ខេត្តកំពង់ឆ្នាំង ៖ ស្ត្រីរងគ្រោះម្នាក់ត្រូវក្រុមគ្រួសារដឹកមកសង្គ្រោះនៅមន្ទីរពេទ្យខេត្ត កាលពីវេលាម៉ោង៤រសៀល ថ្ងៃទី២៦ ធ្នូ បន្ទាប់ពីរូបគាត់ត្រូវសត្វពស់ចឹក ខណៈដែលកំពុងដកសន្ទូងស្រូវប្រាំងនៅចំណុចពាមញ ជាប់មាត់ទន្លេ ។ ស្ត្រីរងគ្រោះឈ្មោះជិន ខុន អាយុ៥៥ឆ្នាំ រស់នៅភូមិត្រពាំងអញ្ចេញ ឃុំស្វាយជ្រុំ ស្រុករលាប្អៀរ ។ ស្ត្រីរងគ្រោះបានរៀបរាប់ថា នៅវេលាម៉ោងប្រហែល៣រសៀល រូបគាត់បានចុះទៅស្រែ ដើម្បីដកសំណាបជាមួយអ្នកភូមិជាច្រើននាក់ទៀត ។ ពេលកំពុងដកសំណាបស្រូវប្រាំងនោះ គាត់ពុំបានឃើញពស់ទេ ស្រាប់តែពស់នោះបានចឹកចំខ្នងដៃឆ្វេងរបស់គាត់ជាប់ គាត់ខំរលាស់ទំរាំដាច់ចេញ ហើយក៏មានអ្នកដកសំណាបជាមួយព្រួតគ្នាវ៉ៃពស់នោះរហូតដល់ងាប់តែម្តង ។ ពស់នោះពណ៌ស្លឹកឈើចាស់ ផ្នែកកន្ទុយខាងក្រោយពណ៌ក្រហម មានទំហំប៉ុនមេជើងមនុស្សចាស់ ដែលអ្នកស្រុកស្គាល់ថា ជាពស់ហនុម៉ាន ។
ក្រោយពេលពស់ចឹកភ្លាមដៃគាត់ចាប់ផ្តើមពើត និងហើមយ៉ាងលឿន ហើយត្រូវក្រុមគ្រួសារដឹកមកមន្ទីរពេទ្យចាក់ថ្នាំសង្គ្រោះភ្លាមៗដែរ ។ ស្ត្រីរងគ្រោះបញ្ជាក់ថា មានគេប្រាប់ថា គ្រូខ្មែរនេះ ឬនោះពូកែ តែគាត់មិនជឿឡើយ ក្នុងភូមិគាត់ធ្លាប់ពស់ចឹកច្រើនគ្នាហើយព្យាបាលជាសះស្បើយ តែនឹងគ្រូពេទ្យខេត្ត ។ ក្រុមគ្រូពេទ្យប្រាប់ថា បញ្ហាពស់ចឹកសព្វថ្ងៃ ប្រជាពលរដ្ឋភ្ញាក់រលឹកមកព្យាបាលនៅមន្ទីរពេទ្យទាន់ពេលវេលាមិនបណ្តោយឱ្យជ្រុលដូចមុ នៗឡើយ ដែលរហូតត្រូវដាច់ដៃ កាត់ជើង ព្រោះហើមរលួយ ខ្លះដល់ជីវិតក៏មាន ព្រោះតេតាណូសរបស់ចង្កូមពស់ ៕