ខេត្តកំពង់ឆ្នាំង ៖ បុរសស្ត្រីពីរនាក់ប្តីប្រពន្ធជនជាតិវៀតណាម បានរងរបួសរលាកភ្លើងធ្ងន់ធ្ងរ ដោយសារជនអប្រិយបានយកសាំងចាក់លើដំបូលមុង រួចកេះដែកកេះដុត ខណៈកំពុងដេកលង់លក់ កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១៩ ធ្នូ ២០១០ នៅភូមិក្រម៉ាល់ ឃុំប្រឡាយមាស ស្រុកកំពង់លែង ។ បុរសជាប្តីឈ្មោះផាម យ៉ាំងសេ អាយុ៥៣ឆ្នាំ រលាកធ្ងន់ធ្ងរ និងប្រពន្ធឈ្មោះង្វៀង ធីសៅ អាយុ៥០ឆ្នាំ របួសរលាកមធ្យម បានរៀបរាប់ថា នៅពេលកើតហេតុ ពួកគាត់កំពុងដេកជិតលក់ ក៏ឃើញឈ្មោះចាង យ៉ាំងឡាំ អាយុ៣២ឆ្នាំ ដើរចូលមករកមុងរបស់គាត់ ។ ពេលនោះគាត់ងើបអង្គុយក្នុងមុងសម្លឹងមើលក្រែងចាង យ៉ាំងឡាំ ធ្វើអ្វី...មិនទាន់ចេញពីមុងផង ស្រាប់តែយ៉ាំង ឡាំ កាន់ចានដែកនៅដៃ មានសាំងមិនដឹងប៉ុន្មានលីត្រទេ ជះស្រោចមកលើមុងពួកគាត់ រួចកេះដែកកេះដុតតែម្តង បណ្តាលឱ្យឆេះសន្ធោសន្ធៅ ។
ពេលពួកគាត់ពីរនាក់ប្តីប្រពន្ធកំពុងឆេះពេញខ្លួន ជនល្មើសបានរត់ចុះទូកម៉ាស៊ីនរួចបើកគេចចេញទៅបាត់ ។ ជនរងគ្រោះបន្តថា កន្លងមក រវាងជនល្មើស និងពួកគាត់គឺធ្លាប់មានទំនាស់នឹងគ្នា ឥឡូវស្រាប់តែគេមកលួចដុតពួកគាត់ទាំងរស់តែម្តង ។ ពួកគាត់ត្រូវបានក្រុមគ្រួសារនាំទៅសង្គ្រោះនៅមន្ទីរពេទ្យវេលាម៉ោងជិត៤ទៀបភ្លឺ ថ្ងៃ១៩ ធ្នូ ។ មន្ត្រីប៉ូលិសប៉ុស្តិ៍រដ្ឋបាលប្រឡាយមាសបាននិយាយឱ្យដឹងថា ក្រោយកើតហេតុបានពិនិត្យឃើញមានឆេះអស់ខ្នើយ៤ មុង១ ភួយ១ ចំណែកជនរងគ្រោះទាំង២នាក់ប្តីប្រពន្ធរងរបួសរលាកធ្ងន់ធ្ងរ ។ ចំណែកជនដៃដល់ប៉ូលិសកំពុងស្រាវជ្រាវតាមស្វែងរកចាប់ខ្លួន ៕