រាជធានីភ្នំពេញ ៖ ជនសង្ស័យជួញដូរគ្រឿងញៀនដ៏ធំមួយក្រុមត្រូវសមត្ថកិច្ចមន្ទីរប្រឆាំងគ្រឿងញៀននៃក្រសួងមហ ាផ្ទៃបើកប្រតិបត្តិការចាប់ខ្លួនបានជាបន្តបន្ទាប់ រួមជាមួយនឹងការឆែកឆេរផ្ទះស្នាក់នៅយ៉ាងសកម្មផងដែរក្នុងការស្វែងរកវត្ថុតាង។ រហូតមកដល់ព្រឹកថ្ងៃទី២១ ធ្នូ សមត្ថកិច្ចពុំបានធ្វើការបង្ហាញខ្លួនជនសង្ស័យណាម្នាក់នៅឡើយទេ។ ទោះបីជាយ៉ាងណា តាមព័ត៌មានមិនទាន់ផ្លូវការបានឱ្យដឹងថា មានជនសង្ស័យចំនួន៧នាក់ហើយ ដែលត្រូវបានឃាត់ខ្លួននៅក្នុងប្រតិបត្តិការបង្ក្រាបគ្រឿងញៀនដ៏ក្តៅគគុករយៈពេល៣ថ្ងៃម កនេះ រួមទាំងដកហូតបានគ្រឿងញៀនជាសារធាតុផ្សំ ប្រភេទកេតតាឡាមួយចំនួនធំ។ នៅក្នុងចំណោមជនសង្ស័យដែលត្រូវឃាត់ខ្លួន ត្រូវបានគេបង្ហើបឱ្យដឹងថា ជនម្នាក់មានឋានៈជាទីប្រឹក្សា និងម្នាក់ទៀតជាអតីតតារាភាពយន្តផងដែរ។ ជនសង្ស័យដែលត្រូវឃាត់ខ្លួននោះត្រូវបានដឹងថា ១-ឈ្មោះសៀង សុខន ភេទប្រុសអាយុ៣២ឆ្នាំ រស់នៅផ្ទះលេខ៨៨ បុរីពិភពថ្មី ភូមិរោងចក្រ សង្កាត់ភ្នំពេញថ្មី ខណ្ឌសែនសុខ, ២-ឈ្មោះសេង វុត្ថា, ៣-ឈ្មោះស៊ិន កាមុល, ៤-ឈ្មោះលី ជាជនជាតិវៀតណាម។ ចំណែក៣នាក់ទៀតពុំត្រូវគេបង្ហើបឱ្យដឹងឈ្មោះឡើយ។
តាមព័ត៌មាននានាឱ្យដឹងជាជំហានដំបូងថា នៅក្នុងប្រតិបត្តិការបង្ក្រាបគ្រឿងញៀននេះសមត្ថកិច្ចបានដកហូតរថយន្តម៉ាកឡិចស៊ីស ពណ៌ខ្មៅ ស៊េរី២០១០ របស់ឈ្មោះសៀង សុខន និងដកហូតបានរថយន្តម៉ាកមែរសឺដែសស្ព័រ ពណ៌ខ្មៅទំនើបរបស់ឈ្មោះសេង វុត្ថា ដែលជាអតីតតារាភាពយន្ត ផងដែរ ព្រមទាំងឈានទៅធ្វើការឆែកឆេរលំនៅឋានរបស់ឈ្មោះសៀង សុខន នៅវេលាម៉ោង៥ និង៤០នាទីល្ងាច ថ្ងៃទី២០ ធ្នូ រហូតដល់យប់។
តាមប្រភពព័ត៌មានដដែលឱ្យដឹងថា ជនសង្ស័យឈ្មោះសេង វុត្ថា ត្រូវបានសមត្ថកិច្ចមន្ទីរប្រឆាំងគ្រឿងញៀនចាប់ខ្លួនកាលពីថ្ងៃទី១៩ ធ្នូ ព្រមទាំងដកហូតបានរថយន្តមែរសឺដែស ស្ព័រ ពណ៌ខ្មៅមួយគ្រឿង។ តាមចំលើយសារភាពរបស់ឈ្មោះសេង វុត្ថា ទើបសមត្ថកិច្ចបានសុំដីកានាំខ្លួនលោកសៀង សុខន ដែលជាមន្ត្រីធំដុំម្នាក់ដែលមានលំនៅឋានលេខ៨៨ បុរីពិភពថ្មី ភូមិរោងចក្រ ព្រមទាំងធ្វើការចាប់ខ្លួនកាលពីវេលាម៉ោង៤ និង៣០នាទីរសៀល ថ្ងៃទី២០ ខែធ្នូ នៅភោជនីយដ្ឋានចំការននោង ស្ថិតនៅភូមិកៀនឃ្លាំង សង្កាត់ព្រែកលៀប ខណ្ឌឫស្សីកែវ ខណៈពេលដែលជិះរថយន្តម៉ាកឡិចស៊ីសពណ៌ខ្មៅ ស៊េរី២០១០ទៅផឹកសីុក្នុងភោជនីយដ្ឋាននោះ។ នៅក្នុងការចាប់ខ្លួននេះសមត្ថកិច្ចមន្ទីរប្រឆាំងគ្រឿងញៀនក៏បានផ្ទុះអាវុធ១គ្រាប់គំរាម ជនសង្ស័យផងដែរដើម្បីឱ្យប្រគល់ខ្លួនតាមសំរួល ព្រោះឮថា មានឋានៈជាទីប្រឹក្សា។ តាមព័ត៌មានឱ្យដឹងថា នៅក្នុងប្រតិបត្តិការនោះអង្គរក្សម្នាក់ត្រូវបានចាប់ខ្លួនដែរ តែត្រូវបានដោះលែងទៅវិញដោយសារគ្មានពិរុទ្ធភាព។
បន្ទាប់ពីការចាប់ខ្លួន សមត្ថកិច្ចមន្ទីរប្រឆាំងគ្រឿងញៀនក៏បានទៅសហការជាមួយអាជ្ញាធរខណ្ឌសែនសុខ ដោយមានការដឹកនាំដោយលោកព្រះរាជអាជ្ញារងឯក ឆេងហួត ចុះទៅឆែកឆេរលំនៅឋានឈ្មោះសៀង សុខន ដើម្បីរុករកវត្ថុតាង។ ទោះបីជាយ៉ាងណា ការឆែកឆេររហូតដល់ម៉ោង៧យប់ សមត្ថកិច្ចរកពុំឃើញវត្ថុតាងអ្វីនោះទេ គឺគ្រាន់តែធ្វើការដកហូតកុំព្យូទ័រយួរដៃ១គ្រឿង និងលិខិតឆ្លងដែនចំនួន២ច្បាប់ប៉ុណ្ណោះ។ តាមព័ត៌មានមួយបានចោទប្រកាន់ជនសង្ស័យឈ្មោះសៀង សុខន ថា បុគ្គលនេះតែងតែឱ្យឈ្មោះសេង វុត្ថា ជួយរកម៉ូយទិញថ្នាំញៀនដោយលក់ឱ្យក្នុង១ខាំតំលៃជាង៤ពាន់ដុល្លារ។ ឈ្មោះសេង វុត្ថា ក៏ធ្លាប់យកថ្នាំញៀនពីឈ្មោះសៀង សុខន ទៅលក់ឱ្យឈ្មោះរ៉ា ជាច្រើនលើកមកហើយដែរ។ តាមព័ត៌មានបន្តទៀតថា នៅ មុនពេលចាប់ខ្លួន ឈ្មោះសេង វុត្ថា បានយកថ្នាំញៀនពីឈ្មោះសៀង សុខន ចំនួន៦ខាំយកទៅលក់ឱ្យឈ្មោះរ៉ា បានប្រាក់ជាង២ម៉ឺនដុល្លារ ព្រមទាំងទំនាក់ទំនងប្រគល់ប្រាក់ទៀតផង។ លុះក្រោយមកទៀតឈ្មោះសេង វុត្ថា បានទៅជួបទំនាក់ទំនងឈ្មោះសៀង សុខន ទទួលយកគ្រឿងញៀននៅម្តុំផ្សារថ្មីក៏ត្រូវសមត្ថកិច្ចឃាត់ខ្លួនតែម្តង។
- តុលាការសំរេចឃុំខ្លួនបណ្តោះអាសន្នមន្ត្រីយោធាម្នាក់ និងជនជាតិវៀតណាម២នាក់ពាក់ព័ន្ធគ្រឿងញៀន១.៥០០ក្រាម
តុលាការសាលាដំបូងរាជធានី នៅថ្ងៃទី២១ ធ្នូ បានសំរេចឃុំខ្លួនបណ្តោះអាសន្នលើជនសង្ស័យ៣នាក់ ក្នុងនោះមានមន្ត្រីយោធាម្នាក់ និងជនជាតិវៀតណាម២នាក់ ពាក់ព័ន្ធជួញដូរគ្រឿងញៀនឆ្លងដែន។ ជនសង្ស័យម្នាក់ជាមន្ត្រីយោធាឈ្មោះហៃ ចាន់ភារិទ្ធ ភេទប្រុស អាយុ៣៤ឆ្នាំ ស្នាក់នៅផ្ទះលេខ១៣៥C ផ្លូវលេខ១១៨ សង្កាត់មនោរម្យ ខណ្ឌ៧មករា និង២នាក់ទៀតជនជាតិយួន ម្នាក់ឈ្មោះលី វ៉ាន់ឡាញ់ ភេទប្រុស អាយុ៤៥ឆ្នាំ និងម្នាក់ទៀតឈ្មោះម៉ាយ ជុងហ៊ីវ ភេទប្រុស អាយុ៣២ឆ្នាំ ពួកគេមានអាសយដ្ឋាននៅប្រទេសវៀតណាម ។ តាមប្រភពព័ត៌មាននៅសាលាដំបូងរាជធានីភ្នំពេញ បានឱ្យដឹងថា កាលពីថ្ងៃទី១៧ ធ្នូ សមត្ថកិច្ចនគរបាលមន្ទីរប្រឆាំងគ្រឿងញៀនក្រសួងមហាផ្ទៃបានតាមចាប់មុខសញ្ញាជួញដូរ គ្រឿងញៀនឆ្លងដែនដែលពេលនោះបានប្រទះឃើញជនសង្ស័យឈ្មោះហៃ ចាន់ភារិទ្ធ កំពុងដើរចេញពីក្រុមហ៊ុនទទួលបញ្ជីមួយឈ្មោះហ្វេដិច ស្ថិតនៅតាមបណ្តោយមហាវិថីព្រះមុនីវង្ស ជិតភ្លើងស្តុបបូកគោ ខណ្ឌចំការមន រាជធានីភ្នំពេញ ដោយមានយួរស្បោងទំនិញផង ។ ខណៈនោះនគរបាលមន្ទីរប្រឆាំងគ្រឿងញៀនបានឃាត់ខ្លួន និងឆែកឆេរទៅឃើញមានម្សៅសារធាតុផ្សំគ្រឿងញៀនចំនួន១.៥០០ក្រាម ក៏បាននាំទៅសាកសួរនៅមន្ទីរប្រឆាំងគ្រឿងញៀន ។
ប្រភពព័ត៌មានបានឱ្យដឹងទៀតថា ក្រោយពីឃាត់ខ្លួនជនសង្ស័យជាមន្ត្រីយោធា និងរកឃើញម្សៅសារធាតុផ្សំគ្រឿងញៀន១.៥០០ក្រាម ជាវត្ថុតាង ជននេះបានសារភាពថា សារធាតុផ្សំគ្រឿងញៀននេះ គឺមានគេផ្ញើមកពីប្រទេសឥណ្ឌា តាមរយៈក្រុមហ៊ុនទទួលបញ្ជីឈ្មោះហ្វេដិច ពេលខ្លួនទទួលបានហើយនឹងប្រគល់ទៅឱ្យមនុស្ស២នាក់ទៀតជាជនជាតិយួន ដើម្បីយកទៅលក់បន្តនៅប្រទេសវៀតណាម។ បន្ទាប់ពីមានចំលើយថា មានយួន២នាក់ចាំទទួលយកគ្រឿងញៀននោះ សមត្ថកិច្ចបានបន្តស្រាវជ្រាវ និងឈានទៅឃាត់ខ្លួន ជនជាតិយួន២នាក់នោះទៀត និងបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ។ បន្ទាប់មកលោកព្រះរាជអាជ្ញាបានធ្វើការចោទប្រកាន់ពួកគេពីបទជួញដូរគ្រឿងញៀនឆ្លង ដែន ទើបខាងចៅក្រមសើុបសួរសំរេចឃុំខ្លួនពួកគេដាក់ពន្ធនាគារជាបណ្តោះអាសន្ន ៕
ប៊ុនណាក់+ជលធា