ក្រុងប៉ោយប៉ែត ៖ គ្រាប់ដេកា៨២មួយគ្រាប់ផលិតនៅអតីតសហភាពសូវៀត ត្រូវបានប្រជាពលរដ្ឋម្នាក់ប្រទះឃើញក្នុងគុម្ពស្មៅក្បែរដងផ្លូវជាតិលេខ៥ ស្ថិតក្នុងភូមិស្ទឹងបត់ សង្កាត់ប៉ោយប៉ែត កាលពីវេលាម៉ោង៧ព្រឹក ថ្ងៃទី២៥ ធ្នូ ខណៈកំពុងដើររកមាន់មួយក្បាល ។ តាមការឱ្យដឹងពីអ្នកដើររកមាន់ហើយប្រទះឃើញគ្រាប់នេះបានប្រាប់ថា មុនពេលប្រទះឃើញគ្រាប់នេះ គឺខ្លួនបានដើររកមាន់ដែលរួច ។ ពេលប្រទះឃើញក៏បានរាយការណ៍ទៅកំលាំងប៉ូលិសនៃអធិការដ្ឋានក្រុង ហើយមួយសន្ទុះក្រោយមកលោកអធិការនគរបាលក្រុងប៉ោយប៉ែត ក៏បានបញ្ជាឱ្យកំលាំងជំនាញខាងអាវុធយុទ្ធភណ្ឌមិនទាន់ផ្ទុះចុះមកពិនិត្យភ្លាមៗផង ដែរ ។
តាមការឱ្យដឹងពីលោកស្វាយ ម៉ិ នាយផ្នែកស្ថិតិអត្តសញ្ញាណប័ណ្ណ និងជានាយផ្នែកគ្រប់គ្រងខាងអាវុធយុទ្ធភណ្ឌមិនទាន់ផ្ទុះក្រុងប៉ោយប៉ែត បានប្រាប់ថា គ្រាប់នេះជាគ្រាប់ដេកា៨២ ផលិតនៅអតីតសហភាពសូវៀត ហើយតាមភិនភាគគ្រាប់នេះ គឺជាគ្រាប់ដែលបន្សល់ទុកមកតាំងពីសម័យសង្គ្រាម ។ លោកនាយផ្នែករូបនេះបន្តថា គ្រាប់នេះនឹងប្រគល់ឱ្យអង្គការ CMAC ចុះមកកំទេចចោលនៅ ថ្ងៃចន្ទ ទី២៧ ធ្នូ នេះ ។ លោកនាយផ្នែកបានប្រាប់ថា លោកនឹងឱ្យជំនាញទៅដាក់ខ្សែចងជារង្វង់ហាមឃាត់និងដាក់តំរុយធ្វើជាសញ្ញាឱ្យប្រជាពលរដ្ឋ មានការប្រុងប្រយ័ត្នកុំឱ្យប៉ះពាល់ ។
លោកអធិការនគរបាលក្រុងបានមានប្រសាសន៍ថា លោកមានការត្រេកអរពេលដែលប្រជាពលរដ្ឋបានផ្តល់ព័ត៌មានខាងលើនេះដល់កំលាំងរបស់លោកបាន ទាន់ពេលវេលា ។ លោកក៏បានអំពាវនាវផងដែរ សុំឱ្យប្រជាពលរដ្ឋគ្រប់រូប បើឃើញគ្រាប់មិនទាន់ផ្ទុះបែបនេះ សូមរាយការណ៍ដល់សមត្ថកិច្ច និងកុំប៉ះពាល់ឱ្យសោះ ព្រោះអាចមានគ្រោះថ្នាក់ដល់អាយុជីវិត ៕