រាជធានីភ្នំពេញ ៖ ដោយមើលឃើញស្នាដៃស្ថាបត្យកម្មសម័យបច្ចុប្បន្ន កាន់តែមានភាពរីកចំរើននោះ មជ្ឈមណ្ឌលម៉ាក្សរៀល បានរៀបចំពិធីតាំងពិព័រណ៍បង្ហាញស្នាដៃស្ថាបត្យកម្មរបស់និស្សិត មកពីបណ្តាសាកលវិទ្យាល័យជាច្រើននៅក្នុងរាជធានីភ្នំពេញ។ ពិធីនោះរៀបចំធ្វើឡើងរយៈពេល៧ថ្ងៃ គឺចាប់ពីថ្ងៃទី១៨ ដល់ថ្ងៃទី២៥ ធ្នូ នៅមជ្ឈមណ្ឌលម៉ាក្សរៀល ស្ថិតនៅតាមផ្លូវលេខ១១៨ ផ្ទះលេខ៩៥ ជិតសាកលវិទ្យាល័យន័រតុន។ លោកហេង សំអាត អ្នកគ្រប់គ្រងទូទៅមជ្ឈមណ្ឌលម៉ាក្សរៀលថ្លែងថា និស្សិតដែលចូលរួមតាំងពិព័រណ៍បង្ហាញស្នាដៃនេះមកពីបណ្តាសាកលវិទ្យាល័យជាច្រើនដូចជាសាកល វិទ្យាល័យន័រតុន សាកលវិទ្យាល័យស៊ីតិច សាកលវិទ្យាល័យភូមិន្ទ វិចិត្រសិល្បៈ និងសាកលវិទ្យាល័យបញ្ញាសាស្ត្រ។ សំភារដែលយកមកតាំងពិព័រណ៍នេះមានផ្ទះវីឡា ផ្ទះល្វែង ហាងលក់ទំនិញ ផ្ទះខ្មែរ ខុនដូ ផ្សារទំនើប អាផាតមិន សណ្ឋាគារ និងក្លឹបកំសាន្តជាដើម។
លោកហេង សំអាត បញ្ជាក់ថា ខ្មែរយើងពីដើមឱ្យតែធ្វើផ្ទះហើយចូលនៅតែម្តង តែខ្មែរសម័យថ្មីនេះមុននឹងធ្វើផ្ទះគេត្រូវសិក្សាអំពីប្លង់គោល ប្លង់ស្ថាបត្យកម្មជាមុនសិន ដើម្បីឱ្យដឹងថា តើផ្ទះរបស់គេបែរមុខទៅទិសខាងណា សួនច្បារដាក់នៅកន្លែងណា អាងហែលទឹកដាក់នៅកន្លែងណា និងរចនាម៉ូដតាមបែបខ្មែរ ឬអឺរ៉ុប និងត្រូវតុបតែងផ្ទះបែបណា។ ដូច្នេះហើយទើបស្នាដៃស្ថាបត្យកម្មត្រូវបានគេឱ្យតំលៃខ្លាំងណាស់នាពេលបច្ចុប្បន្ននេះ។ ដោយឃើញស្នាដៃស្ថាបត្យកម្មកាន់តែមានតំលៃនោះ ទើបមជ្ឈមណ្ឌលម៉ាក្សរៀលរៀបចំតាំងពិព័រណ៍នេះឡើងដើម្បីផ្តល់ឱកាសឱ្យនិស្សិតផ្នែកស្ថាបត្យកម ្មបានបញ្ចេញស្នាដៃរបស់ខ្លួន។
លោកហេង សំអាត បញ្ជាក់ថា មជ្ឈមណ្ឌលម៉ាក្សរៀល គឺជាមជ្ឈមណ្ឌលមួយដែលផ្តល់សេវាកម្មសិក្សាអំពីប្លង់ស្ថាបត្យកម្ម តុបតែងខាងក្នុង និងខាងក្រៅអគារដូចជាសួនច្បារ ដំឡើងរូបសំណាក សិក្សាប្លង់គោល បង្រៀនកម្មវិធីរចនាម៉ូដផ្ទះ អគារ ស្លាកយីហោ ខិត្តប័ណ្ណ និងនាំចូលសំភារធ្វើម៉ាកែត។ ទស្សនិកជនទាំងឡាយដែលបានចូលទស្សនាការតាំងពិព័រណ៍នេះនឹងទទួលបានវគ្គសិក្សាកុំព្យូ ទ័រ និងកម្មវិធីរចនាម៉ូដដោយឥតគិតថ្លៃ និងមានការបញ្ចុះតំលៃលើវគ្គសិក្សាផ្សេងៗទៀត រួមទាំងសំភារសំរាប់ធ្វើម៉ាកែតផងដែរ។ ពិព័រណ៍នេះបើកចាប់ពីម៉ោង៧ព្រឹក ដល់ម៉ោង៧យប់៕