រាជធានីភ្នំពេញ ៖ យោងតាមសេចក្តីប្រកាសព័ត៌មានរបស់សាលាក្តីចេញផ្សាយនៅថ្ងៃទី២១ ធ្នូ ឆ្នាំ២០១០ ឱ្យដឹងថា រដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ បានចូលរួមចំណែកថវិកាចំនួន១,២លានអឺរ៉ូ សំរាប់គំរោងលើកកំពស់ការចូលរួមរបស់ជនរងគ្រោះនៅក្នុងកិច្ចដំណើរការនីតិវិធីនៅអង្គជំន ុំជម្រះវិសាមញ្ញក្នុងតុលាការកម្ពុជាហៅកាត់ថា តុលាការខ្មែរក្រហម ។ សេចក្តីប្រកាសព័ត៌មានឱ្យដឹងទៀតថា ឯកសារត្រូវបានចុះហត្ថលេខានៅថ្ងៃទី១៦ ធ្នូ ឆ្នាំ២០១០ ដោយនាយក GTZ ប្រចាំនៅតំបន់អាស៊ីខាងត្បូង ឡាវ និងកម្ពុជា និងលោកក្រាញ់ តូនី ប្រធានរដ្ឋបាលស្តីទីនៃសាលាក្តី នៅថ្ងៃទី២០ ធ្នូ ឆ្នាំ២០១០ ។
សេចក្តីប្រកាសព័ត៌មានរបស់សាលាក្តីដដែលបានបន្ថែមថា ថវិការួមចំណែកនេះត្រូវបានផ្តល់ជូនសំរាប់គំរោងរយៈពេល១៦ខែ គិតចាប់ពីខែកញ្ញា ឆ្នាំ២០១០ ហើយនឹងត្រូវបញ្ចប់ត្រឹមថ្ងៃទី៣១ ធ្នូ ឆ្នាំ២០១១ ដោយផ្តោតលើសកម្មភាពនៃការចាត់ចែងលើឯកសារ កម្មវិធីចុះផ្សព្វផ្សាយ និងការតំណាងតាមផ្លូវច្បាប់នៅចំពោះមុខសាលាក្តី ។ សេចក្តីប្រកាសរបស់សាលាក្តីបានគូសបញ្ជាក់ថា ការចូលរួមរបស់ជនរងគ្រោះ គឺជាការងារមួយក្នុងចំណោមការងារជាច្រើនទៀត ដែលសាលាក្តីបានបំបែកឯតទគ្គកម្ម ហើយបង្កើតជាបទដ្ឋានថ្មីៗសំរាប់តុលាការទាំងឡាយដែលទទួលការគាំទ្រ និងចូលរួមពីអន្តរជាតិ ។ គំរោងនេះនឹងជួយបន្តជំរុញឱ្យមានយុត្តិធម៌ និងការផ្សះផ្សាជាតិ តាមរយៈការអនុវត្តសិទ្ធិយ៉ាងពេញលេញរបស់ជនរងគ្រោះចំពោះមុខសាលាក្តី ។
មន្ត្រីសាលាក្តីឱ្យដឹងទៀតថា ប្រទេសអាល្លឺម៉ង់គឺជាប្រទេសផ្តល់ជំនួយសំខាន់មួយក្នុងចំណោមបណ្តាប្រទេសផ្តល់ជំនួយដទៃ ទៀត ដែលផ្តល់ការគាំទ្រដល់សាលាក្តីជាហូរហែមក ចាប់តាំងពីពេលសាលាក្តីនេះត្រូវបានបង្កើតឡើងនៅក្នុងឆ្នាំ២០០៦ ។ ចាប់ពីឆ្នាំ២០០៥ រហូតដល់ពេលនេះ ប្រទេសអាល្លឺម៉ង់បានផ្តល់ថវិកាសរុបជាង៧លានអឺរ៉ូ សំរាប់ទាំងផ្នែកជាតិ និងអន្តរជាតិនៃសាលាក្តី ។ នៅក្នុងឆ្នាំ២០១០ ក៏ដូចជាឆ្នាំ២០០៩ដែរ ប្រទេសអាល្លឺម៉ង់បានផ្តល់ថវិកាចំនួន១,៥លានអឺរ៉ូ ដល់សាលាក្តី ៕