ខេត្តពោធិ៍សាត់ ៖ ស្ត្រីម្នាក់បានរងគ្រោះដោយចូលក្បាលក្នុងម៉ាស៊ីនបោកស្រូវ បណ្តាលឱ្យស្លាប់ភ្លាមៗមួយរំពេច ខណៈពេលខ្ចីម៉ាស៊ីនបោកស្រូវរបស់ដន្លងទៅបោកស្រូវ កាលពីថ្ងៃទី៣០ ធ្នូ ២០១០ វេលាម៉ោង៨និង៥០នាទីព្រឹក នៅភូមិសាមគ្គី ឃុំស្នាមព្រះ ស្រុកបាកាន ។ លោកអនុសេនីយ៍ទោហាន សុភ័ណ្ឌ នាយប៉ុស្តិ៍នគរបាលស្នាមព្រះឱ្យដឹងថា ស្ត្រីរងគ្រោះឈ្មោះពិន ផល្លី អាយុ៥០ឆ្នាំ មានទីលំនៅក្នុងភូមិ-ឃុំខាងលើ ។ បើតាមការសាកសួរព័ត៌មានពីក្រុមគ្រួសារគឺនៅថ្ងៃនោះ ស្ត្រីរងគ្រោះបានខ្ចីម៉ាស៊ីនបោកស្រូវរបស់ដន្លងយកទៅបោកស្រូវនៅផ្ទះរបស់ខ្លួន ។
ម៉ាស៊ីនបោកស្រូវបានដំណើរការតាំងពីម៉ោង៧ព្រឹក រហូតដល់ម៉ោង៨,៥០នាទីព្រឹកគឺជិតចប់ទៅហើយ តែដោយឃើញស្រូវធ្លាក់រប៉ាត់រប៉ាយខ្ទាតចេញពីកំរាលតង់ច្រើនពេក ស្ត្រីរងគ្រោះបានយកតង់មួយទៀតទៅក្រាលបន្ថែម ។ ខណៈពេលស្ត្រីរងគ្រោះកំពុងឱនក្បាលពិនិត្យមើលសកម្មភាពស្រាប់តែធ្លាក់ជាយក្រមារមូរចូល ក្នុងម៉ាស៊ីនទាញចូលទាំងក្បាលកិនបាក់កស្លាប់តែម្តង ។ លោកនាយប៉ុស្តិ៍ឱ្យដឹងទៀតថា ពេលម៉ាស៊ីនស្រូបចូលភ្លាមៗនោះ ពុំមានអ្នកណាឃើញទេ លុះពេលម៉ាស៊ីនរលត់ ទើបនាំគ្នាទៅមើលស្រាប់តែឃើញមនុស្សស្លាប់ជាប់ក្នុងម៉ាស៊ីននោះបាត់ទៅហើយ ៕