ខេត្តកំពង់ស្ពឺ ៖ នៅសាលាខេត្តកាលពីព្រឹកថ្ងៃទី ២៧ ធ្នូ មានប្រារព្ធពិធីអញ្ជើញក្រុមគ្រួសារសពដែលបានទទួលមរណភាពក្នុងឧបទ្ទវហេតុនៅលើស្ពានពេជ្រ នៃតំប់នកោះពេជ្រ កាលពីរាត្រីថ្ងៃទី២២ វិច្ឆិកា មកទទួលប្រាក់ឧបត្ថម្ភពីទីស្តីការគណៈរដ្ឋមន្ត្រី ។ ចូលរួមក្នុងពិធីនោះមានលោកស្វាយ ស៊ីថា រដ្ឋលេខាធិការទីស្តីការគណៈរដ្ឋមន្ត្រី និងជាតំណាងលោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី អមដោយក្រុមការងាររបស់ទីស្តីការគណៈរដ្ឋមន្ត្រីចំនួន៩រូប តំណាងក្រសួងសង្គមកិច្ចអតីតយុទ្ធជន និងយុវនីតិសម្បទាចំនួន២រូប លោកអភិបាលខេត្ត កង ហ៊ាង រួមទាំងអភិបាល-អភិបាលរងស្រុក មេឃុំ ចៅសង្កាត់ ព្រមទាំងគ្រួសារជនរងគ្រោះចំនួន២០គ្រួសារ បានចូលរួម ។
មានប្រសាសន៍ក្នុងឱកាសនោះលោកស្វាយ ស៊ីថា បានផ្តោតទៅលើសោកនាដកម្មនៅលើស្ពានពេជ្រ កាលពីរាត្រីថ្ងៃទី២២ វិច្ឆិកា ដែលជាថ្ងៃបញ្ចប់ពិធីបុណ្យអុំទូកប្រពៃណីជាតិខ្មែរ គឺជាសោកនាដកម្មមួយ តែពុំមែនជាអំពើភេរវកម្មណាមួយ ឬក៏ការដាច់ចរន្តអគ្គិសនីឆក់ឱ្យស្លាប់នោះទេ តែជាការភ្ញាក់ផ្អើលរត់ជាន់គ្នាថប់ដង្ហើមស្លាប់ ។ នៅខេត្តកំពង់ស្ពឺ មានក្រុមគ្រួសារចំនួន២០គ្រួសារ ដែលមានសមាជិកគ្រួសារស្លាប់នៅលើស្ពានពេជ្រ សរុបចំនួន២០នាក់ ក្នុងនោះមានស្រុកសំរោងទង ៤នាក់ ក្រុងច្បារមនចំនួន៣នាក់ ស្រុកបសេដ្ឋចំនួន៤នាក់ ស្រុកភ្នំស្រួចចំនួន៣នាក់ និងស្រុកគងពិសីចំនួន៦នាក់ ។ ចំពោះប្រាក់ជំនួយសប្បុរសជនក្នុង និងក្រៅប្រទេសជាមូលនិធិសង្គ្រោះតាមរយៈលោកឧបនាយករដ្ឋមន្ត្រី សុខ អាន ដែលប្រគល់នៅថ្ងៃនេះសំរាប់អ្នកស្លាប់ចំនួន២០នាក់ ក្នុងម្នាក់ៗទទួលបានប្រាក់ចំនួន២.១៤៥ដុល្លារ ដោយប្រគល់ជាប្រាក់ដុល្លារ ។
លោកអភិបាលខេត្ត កង ហ៊ាង បានមានប្រសាសន៍ថា កន្លងទៅ ក៏មានការឧបត្ថម្ភជាទឹកប្រាក់ និងជាសំភារពេលធ្វើបុណ្យសពដែរ ដែលក្នុងនោះមានក្រុមការងារបក្ស កាកបាទក្រហម សប្បុរសជន និងមូលនិធិនានា ហើយថ្ងៃនេះពេលទទួលប្រាក់ហើយសូមឱ្យបងប្អូនរាប់ឱ្យគ្រប់ចំនួនចៀសវាងពាក្យថា ឱ្យមិនគ្រប់ ។ តំណាងឱ្យជនរងគ្រោះទាំង២០នាក់ បានថ្លែងអំណរគុណយ៉ាងជ្រាលជ្រៅ និងសំដែងនូវការដឹងគុណខ្ពស់ចំពោះរាជរដ្ឋាភិបាលក៏ដូចជាសប្បុរសជននានា ដែលបានគិតគូរដល់ប្រជាពលរដ្ឋ ស្លាប់បាត់បង់ជីវិត ។ ពួកគាត់ចាត់ទុកថា នេះជាការគិតគូរដែលសម្តេចតេជោបានខិតខំជួយដោះស្រាយចូលរួមមរណទុក្ខដល់ប្រជាពលរដ្ឋ និងសូមឱ្យសម្តេចទទួលបានជោគជ័យក្នុងការដឹកនាំប្រទេសជាតិជានិច្ចនិរន្តរ៍ ៕