រាជធានីភ្នំពេញ ៖ អ្នកកាសែត២នាក់ដែលប៉លិសបញ្ជូនទៅកាន់តុលាការកាលពីវេលាម៉ោងជាង២រសៀលថ្ងៃទី ២២ ធ្នូ ២០១០ នោះ ត្រូវបានព្រះរាជអាជ្ញារងធ្វើការសាកសួរ និងដាក់បន្ទុករួចហើយ ហើយរហូតមកដល់ម៉ោងជាង៥ល្ងាចថ្ងៃដដែល ក៏បានសំរេចឃុំខ្លួនបណ្តោះអាសន្ន ដោយផ្ញើទុកនៅប៉ូលិសខណ្ឌសែនសុខមួយថ្ងៃសិនរង់ចាំសាកសួរមួយព្រឹកនេះទៀត ទើបបញ្ជូនទៅពន្ធនាគារព្រៃស។ លោកជិត ប៊ុណារ៉ា ជាដើមបណ្តឹងម្នាក់ក្នុងចំណោមដើមបណ្តឹងច្រើននាក់នៅចំពោះមុខសមត្ថកិច្ចបានឱ្យដឹងថ ា នៅថ្ងៃទី១៩ ធ្នូ ឆ្នាំ២០១០ ឈ្មោះថោង ដារ៉ាវុធ បានទូរស័ព្ទប្រាប់ថា ខ្លួនគេជាមន្ត្រីព័ត៌មាននាយកដ្ឋានអគ្គិសនីកម្ពុជា សុំលុយ១០០ដុល្លារ ដើម្បីយកមកធ្វើពិធីជប់លៀង។ ជនរងគ្រោះក៏យល់ព្រមឱ្យ ដោយណាត់ថាចាំថ្ងៃទី២០ ធ្នូ ចាំយក។ ប៉ុន្តែឈ្មោះថោង ដារ៉ាវុធ បានទូរស័ព្ទច្រើនដងឱ្យផ្ញើប្រាក់១០០ដុល្លារតាមរថយន្តតាក់ស៊ីវិញ។ ជនរងគ្រោះបន្តថា ដោយមានការសង្ស័យក៏ទូរស័ព្ទទាក់ទងទៅនាយកដ្ឋានអគ្គិសនីកម្ពុជា ក៏បានដំណឹងពីការក្លែងបន្លំយកឈ្មោះមន្ត្រីនៃអាជ្ញាធរអគ្គិសនីកម្ពុជា ទើបឈានដល់ការប្តឹងទៅសមត្ថកិច្ចដើម្បីរៀបចំដាក់អន្ទាក់។ នៅចំពោះមុខសមត្ថកិច្ច ចាងហ្វាងកាសែតខិលខូចទាំង២នាក់ខាងលើបានឆ្លើយសារភាពថា ខ្លួនបានទូរស័ព្ទសុំលុយពីជនរងគ្រោះពិតប្រាកដមែន។ ក្រោយពីសាកសួររយៈពេលជាង១ម៉ោង ប៉ូលិសបានសំរេចឃុំខ្លួនបណ្តោះអាសន្ននៅអធិការដ្ឋានខណ្ឌសែនសុខ ដោយទទួលបញ្ជាពីព្រះរាជអាជ្ញារងអមសាលាដំបូងរាជធានី។
សូមបញ្ជាក់ថា អ្នកកាសែត២នាក់ ដែលប្រជាពលរដ្ឋទូទាំងប្រទេសស្ទើរតែមិនស្គាល់ឈ្មោះ និងអង្គភាពនេះ បានត្រូវប៉ូលិសព្រហ្មទណ្ឌខណ្ឌសែនសុខ ធ្វើការចាប់ខ្លួនវាយខ្នោះពីបទឆបោក ខណៈជនទាំង២នេះទៅទទួលប្រាក់១០០ដុល្លារ ពីបុរសម្នាក់នៅមុខផ្សារដីហុយ ភូមិរោងចក្រ សង្កាត់ភ្នំពេញថ្មី ខណ្ឌសែនសុខ កាលពីវេលាម៉ោង២និង១០នាទីរសៀលថ្ងៃទី២០ ធ្នូ ២០១០។ អ្នកកាសែតទាំង២នេះគឺ១-ឈ្មោះថោង តារាវុធ ចាងហ្វាងកាសែតនគរសន្តិភាព ស្រុកកំណើតភូមិក្រាំងរអូត ឃុំសំរោង ស្រុកសំរោង ខេត្តតាកែវ បច្ចុប្បន្នស្នាក់នៅភ្នំពេញ ២-ឈ្មោះជុំ ប៊ុនហ៊ាប ចាងហ្វាងកាសែតពន្លឺសេរីភាព មានស្រុកកំណើតភូមិ៦ ឃុំព្រែកតានង់ ស្រុកកោះសូទិន ខេត្តកំពង់ចាម អ្នកទាំងពីរត្រូវបានចោទប្រកាន់ពីបទឆបោក ដោយយកឈ្មោះមន្ត្រីនាយកដ្ឋានអាជ្ញាធរអគ្គិសនីកម្ពុជាទៅប្រើប្រាស់ក្នុងការគំរាមកំហែង ទារប្រាក់ពីមន្ត្រីអាជ្ញាធរអគ្គិសនីដែលរស់នៅក្នុងខណ្ឌសែនសុខ ។
មន្ត្រីប៉ូលិសបានឱ្យដឹងថា អ្នកទាំង២នេះបានក្លែងឈ្មោះ និងអង្គភាពជាមន្ត្រីនាយកដ្ឋានអាជ្ញាធរអគ្គិសនីកម្ពុជាទៅគំរាមជំរិតទារប្រាក់ពី មន្ត្រីអាជ្ញាធរអគ្គិសនីចំនួន២០០ដុល្លារ ប៉ុន្តែមន្ត្រីនោះបានយល់ព្រមប្រគល់ប្រាក់តែ១០០ដុល្លារប៉ុណ្ណោះ ហើយបានប្តឹងប៉ូលិសទុកជាមុន និងប្រគល់ភារកិច្ចនេះឱ្យប៉ូលិសរៀបចំផែនការចាប់ខ្លួនតែម្តង។ ប៉ូលិសបាននិយាយថា អ្នកកាសែតប្រព្រឹត្តខុសវិជ្ជាជីវៈទាំង២នេះត្រូវបានមន្ត្រីនាយកដ្ឋានអាជ្ញាធរអគ្គិសនីកម្ ពុជា តាមស្វែងរកមុខជាយូរខែមកហើយ ក្រោយពីគេប្រឌិតរឿងទៅគំរាមកំហែងមន្ត្រីអគ្គិសនីនៅតាមបណ្តាខេត្តនានាជំរិតទារប្រាក់រា ប់រយដុល្លារ។ បន្ទាប់ពីឃាត់ពួកគេរួចមក មានមន្ត្រីអាជ្ញាធរអគ្គិសនី៤ទៅ៥នាក់ផ្សេងទៀត បានចូលទៅបំភ្លឺប្រាប់សមត្ថកិច្ច និងដាក់ពាក្យបណ្តឹងបន្ថែម ដើម្បីឱ្យតុលាការចាត់ការរឿងនោះទៅតាមស្ថានបទល្មើសរបស់គេ៕