ខេត្តកំពង់ស្ពឺ ៖ អាសំបូរ ដែលក្លាយជាឃាតក និងបង្កការភ័យខ្លាចដល់ប្រជាពលរដ្ឋក្នុងភូមិមន ឃុំធម្មតាអរ អាចនឹងត្រូវចាប់បញ្ជូនទៅដាក់នៅសួនសត្វភ្នំតាម៉ៅនាចុងសប្តាហ៍នេះ ដើម្បីធ្វើការអប់រំ និងផ្សាំងវាឱ្យស្លូតបូតសុភាពរាបសា ។ ប្រធានសួនសត្វភ្នំតាម៉ៅ លោកញឹក រតនៈ ពេជ្រ បានប្រាប់កោះសន្តិភាពតាមទូរស័ព្ទនៅរសៀលថ្ងៃពុធ ទី២២ ធ្នូ ២០១០ ថា មកដល់ពេលនេះឃាតករឈ្មោះអាសំបូរ នៅតែមានចរិតកាចសាហាវដដែល វាមិនទាន់ផ្លាស់ប្តូរពីកោងកាចមកទន់ភ្លន់សុភាពរាបសានៅឡើយទេ បើទោះបីជាមន្ត្រីជំនាញខិតខំអប់រំវាយ៉ាងណាក៏ដោយ ហើយវាកំពុងចុះប្រេងយ៉ាងច្រើន ។ លោកញឹក រតនៈពេជ្រ បន្តថា នៅពេលនេះទ្រុងសំរាប់ដាក់អាសំបូរនោះ បានរៀបចំជិតរួចរាល់ហើយ ហើយនៅពេលដែលទ្រុងធ្វើហើយ នឹងដឹកអាសំបូរ បញ្ជូនទៅសួនសត្វភ្នំតាម៉ៅភ្លាមៗ ដែលយ៉ាងហោចណាស់ក៏ចុងសប្តាហ៍នេះដែរ ។
គួរបញ្ជាក់ថា អាសំបូរ ត្រូវបានក្រុមជំនាញសត្វព្រៃចាប់ដាក់ច្រវាក់ ដើម្បីអប់រំ និងផ្សាំងវាកាលពីថ្ងៃទី១៥ ធ្នូ កន្លងមកនេះ ក្រោយពេលដែលវាបានសំលាប់មនុស្សម្នាក់កាលពីរសៀលថ្ងៃសៅរ៍ ទី៤ ធ្នូ នៅចំណុចជ្រោះបាក់ ស្ថិតក្នុងភូមិមន ឃុំធម្មតាអរ ស្រុកសំរោងទង ខេត្តកំពង់ស្ពឺ និងធ្វើឱ្យប្រជាសហគមន៍មានការភ័យខ្លាចចំពោះវាយ៉ាងខ្លាំង ។ បុរសដែលត្រូវអាសំបូរ ជាន់សំលាប់នោះឈ្មោះសែ ណុល អាយុ៥៤ឆ្នាំ មានទីលំនៅក្នុងភូមិ-ឃុំកន្លែងកើតហេតុខាងលើ ។ ហេតុការណ៍ដ៏កម្រជួបប្រទះ និងគួរឱ្យសោកស្តាយនេះបានកើតឡើង ខណៈពេលជនរងគ្រោះ និងម្ចាស់របស់វាដែលពិការជើងម្ខាង កំពុងស្រាយច្រវាក់ចេញពី.កដំរី ស្រាប់តែដំរីនោះបានបុះជនរងគ្រោះឱ្យដួល រួចជាន់ពីលើរហូតដល់ស្លាប់នៅ នឹងកន្លែង ៕