រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាមានប្រសាសន៍ថា អ្នកប្រជាធិបតេយ្យមែនទែនគេអត់និយាយទេ គេអត់ចាំបាច់ប្រកាសតំាងខ្លួនថាជាអ្នកប្រជាធិបតេយ្យទេ អ្នកស្នេហាជាតិពិតប្រាកដក៏អត់ចាំបាច់និយាយថា ខ្ញុំអ្នកស្នេហាជាតិដែរ អ្នកការពាររាជបល្ល័ង្កណាស់ក៏គេមិនចាំបាច់ប្រកាសថា គេជាអ្នករាជានិយមទេ។ សម្តេចតេជោបានមានប្រសាសន៍បែបនេះ ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីបិទសន្និបាតបូកសរុបការងារឆ្នាំ២០១០ និងលើកទិសដៅឆ្នាំ២០១១ របស់ក្រសួងអភិវឌ្ឍន៍ជនបទ កាលពីថ្ងៃទី២៩ ខែធ្នូ នៅសាលសន្និសីទចតុមុខ។
ទាក់ទិននឹងបញ្ហាខាងលើ សម្តេចតេជោនាយករដ្ឋមន្រ្តីបានលើករំលឹកថា ការឃោសនាកាលពីឆ្នាំ២០០៨ មានគណបក្សនយោបាយខ្លះគេហ៊ានឃោសនាថា បើសិនជាគណបក្សរបស់គេមិនជោគជ័យទេ រាជានិយមនៅកម្ពុជា នឹងចុះខ្សោយ។ ឥឡូវនេះ សូមពិនិត្យមើលតើមានសភាពដូចម្តេច? នៅពេលដែលគណបក្សប្រជាជនកាន់កាប់ជាង២ភាគ៣ នៅក្នុងសភា គឺរាជានិយមនៅកម្ពុជា កាន់តែខ្ពង់ខ្ពស់។ នេះគឺជារឿងពិត។ ចំពោះអ្នកដែលអួតនោះ គឺគ្មានកៅអីក្នុងសភាផង តើធ្វើអ្វីកើត? ចំណែកគណបក្សដែលមានកៅអីក្នុងសភាច្រើននោះ គេគោរពព្រះមហាក្សត្រ គេការពាររាជបល្ល័ង្ក គេការពាររាជានិយម គេមិនចាំបាច់និយាយថា គេជាមនុស្សរាជានិយមទេ។ សម្តេចមានប្រសាសន៍បន្តថា ឥឡូវយើងគិតយ៉ាងម៉េច យើងមានកន្លែងណាឈរ បើគេមានអ្នកជាតិនិយម អ្នករាជានិយម អ្នកសីហនុនិយម អ្នកប្រជាធិបតេយ្យ អ្នកសិទ្ធិមនុស្ស គេយកអស់រលីងទៅហើយ យើងនៅសល់អ្វីទៀត។ ដូច្នេះយើងនៅសល់តែមួយគត់ គឺនៅក្នុងប្រជាជន អ្នកប្រជាជននិយម។
សម្តេចតេជោនាយករដ្ឋមន្ត្រីបានថ្លែងថា ការពិត ការអនុវត្តគោលនយោបាយកន្លងទៅ ទោះបីជាយើងមិនប្រើក៏ដោយ យើងក៏ជាអ្នកប្រជាជននិយម នេះជាគោលនយោបាយពិតប្រាកដរបស់គណបក្សប្រជាជន គេហៅប្រជាធិបតេយ្យប្រជាជនដែលវាស្ថិតនៅក្នុងមូលដ្ឋានចំបងនៃនិក្ខេបបទបណ្ឌិតរបស់ខ្ញុំន ោះ។ រឿងវាដូច្នេះ យើងមិនបានតាំងខ្លួនជាអ្វីទេ ក៏ប៉ុនែ្តយើងបានធ្វើសកម្មភាពជាក់ស្តែងក្នុងនាមជាអ្វីនោះ គេអាចយល់បានអាចដឹងបានអំពីបញ្ហាហ្នឹង ទស្សនវិជ្ជារបស់យើងគឺច្បាស់លាស់មិនចាំបាច់មោទន:ទេ។ សម្តេចតេជោនាយករដ្ឋមន្រ្តីមានប្រសាសន៍បញ្ជាក់ថា គណបក្សរបស់យើង គឺគណបក្សប្រជាជន យើងធ្វើផ្លូវលំជនបទដែលយើងបានធ្វើពីមុនឱ្យក្លាយទៅជាផ្លូវចាក់កៅស៊ូនៅជនបទ៕