ខេត្តស្ទឹងត្រែង ៖ សពប្រជាពលរដ្ឋខ្មែរម្នាក់ដែលទាហានព្រំដែនឡាវបាញ់ស្លាប់ក្នុងទឹកដីឡាវ កាលពីវេលាម៉ោងជាង៨យប់ថ្ងៃទី២២ ធ្នូ កន្លងមកនេះ គឺបានបូជារួចរាល់ហើយនៅក្នុងទឹកដីខ្មែរជាប់ព្រំដែនឡាវ កាលពីវេលាម៉ោងប្រមាណ១១ព្រឹកថ្ងៃសុក្រ ទី២៤ ធ្នូ ២០១០ ។ នេះបើតាការបញ្ជាក់ប្រាប់តាមទូរស័ព្ទពីសំណាក់ស្នងការរងទទួលបន្ទុកវរៈព្រំដែនប្រចាំខ េត្តស្ទឹងត្រែង លោកឯក ស៊ីដន ។
លោកស្នងការរងបន្តថា សពត្រូវបានបញ្ជូនមកទឹកដីខ្មែរកាលពីវេលាម៉ោងប្រមាណ១០និង៣០នាទីព្រឹកថ្ងៃទី២៤ ធ្នូ ហើយបានសំរេចបូជានៅក្នុងភូមិព្រែកមាស ស្រុកសៀមប៉ាង ខេត្តស្ទឹងត្រែង ដោយសារតែសពឈ្មោះថាន់ សារ៉ាត់ អាយុ៤៦ឆ្នាំ រស់នៅភូមិដូង ស្រុករមាសហែក ខេត្តស្វាយរៀង ពុំមានបងប្អូនសាច់ញាតិនោះឡើយ ។
លោកស្នងការរងខេត្តស្ទឹងត្រែងបានបញ្ជាក់ដែរថា មូលហេតុដែលទាហានព្រំដែនឡាវបាញ់សំលាប់នោះ ដោយសារតែជនរងគ្រោះបានចូលជ្រៅទៅក្នុងទឹកដីឡាវប្រមាណជាង២គីឡូម៉ែត្រ ពីព្រំដែនកម្ពុជា ស្រុកសៀមប៉ាង ក្នុងគោលបំណងដើម្បីទៅកាប់ឈើប្រណីត ៕