រាជធានីភ្នំពេញ ៖ វិថីឧកញ៉ាទេព ផន ត្រូវបានបើកឱ្យអ្នកដំណើរធ្វើចរាចរឡើងវិញ កាលពីវេលាម៉ោង៣និង៣០នាទី បន្ទាប់ពីបិទការឆ្លងកាត់រយៈពេលខ្លី ដើម្បីបង្ក្រាបអគ្គីភ័យ ហើយឥឡូវនេះអគ្គីភ័យបានត្រូវសមត្ថកិច្ចពន្លត់ឱ្យរលត់ជាស្ថាពរហើយ ។ សូមបញ្ជាក់ថា អគ្គីភ័យបានឆាបឆេះលំនៅឋានជាន់ទី២ លេខ២៨៧CEo របស់ប្រជាពលរដ្ឋ ដោយបញ្ចេញផ្សែងអាប់ហុយទ្រលោមឡើងលើ កាលពីវេលាម៉ោង២និង១០នាទីរសៀលថ្ងៃទី២៣ ធ្នូ ២០១០ ក្នុងសង្កាត់ទឹកល្អក់ទី២ ខណ្ឌទួលគោក រាជធានីភ្នំពេញ ជាប់វិថីឧកញ៉ាទេពផន បង្កឱ្យមានការភ័យរន្ធត់ និងជ្រួលច្របល់យ៉ាងខ្លាំង។
ប៉ូលិសកំពុងចាត់ចែងពន្លត់អគ្គីភ័យនេះ ហើយ ខណៈផ្សែងអាប់ហុយទ្រលោមអណ្តែតត្រសែត ហើយប្រជាពលរដ្ឋរងគ្រោះ (ម្ចាស់ផ្ទះ) និងអ្នកក្បែរខាងបានជញ្ជូនអីវ៉ាន់ទ្រព្យសម្បត្តិយ៉ាងប្រញិបប្រញាប់ និងស្លន់ស្លោ ជាមួយភាពរន្ធត់ ។ មូលហេតុនៃការបង្កឱ្យមានអគ្គីភ័យនេះត្រូវបានស្ត្រីម្ចាស់ផ្ទះឈ្មោះចន្ធី អាយុ៥១ឆ្នាំ ឱ្យដឹងថា គឺវាបណ្តាលមកពីទុស្សេខ្សែភ្លើង...វាឆេះតែក្នុងបន្ទប់ប៉ុណ្ណោះ មិនមានទ្រព្យសម្បត្តិធំដុំខូចខាតទេ ប៉ុន្តែពួកយើងក៏ព្រលឹងចុងសក់មិនស្ទើរដែរ ។ ខណៈនេះឡានទឹកកើនឡើងដល់៥គ្រឿង ចេញធ្វើសកម្មភាពពន្លត់ និងប៉ូលិសកំពុងទាញទុយោឡើងទៅលើបាញ់ទឹកបង្ក្រាបភ្លើងដែលគិតតែពីឆេះហុយផ្សែងអាប់ទ្រល ោម(ឆេះងំ) ឥឡូវផ្សែងនេះវាថមថយហើយ ។
ជាមួយនឹងចំណាត់ការរបស់សមត្ថកិច្ច ដើម្បីបង្ក្រាបអគ្គីភ័យដែលឆេះងំមួយនេះ វិថីឧកញ៉ាទេពផន ចាប់ពីកំណាត់ភ្លើងស្តុបទៅដល់ផ្លូវបំបែកមន្ទីរពេទ្យព្រះកុសុមៈ-ផ្សារហេងលី ត្រូវបិទដំណើរចរាចរមួយរយៈសិន រង់ចាំភ្លើងរលត់ទើបអនុញ្ញាតឱ្យអ្នកដំណើរឆ្លងកាត់ជាធម្មតាវិញ។ ឥឡូវភ្លើងរលត់អស់ហើយ ឯវិថីឧកញ៉ាទេពផនក៏ត្រូវបើកឱ្យធ្វើដំណើរឆ្លងកាត់វិញដែរ៕