ខេត្តឧត្តរមានជ័យ ៖ ២នាក់ឪពុក និងកូន បានជួបគ្រោះអកុសលដោយរថយន្តបុកបណ្តាលឱ្យកូនឈ្មោះអែម បញ្ញា ភេទប្រុស អាយុ៥ឆ្នាំ របួសកជើងខាងឆ្វេង បែកក្បាលផ្នែកខាងក្រោយស្លាប់នៅនឹងកន្លែង ចំណែកឪពុកឈ្មោះអែម ដន អាយុ៣៧ឆ្នាំ ជាទាហានអង្គភាព៤១១ ក្នុងកងពលលេខ៤១រងរបួសបាក់ភ្លៅខាងឆ្វេង ។ ជនរងគ្រោះ២នាក់ឪពុកកូននេះជិះម៉ូតូម៉ាកសេ១០០ ស៊េរីឆ្នាំ២០០២ ពណ៌ ក្រហម គ្មានស្លាកលេខ និងរស់នៅភូមិគោកត្នោត ឃុំកណ្តែក ស្រុកប្រាសាទបាគង ខេត្តសៀមរាប ។ រីឯរថយន្តដែលបុកនោះម៉ាកកាមរីឆ្លាមស៊េរី២០០៧ ពាក់ស្លាកលេខភ្នំពេញ 2N 0341 ដែលអ្នកបើកបរគឺលោកវរសេនីយ៍ត្រីសឿម ឆ្នើក មេបញ្ជាការរងកងវរៈលេខ៩០៥ ប៉ូលិសការពារព្រំដែនគោកខ្មែរ-សៀម ។
ហេតុការណ៍នេះកើតឡើងនៅតាមបណ្តោយផ្លូវជាតិលេខ៦៩B ស្ថិតនៅក្នុងភូមិទួលស្វាយ ឃុំត្រពាំងតាវ ស្រុកអន្លង់វែង កាលពីវេលាម៉ោង៧ និង៥០នាទីយប់ថ្ងៃទី២៦ ធ្នូ កន្លងទៅនេះ ។ សាក្សីនៅកន្លែងកើតហេតុឱ្យកោះសន្តិភាពដឹងថា ជនរងគ្រោះពីរនាក់ឪពុក និងកូនជិះម៉ូតូពីកើតទៅទិសខាងលិច គឺ សំដៅទៅបន្ទាយរបស់ខ្លួន ។ លុះពេលទៅដល់ទល់មុខទីបញ្ជាការលេខ៩០៥ ស្រាប់តែរថយន្តម៉ាកកាមរីឆ្លាមដែលបើកបរក្នុងល្បឿនលឿន ហើយបត់ចូលទៅក្នុងទីបញ្ជាការរបស់ខ្លួនដោយបញ្ច្រាសទិសគ្នា ក៏បុកម៉ូតូជនរងគ្រោះយ៉ាងពេញទំហឹង ។ សាក្សីដដែលបញ្ជាក់ថា ក្រោយកើតហេតុប៉ូលិសចរាចរបានទៅវាស់វែង និងនាំអ្នករងរបួសជាឪពុកទៅសង្គ្រោះនៅមន្ទីរពេទ្យខេត្តសៀមរាប រីឯរថយន្តម៉ាកកាមរីឆ្លាម និងម៉ូតូត្រូវប៉ូលិសចរាចរស្រុកអន្លង់វែងយកទៅរក្សាទុករង់ចាំដោះស្រាយ ៕