ខេត្តកំពត ៖ នៅក្នុងខេត្តកំពត កន្លងមកនេះមានមនុស្សត្រូវឪម៉ាល់ទិចសំលាប់អស់ចំនួន៣នាក់ រួចមកហើយ ដោយរាប់ទាំងក្មេងប្រុសម្នាក់ផង នៅក្នុងភូមិជុំក្រៀល ឃុំជុំក្រៀល ស្រុកទឹកឈូ។ ប៉ុន្តែអ្វីដែលគេមានការព្រួយបារម្ភខ្លាចបាត់បង់ជីវិតមនុស្ស បន្តទៀតនោះគឺ សំបុកឪម៉ាល់ដ៏ធំមួយនៅលើដើមដូងជាប់នឹងផ្លូវជាតិលេខ៣ ត្រង់ចំណុចចេញពីរង្វង់មូលខេត្តឆ្ពោះទៅរាជធានីភ្នំពេញ ដែលអ្នកធ្វើដំណើរតាមដងផ្លូវជាតិតែងតែក្រឡេកមើលសំបុក ឪម៉ាល់ នេះដែលគេបានឃើញមេរបស់វាហើរចេញព្រោងព្រាត ។
ស្ត្រីម្នាក់ជាអ្នកលក់នំនៅជាប់នឹងកន្លែង លាងរថយន្ត មិនឆ្ងាយប៉ុន្មានពីកន្លែងសំបុកឪម៉ាល់នេះនិយាយថា ម្ចាស់រថយន្តជាច្រើននាក់បន្ទាប់ពីបានបើករថយន្តឱ្យកម្មករលាង ហើយតែងតែនាំគ្នាឈរមើលសំបុកឪម៉ាល់នេះ ហើយពួកគាត់និយាយថា អ្នកធ្វើដំណើរអាចនឹងមានគ្រោះថ្នាក់ពេលណាធាងដូងជ្រុះមកដី ហើយសំបុកឪម៉ាល់ក៏អាចធ្លាក់មកជាមួយ។ តាមការប៉ាន់ស្មាន ដើមដូងដែលឪម៉ាល់ធ្វើសំបុកមានកំពស់ប្រហែលជា១០ម៉ែត្រ ។ ការភ័យខ្លាចធាងដូងងាប់ធ្លាក់ដោយមកជាមួយសំបុកឪម៉ាល់ នេះមិនមែនចេះតែខ្លាចទេ ព្រោះកន្លងមកធ្លាប់មានបញ្ហាដែលក្មេងប្រុសម្នាក់នៅភូមិជុំ ក្រៀល ត្រូវឪម៉ាល់ទិចបណ្តាលឱ្យស្លាប់ ខណៈពេលដែលឪម៉ាល់ជ្រុះសំបុកពីលើដើមត្នោតធ្លាក់មកដី។
ទាក់ទិននឹងសំបុកឪម៉ាល់មានប្រវែងប្រហែលមួយ ម៉ែត្រនេះ លោកវរសេនីយ៍ត្រី ងឹម វ៉េត អធិការនគរបាលក្រុងកំពតមានប្រសាសន៍ថា ប្រជាពលរដ្ឋនៅក្រុងកំពតមិនដែលស្លាប់ដោយសារឪម៉ាល់នោះទេ កុំឱ្យតែមានមនុស្សទៅបុករុកវាគឺមិនមានបញ្ហាអ្វីកើតឡើងឡើយ ។ ទោះជាយ៉ាងណាក៏ដោយ បើគ្មានការបំផ្លាញចោលដោយវិធីណាមួយទេ ពេលដែលមានខ្យល់ខ្លាំងធ្វើឱ្យដាច់សំបុកធ្លាក់មកលើដងផ្លូវ ហើយមានមនុស្សធ្វើដំណើរឆ្លងកាត់នោះ តើមនុស្សប៉ុន្មាននាក់នឹងរងគ្រោះ ព្រោះសំបុកនេះធំណាស់៕
http://kohsantepheapdaily.com.kh/art...26-013014.html