រាជធានីភ្នំពេញ ៖ រថយន្តដឹកដី១គ្រឿងបានក្រឡាប់ដេកផ្អៀងខ្លួនចាក់ដីចោលទាំងអស់ ប៉ុន្តែមិនបណ្តាលឱ្យអ្នកបើកបររងរបួស ឬក៏ធ្វើឱ្យប៉ះពាល់ដល់អ្នកដំណើរតាមដងផ្លូវទេ ព្រោះពេលនោះគ្មានម៉ូតូ ឬរថយន្តបើកបរឆ្លងកាត់។ ហេតុការណ៍នោះកើតឡើងកាលពីវេលាម៉ោង៧ព្រឹក ថ្ងៃទី៣១ ខែធ្នូ ឆ្នាំ២០១០ នៅលើកំណាត់ផ្លូវអូដឹមកប់ស្រូវ ភូមិចែងម៉ែង សង្កាត់សំរោងក្រោម ខណ្ឌដង្កោ រាជធានីភ្នំពេញ។ រថយន្តម៉ាកហ៊ីណូ ពណ៌ស ពាក់ស្លាកលេខភ្នំពេញ៣A៣២៥៤ បើកបរដោយបុរសមិនស្គាល់ឈ្មោះនោះថា ដឹកដីចេញពីរណ្តៅមួយនៅម្តុំវត្តស្រះស្រង់ ភូមិព្រៃក្រាយ សង្កាត់ស្នោ ខណ្ឌដង្កោ រាជធានីភ្នំពេញ។ អ្នកឃើញហេតុការណ៍ម្នាក់ឱ្យដឹងថា គាត់ឃើញរថយន្តដឹកដីនោះបើកក្នុងល្បឿនលឿនគួរសម ហើយស្រាប់តែរេចង្កូតចុះឡើងៗម្តងឆ្វេង ម្តងស្តាំរួចក្រឡាប់ដេកចំហៀងខ្លួនលើផ្លូវតែម្តង។
ប្រភពដដែលបន្តថា ខណៈនោះមិនមានម៉ូតូ ឬរថយន្តបើកឆ្លងកាត់ទេ។ ភ្លាមនោះគាត់នឹកស្មានថា អ្នកបើកបរស្លាប់បាត់ទៅហើយ ប៉ុន្តែបន្តិចក្រោយមកស្រាប់តែឃើញគេលូនចេញមកក្រៅមិនរងរបួសធ្ងន់ឡើយ។ អ្នកបើកបររថយន្តប្រាប់ប៉ូលិសថា ការក្រឡាប់នោះពុំដឹងបណ្តាលមកពីមូលហេតុអ្វីឡើយ។ នៅមុនពេលកើតហេតុពេលរថយន្តកំពុងលឿនរូបគេបានអើតមើលកង់រថយន្តតាមកញ្ចក់ទ្វារ ហើយស្រាប់តែរេចង្កូតចុះឡើងបណ្តាលឱ្យក្រឡាប់តែម្តង។ ប៉ូលិសនិយាយថា រថយន្តនោះក្រឡាប់ដោយខ្លួនឯងមិនបង្កឱ្យមានគ្រោះថ្នាក់ដល់អ្នកដទៃឡើយ។ ក្រោយពេលកើតហេតុម្ចាស់រថយន្តបានកាយដីដែលនៅសេសសល់ក្នុងរថយន្តចេញ បន្ទាប់មកនាំយករថយន្តទៅជួសជុល ។ ចំណែកប៉ូលិសគ្រាន់តែទៅជួយសំរួលចរាចរណ៍ដើម្បីកុំឱ្យកកស្ទះប៉ុណ្ណោះ៕