ខេត្តព្រះសីហនុ ៖ ជនជាប់ចោទជាមេភ្នាល់បាល់ឈ្មោះស៊ុន សុផល ភេទប្រុស អាយុ៣២ឆ្នាំ មានទីលំនៅក្រុម៦៨ ភូមិ៥ សង្កាត់លេខ៤ ក្រុងព្រះសីហនុ និងម្ចាស់ផ្ទះផ្តល់ទីកន្លែងឱ្យបើកលេងល្បែងភ្នាល់បាល់ឈ្មោះគឹម រ័ត្នធី ហៅទ្រី ភេទប្រុស អាយុ៣៥ឆ្នាំ មានទីលំនៅក្រុមទី២១ ភូមិ១ សង្កាត់លេខ២ ក្រុងព្រះសីហនុ បានត្រូវកំលាំងកងរាជអាវុធហត្ថ ដឹកនាំដោយលោកអនុសេនីយ៍ឯកហ៊ត សីហា មេបញ្ជាការកងរាជអាវុធហត្ថក្រុងព្រះសីហនុ រួមសហការជាមួយមន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចខេត្ត ដឹកនាំដោយលោកថៃ សិរីរ័ត្ន បានធ្វើការឃាត់ខ្លួន ។
លោកអនុសេនីយ៍ឯកវ៉ា ចាន់ថន នាយការិយាល័យស្រាវជ្រាវបទល្មើសព្រហ្មទណ្ឌនៃទីបញ្ជាការកងរាជអាវុធហត្ថខេត្តបានឱ្យដឹងថា បន្ទាប់ពីទទួលបានបទបញ្ជាពីលោកព្រះរាជអាជ្ញាសាលាដំបូងខេត្ត កំលាំងកងរាជអាវុធហត្ថក្រុងនិងខេត្តរួមជាមួយមន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច បានចុះបង្ក្រាបកន្លែងភ្នាល់បាល់មួយកន្លែងស្ថិតនៅក្រុមទី២១ ភូមិ១ សង្កាត់លេខ២ ក្រុងព្រះសីហនុ នៅវេលាម៉ោង៥និង៣០នាទីថ្ងៃទី២៨ ធ្នូ ២០១០ ។ នៅក្នុងការចុះបង្ក្រាបនេះ សមត្ថកិច្ចបានឃាត់ខ្លួនមនុស្សចំនួន២នាក់រួមជាមួយវិក្កយបត្រភ្នាល់បាល់ចំនួន៥ដុំ តារាងផ្គូផ្គងបាល់ចំនួន៩៩សន្លឹក ម៉ាស៊ីនថតចម្លងចំនួន១គ្រឿង ទូរស័ព្ទលើតុចំនួន៨គ្រឿង ប្រាក់ចំនួន១.៤៦៨ដុល្លារ និង៣.៨៤៤.០០០រៀល ។ បន្ទាប់ពីសមត្ថកិច្ចកងរាជអាវុធហត្ថធ្វើការសាកសួរ ជនទាំង២នាក់បានសារភាពថា ពួកគេពិតជាបានប្រកបរបររកស៊ីភ្នាល់បាល់ប្រាកដមែន ។ លោកវ៉ា ចាន់ថន បានបន្តទៀតថា បន្ទាប់ពីបានធ្វើការសាកសួរអស់រយៈពេល៥ម៉ោង ជនទាំង២នាក់រួមនឹងវត្ថុតាងត្រូវបានបញ្ជូនទៅកាន់សាលាដំបូងខេត្តដើម្បីផ្តន្ទាទោសតាមផ្លូវ ច្បាប់ ៕
