម្ខាងទៀត ដាក់លើរថយន្តដឹកចេញទៅនោះគឺដើម្បីកាត់កងថ្លៃខូចខាតកាងរថយន្តបន្តិចបន្តួចប៉ុណ្ណោះ ។ ពេលដែលរថយន្តដឹកម៉ូតូចេញទៅ ម្ចាស់ម៉ូតូបានខំប្រឹងរត់ដេញតាមនិងតោងឡើងជិះរថយន្តនោះទៅជាមួយដែរ ព្រោះខ្លាចបាត់ម៉ូតូ ហើយទំរាំតែឡើងជិះបានស្ទើរតែធ្លាក់ស្លាប់ទៀតផង ។ ប្រភពដដែលបានបន្តទៀតថា ក្រោយពេលមានហេតុការណ៍កើតឡើងបែបនេះ ប្រជាពលរដ្ឋបានសំដែងនូវការមិនពេញចិត្តគ្រប់ៗគ្នាដោយនិយាយទាំងកំហឹងថា ប្រសិនបើចៃដន្យរថយន្តនោះបែរជាខូចទៅមុខមិនរួចពួកគាត់នឹងដុតកំទេចចោលជាមិនខាន ។ ម្យ៉ាងទៀតពេលដែលរថយន្តនោះដឹកយកម៉ូតូគេរត់បែបនោះ ប៉ូលិសខណ្ឌដង្កោបានបើករថយន្តស៊ីរ៉ែនមួយគ្រឿងដេញតាមឃាត់យកម៉ូតូមកវិញ បង្កឱ្យមានការភ្ញាក់ផ្អើលដូចខ្សែភាពយន្តភាគហុងកុង ។ ប៉ុន្តែដេញតាមរហូតដល់សង្កាត់ព្រែកកំពិស ខណ្ឌដង្កោ ក៏ដេញលែងទាន់ហើយរថយន្តនោះបានបើកបុកបារ៉ាស់របស់ប៉ូលិសជាច្រើនកន្លែងគេចខ្លួនបាត់ស្រមោល ដោយនាំយកទាំងម៉ូតូនិងម្ចាស់ម៉ូតូទៅជាមួយផង ប៉ុន្តែពុំដឹងថា នាំយកទៅដល់ណាឡើយ ។ ប្រជាពលរដ្ឋបាននិយាយថា ពេលឃើញបែបនេះពួកគាត់ភ័យញាក់សាច់មិនចង់ឱ្យជួបហេតុការណ៍បែបនេះឡើយ ព្រោះពេលនោះភាគីអ្នកជិះរថយន្តអត់និយាយពីច្បាប់ទេ ហើយក៏មិនចាំបាច់់ឱ្យប៉ូលិសចរាចរវាស់វែងដែរ ពួកគេប្រើអំណាចដោយអាងពាក់ស្បែកខ្លាគួរឱ្យស្អប់ខ្ពើមបំផុត ៕