ខេត្តព្រះសីហនុ ៖ ជនម្នាក់ក្នុងចំណោមបក្សពួកពីរនាក់ដែលតែងដើរលួចទាក់ និងបំពុលឆ្កែ ត្រូវបានប្រជាពលរដ្ឋប្រទះឃើញ ខណៈពេលកំពុងធ្វើសកម្មភាពដាក់ថ្នាំបំពុលឆ្កែកាលពីវេលាម៉ោង១និង៣០នាទីរំលងអធ្រាត្ រ ឈានចូលថ្ងៃទី២៥ ធ្នូ ហើយត្រូវបានប្រជាពលរដ្ឋសហការគ្នាឡោមព័ទ្ធចាប់បាន និងវាយរហូតដល់ដង្ហើមចង្រិត រួចបញ្ជូនទៅឱ្យសមត្ថកិច្ចនៃកងរាជអាវុធហត្ថការិយាល័យស្រាវជ្រាវបទល្មើសព្រហ្មទណ្ឌខ េត្ត ។ លោកអនុសេនីយ៍ឯក វ៉ា ចាន់ថន នាយការិយាល័យស្រាវជ្រាវបទល្មើសព្រហ្មទណ្ឌនៃកងរាជអាវុធហត្ថខេត្តបានឱ្យដឹងថា ជនសង្ស័យដែលប្រជាពលរដ្ឋចាប់បញ្ជូនមកឱ្យសមត្ថកិច្ចកងរាជអាវុធហត្ថនេះឈ្មោះយ៉ង យ៉ាវ ភេទប្រុស អាយុ២៣ឆ្នាំ មុខរបរមិនពិតប្រាកដ មានទីលំនៅក្រុម២៩ ភូមិ១ សង្កាត់លេខ១ ក្រុងព្រះសីហនុ។ រីឯបក្សពួកម្នាក់ដែលរត់គេចខ្លួនបាត់ មិនត្រូវបានបង្ហាញអត្តសញ្ញាណទេ ចំណែកម្ចាស់ឆ្កែឈ្មោះប្រាង្គ ឆាត ភេទប្រុស អាយុ៥៣ឆ្នាំ ជាបុគ្គលិកមន្ទីរពេទ្យខេត្ត មានទីលំនៅក្រុម៦ ភូមិ១ សង្កាត់លេខ១ ក្រុងព្រះសីហនុ។
លោកប្រាង្គ ឆាត បាននិយាយថា នៅវេលាម៉ោងប្រហែល១រំលងអធ្រាត្រ គាត់បានឮសូរសន្ធឹកម៉ូតូជិះមកដល់មុខផ្ទះរបស់គាត់ រួចក៏ឈប់ ហើយម្នាក់ដែលជិះពីខាងក្រោយបានដើរមកក្បែររបងផ្ទះ ហើយពេលនោះរូបលោកនឹកស្មានតែគេឈប់បត់ជើងតូច ពុំដឹងថាគេដាក់សាច់បំពុលឆ្កែរបស់គាត់ឡើយ។ មួយសន្ទុះក្រោយមក ឆ្កែប៊ែរហ្សេពីរក្បាលរបស់គាត់ក៏បានពុលប្រកាច់ងាប់នៅនឹងកន្លែងភ្លាមៗតែម្តង ពេលនោះរូបគាត់បានប្រាប់ទៅអ្នកជិតខាង ដើម្បីចាំចាប់ជនពីរនាក់ដែលមកបំពុលឆ្កែរបស់គាត់នេះ។ មិនយូរប៉ុន្មានជនសង្ស័យទាំងពីរនាក់ក៏បានត្រឡប់មកវិញ ពេលនោះប្រជាពលរដ្ឋដែលនៅក្បែរៗគ្នាបានឡោមព័ទ្ធចាប់បានម្នាក់ ឯម្នាក់ទៀតរត់គេចខ្លួនរួច។
នៅមុខសមត្ថកិច្ច ជនឈ្មោះយ៉ង យ៉ាវ បានសារភាពថា ពួកគេប្រព្រឹត្តអំពើបំពុលនិងទាក់ឆ្កែនេះជាច្រើនលើកមកហើយ និងទើបតែពេលនេះដែលប្រជាពលរដ្ឋទាន់ និងចាប់ខ្លួនបញ្ជូនមកឱ្យសមត្ថកិច្ចកងរាជអាវុធហត្ថខេត្ត។ វត្ថុតាងដែលសមត្ថកិច្ចដកហូតបានមាន ម៉ូតូម៉ាកវ៉េវអាល់ហ្វា ពណ៌ក្រហម គ្មានស្លាកលេខ ចំនួន១គ្រឿង និងឆ្កែបំពុលងាប់ចំនួន២ក្បាល។ គួរបញ្ជាក់ថា យោងតាមគោលនយោបាយភូមិ-ឃុំមានសុវត្ថិភាព ទើបប្រជាពលរដ្ឋសហការគ្នាយ៉ាងល្អ និងឈានទៅចាប់បានជនលួចបំពុល និងទាក់ឆ្កែខាងលើបាន៕