រាជធានីភ្នំពេញ ៖ នៅទីស្នាក់ការកណ្តាលកាកបាទក្រហមកម្ពុជាកាលពីថ្ងៃទី២០ ធ្នូ មានរៀបចំបើកសិក្ខាសាលាស្តីពីការកសាងផែនការអភិវឌ្ឍន៍៍កាកបាទក្រហមកម្ពុជាឆ្នាំ២០១១-២០១៤ ក្រោមអធិបតីភាពលោកជំទាវម៉ែន នារីសោភ័គ អគ្គលេខាធិការរងកាកបាទក្រហមកម្ពុជា លោកជំទាវឃួន សុដារី សមាជិកាគណៈកម្មាធិការកណ្តាលកាកបាទក្រហមកម្ពុជា និងលោកនីកូឡាស អូលីវីយេ ប្រតិភូគណៈកម្មាធិការអន្តរជាតិកាកបាទក្រហមប្រចាំនៅកម្ពុជា។ លោកជំទាវម៉ែន នារីសោភ័គ បានថ្លែងថា សិក្ខាសាលានេះគឺធ្វើឡើងដើម្បីពិភាក្សាពិគ្រោះយោបល់លើការងារកសាងផែនការអភិវឌ្ឍន៍កាកបាទ ក្រហមកម្ពុជាឆ្នាំ២០១១-២០១៤ ខាងមុខនេះ និងពិភាក្សាផ្តោតលើរបៀបវារៈមួយចំនួនដូចជា បច្ចុប្បន្នភាព សកម្មភាពអភិវឌ្ឍន៍សាខា ផ្ទៀងផ្ទាត់ផែនការសាខានីមួយៗ ការកំណត់ទិសដៅ និងការប្រមូលផ្តុំទិសដៅដើម្បីចងក្រង។ សិក្ខាសាលាដែលត្រូវប្រារព្ធធ្វើរយៈពេលពីរថ្ងៃកន្លះនឹងប្រារព្ធពិធីបិទ ក្រោមអធិបតីភាពលោកជំទាវបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ។
លោកជំទាវឃួន សុដារី បានថ្លែងថា ឆ្នាំ២០១០ គឺជាឆ្នាំចុងក្រោយ ដែលកាកបាទក្រហមកម្ពុជា អនុវត្តយុទ្ធសាស្ត្រ២០០៣-២០១០ ហើយមហាសន្និបាទកាកបាទក្រហមកម្ពុជាអាណត្តិទី៥ បានអនុម័តជាផ្លូវការនូវយុទ្ធសាស្ត្រ២០១១-២០២០ ដែលជាត្រីវិស័យមួយដ៏សំខាន់ក្នុងការកសាងផែនការអភិវឌ្ឍន៍នាថ្ងៃនេះ ហើយដែលយុទ្ធសាស្ត្រនេះ បានកសាងដោយផ្អែកលើបរិបទសាកល និងបរិបទជាតិហើយក៏បានបន្ស៊ីទិសយុទ្ធសាស្ត្ររបស់ខ្លួនទៅនឹងផែនការអភិវឌ្ឍន៍ជាតិបច្ចុប្ បន្នកម្ម២០០៩-២០១៣ របស់រាជរដ្ឋាភិបាលកម្ពុជាដែរ ។
ក្នុងគោលបំណងអនុវត្តយុទ្ធសាស្ត្រ២០១១-២០២០ ប្រកបដោយជោគជ័យ កាកបាទក្រហមកម្ពុជាត្រូវមានផែនការអភិវឌ្ឍន៍ទៅតាមដំណាក់កាល ដែលឆ្លុះបញ្ចាំងឱ្យឃើញពីទិសដៅរបស់ស្ថាប័នទាំងមូល និងបណ្តុះគំនិតឱ្យសាខា អនុសាខា ពិចារណាលើបញ្ហាជាអាទិភាព ដែលកំពុងកើតមានក្នុងដែនរដ្ឋបាលរបស់ខ្លួន ហើយក្នុងនាមជាជំនួយការឱ្យអាជ្ញាធរមូលដ្ឋានតើអាចធ្វើអ្វីបានខ្លះ ដើម្បីដោះស្រាយភាពងាយរងគ្រោះទាំងនោះដោយផ្តោតទៅលើវិស័យស្នួល៤គឺ ១-ការបន្តលើកកំពស់ការងារគ្រប់គ្រងគ្រោះមហន្តរាយ, ២-ការបន្តលើកកំពស់សុខភាពនិងការថែទាំសុខភាពក្នុងសហគមន៍, ៣-ការបន្តលើកកំពស់គោលការណ៍គ្រឹះនៃតម្លៃមនុស្សធម៌, ៤-ការលើកកំពស់ការងារអភិវឌ្ឍន៍ស្ថាប័ន និងអភិវឌ្ឍន៍ធនធានមនុស្ស ដែលក្នុងនោះត្រូវផ្តោតលើការអភិវឌ្ឍសាខា អនុសាខា និងការអភិវឌ្ឍធនធានតាមទិសវិមជ្ឈការ ដែលជាកំលាំងដ៏រឹងមាំ ដើម្បីផ្តល់សេវាកម្មមនុស្សធម៌នៅមូលដ្ឋានបានទាន់ពេលវេលា និងមានប្រសិទ្ធភាព ៕