ខេត្តកំពង់ធំ ៖ យ៉ាងហោចណាស់មានមនុស្សម្នាក់បានស្លាប់ និងម្នាក់ទៀតកំពុងសំរាកព្យាបាលនៅមន្ទីរពេទ្យបន្ទាប់ពីពុលពងគីង្គក់កាលពីថ្ងៃទី២៨ ខែធ្នូ នៅភូមិចំណា ឃុំសាលាវិស័យ ស្រុកប្រាសាទបល្ល័ង្ក ។ ទាក់ទិនករណីពុលខាងលើនេះ លោកវរសេនីយ៍ត្រី អ៊ុំ អ៊ាត អធិការនគរបាលស្រុកប្រាសាទបល្ល័ង្ក បានបញ្ជាក់ឱ្យដឹងថា ជនរងគ្រោះឈ្មោះជន ថន អាយុ៤៩ឆ្នាំ មានទីលំនៅក្នុងភូមិកើតហេតុខាងលើនិងបានស្លាប់បន្ទាប់ពីក្រុមគ្រួសារដឹកយកមកព្យាបាលនៅមន្ទីរពេទ្យខ េត្ត ក្រោយពីហូបសត្វគីង្គក់អស់ជិត១០ក្បាល កាលពីវេលាម៉ោង៥ល្ងាចថ្ងៃទី២៨ ខែធ្នូ ឆ្នាំ២០១០ ។ ដោយឡែកជនរងគ្រោះម្នាក់ទៀតឈ្មោះទី តុល អាយុ២៥ឆ្នាំ មានទីលំនៅក្នុងភូមិជាមួយគ្នាកំពុងសំរាកព្យាបាលនៅក្នុងមន្ទីរពេទ្យបង្អែកស្រុកស្ទោង ។
ពាក់ព័ន្ធករណីខាងលើនេះ លោកអធិការបានបន្តឱ្យដឹងទៀតថា តាមការស្រាវជ្រាវរបស់សមត្ថកិច្ចមូលដ្ឋានបញ្ជាក់ថា មុនពេលកើតហេតុគេឃើញជនរងគ្រោះទាំងពីរនាក់ជាឪពុកមានិងក្មួយបាននាំគ្នាយកសត្វគីង្គក់ចំនួនជិត១០ក្នុងនោះ ក៏មានគីង្គក់ពងផងដែរមកធ្វើជាគ្រឿងក្លែមទឹកត្នោតជូរ ។ ក្រោយពីហូបបានមួយសន្ទុះស្រាប់តែពួកគាត់ទាំងពីរហាក់ដូចជាពុលព្រោះមានអាការក្អួតចង្អោរ ឃើញដូច្នោះអ្នកជិតខាងបានបង្ខំឱ្យជនរងគ្រោះឈ្មោះជន ថន ទៅមន្ទីរពេទ្យតែគាត់ប្រកែកថាមិនអីទេ ។ ដោយឃើញអាការជនរងគ្រោះកាន់តែធ្ងន់ធ្ងរក្រុមគ្រួសារបានបញ្ជូនទៅព្យាបាលនៅមន្ទីរពេទ្យខេត្ត ប៉ុន្តែដោយសារជាតិពុលពីសត្វគីង្គក់បានជ្រាបសព្វសាច់ហើយនោះគ្រូពេទ្យពុំអាចជួយសង្គ្រោះបានឡើយហើយន ៅវេលាម៉ោងប្រមាណ១២យប់ជនរងគ្រោះរូបនេះក៏បានស្លាប់បាត់ទៅ ដោយឡែកឈ្មោះទី តុល បានរួសរាន់ទៅមន្ទីរពេទ្យទាន់ពេលវេលា ។
សមត្ថកិច្ចដដែលបានបន្តថា ជនរងគ្រោះទាំងពីរនាក់ត្រូវបានគេសន្និដ្ឋានថា ទំនងជាហូបសត្វគីង្គក់ប៉ះចំពងរបស់វា ទើបបណ្ដាលឱ្យពុលស្លាប់បែបនេះ ។ ជាមួយគ្នានេះដែរឈ្មោះទី តុល បាននិយាយថា ខ្លួនហូបសត្វគីង្គក់ក្លែមជាមួយទឹកត្នោតជូរ ព្រោះគិតថាសត្វគីង្គក់ជាថ្នាំត្រជាក់ជួយព្យាបាលជំងឺគ្រាំគ្រាក្នុងទើបខ្លួននិងឪពុកមានាំគ្នាហូប ដោយមិនបានគិតដល់ពងរបស់វាពុលទេ ។ សពជនរងគ្រោះដែលបានស្លាប់ដោយសារពុលពងគីង្គក់ត្រូវបានក្រុមគ្រួសារយកទៅធ្វើបុណ្យតាមប្រពៃណី ៕