រាជធានីភ្នំពេញ ៖ មន្ត្រីក្រសួងមហាផ្ទៃបានអះអាងថា ប្រព័ន្ធផ្សព្វផ្សាយនៅតែមានតួនាទីសំខាន់ក្នុងការអនុវត្តគំរោងអភិបាលកិច្ចល្អនៅកម្ពុជា ខណៈពេលប្រជាពលរដ្ឋយល់ដឹងកាន់តែច្បាស់ និងចូលរួមកាន់តែសកម្មក្នុងការលើកកំពស់អភិបាលកិច្ចល្អ។ មន្ត្រីក្រសួងមហាផ្ទៃបានថ្លែងដូច្នេះនៅក្នុងកិច្ចប្រជុំជាមួយប្រព័ន្ធផ្សព្វផ្សាយ ដែលរៀបចំដោយក្លឹបអ្នកកាសែតកម្ពុជានាព្រឹកថ្ងៃទី២០ ធ្នូ។ លោកប៊ុត ជិ ប្រធានគ្រប់គ្រងគំរោងអភិបាលកិច្ចល្អនៃក្រសួងមហាផ្ទៃបានថ្លែងថា គំរោងអភិបាលកិច្ចល្អមួយចំនួនត្រូវបានផ្តល់ហិរញ្ញប្បទានដោយធនាគារពិភពលោក និងមានមូលនិធិបដិភាគពីរាជរដ្ឋាភិបាលកម្ពុជា និងជំនួយអភិវឌ្ឍន៍អូស្ត្រាលី និងសមាគមវិនិយោគកម្ពុជាដែលមានទឹកប្រាក់សរុបប្រមាណ២៥លានដុល្លារសហរដ្ឋអាមេរិក ដោយមានក្រសួងមហាផ្ទៃជាភ្នាក់ងារប្រតិបត្តិគំរោង និងមានក្រសួងស្ថាប័នរដ្ឋចំនួន៤ទៀតជាភ្នាក់ងារអនុវត្តគំរោងដោយផ្ទាល់ ដូចជាការិយាល័យច្រកចេញចូលតែមួយនៃក្រសួងមហាផ្ទៃ ក្រសួងទំនាក់ទំនងជាមួយសភា ព្រឹទ្ធសភា និងអធិការកិច្ច វិទ្យុជាតិនៃក្រសួងព័ត៌មាន និងក្រុមប្រឹក្សាអាជ្ញាកណ្តាលនៃក្រសួងការងារ និងបណ្តុះបណ្តាលវិជ្ជាជីវៈ ព្រមទាំងមានអង្គការសង្គមស៊ីវិលនានាធ្វើជាភ្នាក់ងារអនុវត្តគំរោងដែរ ដោយមានអង្គការមូលនិធិអាស៊ីជាអ្នកសំរបសំរួលផ្តល់ថវិកាបន្ត។
លោកបន្តថា គំរោងនេះមានគោលបំណងចំបងចំនួន៣គឺការពង្រឹងស្ថាប័ន ការគាំទ្រភាពជាដៃគូ និងការចែករំលែកមេរៀន បទពិសោធន៍គ្នាទៅវិញទៅមក។ ចំណែកយុទ្ធសាស្ត្រចំបងរបស់គំរោងគឺការបង្រួមគំលាតរវាងរដ្ឋ និងរាស្ត្រ។ លោកបញ្ជាក់អំពីលទ្ធផលដែលទទួលបានពីការអនុវត្តគំរោងអភិបាលកិច្ចល្អមកដល់បច្ចុប្បន ្ន គឺរៀបចំថវិកាសាធារណៈដើម្បីផ្សព្វផ្សាយឱ្យបានទូលំទូលាយពីច្បាប់ភូមិបាលជូនប្រជាពលរដ្ឋ នៅឃុំចំនួន១៤នៃស្រុកឈូក ខេត្តកំពតដែលមានប្រជាពលរដ្ឋចូលរួម៣.៧៩៥នាក់។ បង្កើតគណៈកម្មការពិគ្រោះយោបល់ដែលជានិមិត្តរូបនៃការពង្រឹងកិច្ចសហប្រតិបត្តិការរវាងអ្នក ពាក់ព័ន្ធ ជាពិសេសរដ្ឋាភិបាលជាមួយសង្គមស៊ីវិល។ ការអនុវត្តគំរោងអភិបាលកិច្ចល្អ ដែលទទួលបានផ្លែផ្កា និងមានជំនឿពីប្រជាពលរដ្ឋ គឺអាស្រ័យដោយមានការចូលរួមយ៉ាងសកម្មពីបណ្តាញផ្សព្វផ្សាយនៅកម្ពុជា។
លោកប៊ុត ជិ បានលើកឡើងផងដែរអំពីបញ្ហាប្រឈមនានាក្នុងការអនុវត្តគំរោងអភិបាលកិច្ចល្អក្នុងនោះរួមម ានមន្ត្រីភ្នាក់ងារអនុវត្តគំរោងសកម្មភាពនៅមានកំរិត ការឧបត្ថម្ភលើកទឹកចិត្តសំរាប់មន្ត្រីអនុវត្តគំរោងនៅទាបមិនទាន់បំពេញតាមតំរូវការការងារ ។ ការអនុវត្តគំរោងក្នុងភាពជាដៃគូជាមួយសង្គមសីុវិលមិនទាន់មានភាពរលូននៅឡើយ ខណៈពេលដែលការចូលរួមរបស់អ្នកពាក់ព័ន្ធដូចជាផ្នែកឯកជន អង្គការមហាជនយុវជន។ល។ នៅមិនទាន់សកម្ម។ ការផ្តួចផ្តើម និងការបង្កើតលំហ និងការបង្កឱកាសឱ្យមានការជួបប្រជុំពិភាក្សាក្នុងស្ថាប័នរវាងរដ្ឋាភិបាលជាមួយសង្គមស៊ីវិល នៅត្រូវការកែលំអបន្ថែមទៀត៕