ខេត្តស្វាយរៀង ៖ មន្ត្រីសមត្ថកិច្ចក្រុងបាវិតបានឱ្យដឹងនៅព្រឹកថ្ងៃទី២៦ ធ្នូ ថា ពេលនេះការស្រាវជ្រាវជុំវិញការសម្លាប់ស្ត្រីម្នាក់ច្រកការុងនៅមិនទាន់អាចកំណត់បាន ទេ តែជាការពិតណាស់ ការប្រទះឃើញសពច្រកការុងនេះមានន័យថា ស្ត្រីរូបនេះត្រូវបានគេសម្លាប់ពីកន្លែងផ្សេង ហើយយកមកពន្លិចក្នុងស្រះទឹក ។ មន្ត្រីដដែលនិយាយថា មិនមែនតែសមត្ថកិច្ចកម្ពុជាទេ ដែលបើកការស៊ើបអង្កេត តែខាងវៀតណាមក៏បានធ្វើការស៊ើបអង្កេតដែរ ព្រោះសពស្ត្រីនេះទំនងជាជាតិវៀតណាម ហើយស្រះទឹកនេះស្ថិតក្នុងចំងាយប្រមាណ២០០ម៉ែត្រពីបន្ទាត់ព្រំដែនប៉ុណ្ណោះ ។
គួររំលឹកថា ហេតុការណ៍មួយបានធ្វើឱ្យមានការភ្ញាក់ផ្អើលពេញក្រុងបាវិត ដោយស្ត្រីម្នាក់មិនស្គាល់អត្តសញ្ញាណត្រូវគេសំលាប់ញាត់ចូលការុងទំលាក់ក្នុងទឹក មិនដឹងតាំងពីពេលណាទេ រហូតសពហើមស្អុយរលួយ ទើបក្រុមអ្នកស្ទូចត្រីប្រទះឃើញហើយប្តឹងសមត្ថកិច្ច។ ហេតុការណ៍នេះបានកើតឡើងកាលពីថ្ងៃទី២៤ ធ្នូ វេលាម៉ោង៥និង៣០នាទីល្ងាច នៅស្រះទឹកមួួយស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ។ សពស្ត្រីមិនស្គាល់អត្តសញ្ញាណម្នាក់នេះត្រូវបានជនមិនស្គាល់មុខសំលាប់ញាត់ចូលការុងពណ៌ស ចំនួនពីរជាន់ ដោយប្រើខ្សែគោ និងខ្សែលួសចងរុំសពផ្អោបនឹងដុំថ្មរួចយកមកទំលាក់ក្នុងស្រះទឹក ត្រង់ចំណុចខាងលើ ។ សពស្ត្រីរងគ្រោះមានកំពស់ប្រហែល១,៥៥ម៉ែត្រ សម្បុរស ស្លៀកខោខូវប៊យជើងខ្លី ត្រឹមជង្គង់ ពណ៌ទឹកប៊ិច ដងខ្លួនខាងលើពាក់តែអាវទ្រនាប់ពណ៌ខ្មៅ មិនមានអាវក្រៅ លាបសក់ហាយឡាយ មានអាយុប្រហែលពី២០ទៅ២៥ឆ្នាំ និងមានស្នាមជាំនៅលើសៀតផ្កាខាងស្តាំ ដែលគេសង្ស័យថា ជាស្នាមដែលត្រូវឃាតកវាយសំលាប់ ។
មន្ត្រីសមត្ថកិច្ចបានឱ្យដឹងថា សពមានសភាពហើមស្អុយរលួយទៅហើយ ដែលទំនងជាត្រូវឃាតកសំលាប់នៅកន្លែងណាមួយ និងយកមកទំលាក់ក្នុងទឹកស្រះនេះ រយៈពេល១សប្តាហ៍មកហើយ ទើបសពអណ្តែតឡើងហើយត្រូវក្រុមអ្នកស្ទូចត្រីប្រទះឃើញ ។ ហេតុការណ៍ប្រទះឃើញសពស្ត្រីគេសំលាប់ញាត់ចូលការុងទំលាក់ក្នុងទឹកស្រះនេះបានធ្វើឱ្យមានការ ភ្ញាក់ផ្អើលពេញក្រុងបាវិត ព្រោះមិនធ្លាប់ជួបប្រទះ ហើយមនុស្សម្នារាប់រយនាក់បានទៅចោមរោមមើល ប៉ុន្តែពុំមាននរណាម្នាក់ស្គាល់អត្តសញ្ញាណសពនេះឡើយ ព្រោះមានសភាពហើមស្អុយរលួយអស់ទៅហើយ ។ បើតាមការសន្និដ្ឋានក្រៅផ្លូវការជាច្រើនបាននិយាយដូចគ្នាថា សពនេះជាជនជាតិវៀតណាម ដែលចូលមកធ្វើការនៅកាស៊ីណូណាមួយក្នុងក្រុងបាវិត ឯមូលហេតុនៃការស្លាប់គឺត្រូវក្រុមឃាតករំលោភ ហើយខ្លាចជនរងគ្រោះប្តឹងក៏សំលាប់បំបិទមាត់តែម្តង ។ សពស្ត្រីរងគ្រោះត្រូវបានសមត្ថកិច្ចកប់នៅមាត់ស្រះកន្លែងប្រទះឃើញដូច្នេះបើបងប្អូនប្រជាពលរដ ្ឋណាមានបាត់សមាជិកគ្រួសារដែលមានភិនភាគដូចបានរៀបរាប់ខាងលើ សូមមកទាក់ទងជាមួយសមត្ថកិច្ចក្រុងបាវិត ៕
