រាជធានីភ្នំពេញ ៖ សភាវៀតណាមបានផ្តល់ជំនួយដល់សភាប្រទេសកម្ពុជាចំនួន២៣កោដិដុង សំរាប់បំពាក់ប្រព័ន្ធព័ត៌មានវិទ្យា ដែលការចុះហត្ថលេខានេះបានធ្វើឡើងរវាងលោកអនុប្រធានសភាវៀតណាមង្វៀន ឌឹកកៀន ជាមួយលោកងួន ញ៉ិល អនុប្រធានសភាកម្ពុជា កាលពីពីរសៀលថ្ងៃទី២៧ ធ្នូ ២០១០ ។ កិច្ចពិភាក្សារវាងអនុប្រធានសភានៃប្រទេសទាំង២នេះបានលើកឡើងថានឹងបញ្ចប់កិច្ចការព្រំ ដែននៅដំណាច់ឆ្នាំ២០១២ ឬអាចមុននេះបន្តិច បន្តួច ។ អនុប្រធានសភាទាំង២បានលើកឡើងទៀតថា បន្ទាប់ពីមានកិច្ចប្រឹងប្រែងពីរដ្ឋាភិបាលនៃប្រទេសទាំង២កម្ពុជា-វៀតណាម លើកិច្ចសហប្រតិបត្តិការនៅតាមព្រំដែននោះ យើងឃើញដំណើរការផ្សេងៗមានភាពរីកចំរើន និងរលូនទៅមុខគួរឱ្យកត់សំគាល់ ហើយប្រទេសទាំង២បានសន្យាថានឹងធ្វើឱ្យប្រជាពលរដ្ឋ-កិច្ចការព្រំដែនក្លាយជាព្រំដែនសន្តិភាព កិច្ចសហប្រតិបត្តិការ និងការអភិវឌ្ឍ ។
ជាមួយនេះផងដែរ ភាគីវៀតណាមបានស្នើឱ្យកម្ពុជាជួយមើលការពារដល់អាណិកជនវៀតណាម និងអ្នកវិនិយោគវៀតណាម ដែលកំពុងរស់នៅ និងបណ្តាក់ទុនរកស៊ីក្នុងប្រទេសកម្ពុជាលើផ្នែកផ្លូវច្បាប់ផង ។ លោកងួន ញ៉ិល រីករាយចំពោះការស្នើសុំនេះ ហើយបានលើកឡើងថា ចំពោះវិនិយោគិន និងអាណិកជនវៀតណាមយើងបានអនុវត្តតាមផ្លូវច្បាប់ត្រឹមត្រូវរួចមកហើយហើយពួកគេកំពុងត ែរកស៊ីដោយរលូននៅក្នុងប្រទេសកម្ពុជា ។ ដំណើរទស្សនកិច្ចរបស់អនុប្រធានសភាវៀតណាមនាពេលនេះ នឹងធ្វើឡើងរយៈពេល៤ថ្ងៃតាមការអញ្ជើញរបស់សម្តេចប្រធានរដ្ឋសភាហេង សំរិន និងក្នុងគោលបំណងដើម្បីរឹតចំណងមិត្តភាពសាមគ្គីភាព និងកិច្ចសហប្រតិបត្តិការរវាងស្ថាប័ននីតិប្បញ្ញត្តិនៃប្រទេសទាំង២កម្ពុជា-វៀតណាម ក៏ដូចជាផ្លាស់ប្តូរបទពិសោធន៍គ្នាទៅវិញទៅមក ។
លោកង្វៀន ឌឹកកៀន អនុប្រធានសភាវៀតណាមនឹងជួបពិភាក្សាការងារជាមួយសម្តេចអគ្គមហាសេនាបតីតេជោហ៊ុន សែន និងអនុញ្ញាតឱ្យអភិបាលរាជធានីភ្នំពេញ លោកកែប ជុតិមា ចូលជួបសវនាការផងដែរ ។ មុននឹងចាកចេញពីប្រទេសកម្ពុជា លោកអនុប្រធានសភានៃសាធារណរដ្ឋសង្គមនិយមវៀតណាមនឹងទៅទស្សនាប្រាង្គប្រាសាទបុរាណនានាក្ នុងខេត្តសៀមរាបផងដែរ ៕