ខេត្តកំពង់ឆ្នាំង ៖ យុវជនម្នាក់ដែលសល់តែ៥ថ្ងៃទៀតនឹងចេញទៅធ្វើការនៅប្រទេសកូរ៉េបានស្លាប់បាត់បង់ជីវិត ក្នុងឧប្បត្តិហេតុគ្រោះថ្នាក់ចរាចរណ៍ដ៏រន្ធត់មួយកាលពីវេលាម៉ោង៦ និង៣៥នាទីល្ងាចថ្ងៃទី២១ ធ្នូ នៅតាមបណ្តោយផ្លូវជាតិលេខ៥ មុខធនាគារកាណាឌីយ៉ា ស្ថិតក្នុងភូមិឡទឹកត្រី សង្កាត់កំពង់ឆ្នាំង ក្រុងកំពង់ឆ្នាំង ។ ក្នុងហេតុការណ៍ម៉ូតូបុកគ្នាយ៉ាងពេញទំហឹងនេះមនុស្សពីរនាក់ផ្សេងទៀតក៏បានរងរបួសយ៉ាងធ ្ងន់ធ្ងរផងដែរ ។ ក្រោយហេតុការណ៍កើតឡើង ប៉ូលិសក្រុងកំពង់ឆ្នាំងបានប្រឹងប្រែងសំរួលចរាចរណ៍ដែលកកស្ទះព្រោះតែជនរងគ្រោះ៣ន ាក់ បានស្លាប់ និងរបួសដួលដេករដូករណែលពេញផ្លូវជាតិជាមួយនឹងម៉ូតូ២គ្រឿង ។ តាមរបាយការណ៍របស់ប៉ូលិសក្រុងកំពង់ឆ្នាំងបានឱ្យដឹងថា ជនរងគ្រោះដែលស្លាប់ឈ្មោះជឹម សុល័ក្ក អាយុ២៩ឆ្នាំ រស់នៅភូមិកំពង់អុស សង្កាត់កំពង់ឆ្នាំង ។ ឈ្មោះនេះជាអ្នកបើកម៉ូតូម៉ាកវ៉េវ ពណ៌ខ្មៅ គ្មានស្លាកលេខ ជាម៉ូតូខ្ចីគេជិះទៀត ។ ចំណែកភាគីម្ខាងទៀតមានឈ្មោះឃឿន អាយុ២៥ឆ្នាំ រស់នៅភូមិដំបូកកកោះ ឈ្មោះនេះជាអ្នករត់ម៉ូតូឌុបធុន C125 ស៊េរី២០០៥ ពណ៌ខ្មៅ ពាក់ស្លាកលេខយ-៧៦១១ ភព១ និងអ្នកជិះពីក្រោយឈ្មោះអៀង រស្មី អាយុ២៥ឆ្នាំ រស់នៅភូមិកណ្តាល សង្កាត់កំពង់ឆ្នាំង ។
ប្រភពដដែលបានបន្តថា នៅមុនពេលកើតហេតុ ជនរងគ្រោះឈ្មោះជឹម សុល័ក្ក បានជិះម៉ូតូម៉ាកវ៉េវ ពណ៌ខ្មៅ ចេញពីរោងចក្រ M&V ក្នុងទិសដៅពីត្បូងទៅជើងក្នុងល្បឿនយ៉ាងលឿន លុះមកដល់ចំណុចខាងលើ ក៏បានរេចង្កូតមកឆ្វេងដៃចូលកណ្តាលទ្រូងផ្លូវ ។ ស្របពេលជាមួយគ្នានេះ ក៏មានម៉ូតូមួយគ្រឿងម៉ាកហុងដាធុនសេ១២៥ ស៊េរី២០០៥ ដែលបើកបរដោយឈ្មោះឃឿន ឌុបឈ្មោះរស្មីធ្វើដំណើរ ពីជើងទៅត្បូង មកដល់ចំណុចកើតហេតុក៏បានវ៉ារថយន្តមួយគ្រឿងដែលឈប់ស្ងៀម ហើយក៏ចូលទៅទ្រូងផ្លូវដូចគ្នា និងបុកគ្នាយ៉ាងពេញទំហឹងលាន់ដូចរន្ទះ បណ្តាលឱ្យជនរងគ្រោះឈ្មោះជឹម សុល័ក្ក ស្លាប់នៅនឹងកន្លែង ចំណែកឈ្មោះឃឿន និងឈ្មោះរស្មី រងរបួសយ៉ាងធ្ងន់ធ្ងរ ។ រីឯម៉ូតូទាំងពីរគ្រឿងបានខូចខ្ទេចទាំងស្រុងគឺ រមូរចូលគ្នាតែម្តង ។
ជនរងគ្រោះរបួសធ្ងន់ទាំងពីរនាក់ ត្រូវបានដឹកទៅសង្គ្រោះនៅមន្ទីរពេទ្យខេត្តជាបន្ទាន់ ប៉ុន្តែដោយឈ្មោះឃឿន របួសធ្ងន់ធ្ងរនិងមានបាក់ជើងផងទើបដឹកយកទៅសង្គ្រោះនៅមន្ទីរពេទ្យខេត្តបាត់ដំបងបន ្តទៀត ។ មន្ត្រីប៉ូលិសបាននិយាយថា ឈ្មោះជឹម សុល័ក្ក គឺជាបេក្ខជនដែលទើបប្រឡងជាប់ទៅធ្វើការនៅប្រទេសកូរ៉េ ហើយនៅសល់៥ថ្ងៃទៀតនឹងត្រូវឡើងយន្តហោះចេញដំណើរទៅ ទើបនៅថ្ងៃកើតហេតុគេបានផឹកស៊ីជាមួយមិត្តភក្តិ ដែលជាការជូនដំណើរគ្នា ហើយក៏ជួបគ្រោះអកុសលបែបនេះតែម្តង ។ សពជនរងគ្រោះត្រូវបានដឹកយកទៅធ្វើបុណ្យតាមប្រពៃណីទាំងយប់ ចំណែកម៉ូតូត្រូវបានរក្សាទុកនៅការិយាល័យចរាចរណ៍ផ្លូវគោកខេត្ត ដើម្បីរង់ចាំការដោះស្រាយតាមច្បាប់ ៕