ខេត្តប៉ៃលិន ៖ គ្រួសារជនរងគ្រោះដែលរងការបាញ់សំលាប់ពីមន្ត្រីយោធាម្នាក់នៅអង្គភាពកងការពារព្រំដែន គោកលេខ៥០៤ នៅឯស្រុកសាលាក្រៅ ខេត្តប៉ៃលិន កាលពីជាងមួយសប្តាហ៍មុនបានព្យាយាមស្វះស្វែងយ៉ាងខ្លាំងដើម្បីរកជំនួយផ្នែកច្បាប់ពីអង្ គការការពារសិទ្ធិមនុស្សនានា និងប្រព័ន្ធតុលាការផងដែរ ក្រោយពីអាជ្ញាធរ និងសមត្ថកិច្ចគ្រប់ស្ថាប័ននៃខេត្តនេះមិនបានអើពើ ឬកសាងសំណុំរឿងចំពោះការបាញ់សំលាប់សមាជិកគ្រួសារគាត់ ។ លោកគឿន ផាត អាយុ៥០ឆ្នាំ ជាឪពុកបង្កើតរបស់ជនរងគ្រោះដែលស្លាប់ដោយការបាញ់ប្រហារដ៏ឃោរឃៅពីមន្ត្រីយោធាអង្គភាពកា រពារព្រំដែនគោកលេខ៥០៤ បានប្រាប់កោះសន្តិភាពថា ការស្លាប់ដោយត្រូវគ្រាប់កាំភ្លើងរបស់កូនប្រុសគាត់ហាក់បីដូចជាអន់ជាងសត្វធាតុទៅ ទៀត ។ លោកបាននិយាយថា សមត្ថកិច្ចខេត្តប៉ៃលិនស្ទើរគ្រប់ស្ថាប័នមិនបានជួយរកយុត្តិធម៌ ឬកសាងសំណុំរឿងអំពីករណីមន្ត្រីយោធាបាញ់សំលាប់កូនប្រុសគាត់នោះទេ ។
ហេតុដូច្នេះហើយទើបរូបលោក និងក្រុមគ្រួសារស្វែងរកជំនួយផ្នែកច្បាប់ពីអង្គការការពារសិទ្ធិមនុស្សនានា និងតុលាការដោយផ្ទាល់ ដើម្បីជួយរកយុត្តិធម៌ដល់ការស្លាប់របស់កូនប្រុសគាត់ ។ លោកគឿន ផាត បានបញ្ជាក់ថា កាលពីថ្ងៃទី២៤ ធ្នូ កន្លងទៅនេះ មន្ត្រីយោធាម្នាក់ឈ្មោះសៅ អង នៅអង្គភាព៥០៤ បានណាត់ជួបចរចាជាមួយរូបលោកដើម្បីបង់ប្រាក់សំណងនៃការបាញ់សំលាប់កូនប្រុសគាត់ ប៉ុន្តែមិនត្រូវរ៉ូវគ្នាទេ ដោយសារតំណាងជនដៃដល់រូបនេះ ព្រមសងសំណងដល់ជីវិតកូនប្រុសគាត់តែចំនួន៣លានរៀលប៉ុណ្ណោះ ខណៈដែលរូបលោកទាមទារចំនួន២ម៉ឺនដុល្លារ តែអាចសំរួលគ្នាបានទៀត ។ ទោះបីជាបែបណាឪពុកជនរងគ្រោះរូបនេះបានបញ្ជាក់បន្ថែមថា ដោយសារការចរចាមិនចុះសំរុងគ្នា រូបលោកបានសំរេចដាក់ពាក្យបណ្តឹងជាផ្លូវការទៅកាន់តំណាងអយ្យការអមសាលាដំបូងខេត្តបាត់ដ ំបងហើយកាលពីថ្ងៃទី២៧ ធ្នូ ឆ្នាំ២០១០ ។
គួររំលឹកថា កាលពីយប់ថ្ងៃទី១៩ ធ្នូ កន្លងទៅថ្មីៗនេះ មានករណីបាញ់សំលាប់មនុស្សម្នាក់នៅចំណុចក្បាលស្ពានស្ទឹងកុយត្រើយខាងកើត ស្ថិតនៅភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ដែលបង្កឡើងដោយមន្ត្រីយោធាម្នាក់ឈ្មោះពេញ ពេជ្រ អាយុ៣២ឆ្នាំ នៅអង្គភាពកងការពារព្រំដែនគោកលេខ៥០៤ មានមូលដ្ឋាននៅចំណុចស្រែម្អម ក្នុងស្រុកសាលាក្រៅ ។ ចំពោះដើមចមឈានដល់ការប្រើប្រាស់អាវុធ AK47 បាញ់សំលាប់មនុស្សនេះ គឺក្នុងគ្រាដែលមន្ត្រីយោធាម្នាក់នេះបានប៉ះទង្គិចពាក្យសំដីមួយប្រាវជាមួយពួកយុវជនមួយ ក្រុម ហើយការផ្ទុះអាវុធនោះបានបណ្តាលឱ្យយុវជនម្នាក់ឈ្មោះគឿន ធឿន អាយុ២៥ឆ្នាំ រស់នៅភូមិស្រឡៅទង ឃុំកំរៀង ស្រុកកំរៀង ខេត្តបាត់ដំបង បានស្លាប់បាត់បង់ជីវិតភ្លាមៗនៅកន្លែងកើតហេតុ ដោយគ្រាប់កាំភ្លើងបានទំលុះលើដើមដោះខាងស្តាំធ្លាយទៅក្រោមដោះខាងឆ្វេង ។
ក្រោយពីការបាញ់សំលាប់មនុស្សដ៏ឃោរឃៅនាយប់នោះ នៅព្រឹកថ្ងៃទី២០ ធ្នូ គេឃើញសមត្ថកិច្ចនគរបាល និងប៉េអឹមខេត្តប៉ៃលិន បានចុះទៅដល់ចំណុចកើតហេតុដើម្បីសួរនាំអំពីហេតុការណ៍នេះ ។ ប៉ុន្តែទីបំផុតគ្មានកំណត់ហេតុជាផ្លូវការណាមួយដែលសមត្ថកិច្ចទាំង២ស្ថាប័ននេះបានច ងក្រងជាសំណុំរឿងបញ្ជូនទៅតុលាការនោះទេ ។ លោកឡី ចាន់ឆាយ ស្នងការខេត្តប៉ៃលិន បានប្រាប់កោះសន្តិភាពកាលពីព្រឹកថ្ងៃទី២០ ធ្នូ ក្រោយកើតហេតុមួយយប់ថា លោកកំពុងជាប់ប្រជុំ ប៉ុន្តែកំលាំងរបស់លោកបានចុះទៅធ្វើការងារនេះហើយ ។ ដោយឡែកលោកវ៉ាន់ ណាឡុង មេបញ្ជាការកងរាជអាវុធហត្ថខេត្តប៉ៃលិន ក៏បានប្រាប់កោះសន្តិភាពនាព្រឹកនោះដែរថា កំលាំងរបស់លោកក៏បានចុះទៅធ្វើការងារនេះដែរ ប៉ុន្តែជនដៃដល់មិនត្រូវបានចាប់ខ្លួននោះទេ ព្រោះអង្គភាពគេបានបញ្ជូនខ្លួនមន្ត្រីយោធាដៃដល់នោះ ទៅកាន់ទីបញ្ជាការយោធភូមិភាគទី ៥ តាំងពីយប់មកម៉្លេះ ដោយសារមន្ត្រីយោធានោះក៏រងរបួសធ្ងន់ធ្ងរដែរ ។
ទោះបីជាបែបណាលោកយិន ម៉េងលី មន្ត្រីស៊ើបអង្កេតរបស់សមាគមការពារសិទ្ធិមនុស្សអាដហុកប្រចាំខេត្តបាត់ដំបង-ប៉ៃលិន បានថ្លែងថា ការស្លាប់របស់ជនរងគ្រោះឈ្មោះគឿន ធឿន ដោយសារការបាញ់ប្រហារពីសំណាក់មន្ត្រីយោធាឈ្មោះពេញ ពេជ្រ នេះ មិនមានស្ថាប័នសមត្ថកិច្ចណាមួយបានកសាងសំណុំរឿងដើម្បីបញ្ជូនទៅតុលាការនោះទេ ។ មន្ត្រីរូបនេះបានបញ្ជាក់ថា លោកបានចុះទៅទំនាក់ទំនងប៉ុន្មានថ្ងៃជាប់ជាមួយស្នងការដ្ឋានខេត្តប៉ៃលិន តែខាងស្នងការបានប្រាប់ថា ខាងកងរាជអាវុធហត្ថជាអ្នកចាត់ការលើករណីបាញ់សំលាប់មនុស្សនេះ ពីព្រោះជនដៃដល់គឺជាមន្ត្រីយោធា ។
លោកយិន ម៉េងលី បានប្រាប់កោះសន្តិភាពថា លោកបានចូលជួបផ្ទាល់ជាមួយលោកឧត្តមសេនីយ៍ត្រី វ៉ាន់ ណាឡុង មេបញ្ជាការកងរាជអាវុធហត្ថខេត្តប៉ៃលិន ហើយលោកមេបញ្ជាការរូបនេះបានបញ្ជាក់ប្រាប់លោកថា អង្គភាពរបស់លោកមិនបានកសាងសំណុំរឿងនេះទេ ព្រោះលោកព្រំ ប៉ាត់ មេបញ្ជាការអង្គភាពការពារព្រំដែនគោកលេខ៥០៤ បានសរសេរលិខិតស្នើសុំយកជនដៃដល់ទៅកាន់យោធភូមិភាគទី ៥ ហេតុដូច្នេះហើយទើបខាងកងរាជអាវុធហត្ថមិនកសាងសំណុំរឿង ម្យ៉ាងលោកមេប៉េអឹមរូបនេះបានបញ្ជាក់ថា នៅយោធភូមិភាគទី៥ ក៏មានការិយាល័យទណ្ឌកម្ម និងសរសើរផងដែរ ។ លោកយិន ម៉េងលី បានរិះគន់ថា នេះជាការយល់ច្រឡំបែបមិនទទួលខុសត្រូវចំពោះតួនាទីរបស់ខ្លួនដែលច្បាប់ប្រគល់ឱ្យ ។ លោកបានបញ្ជាក់ថា លោកបានដាក់លិខិតអន្តរាគមន៍មួយ ហើយគោរពជូនលោកព្រះរាជអាជ្ញា ដើម្បីស្នើសុំបើកការស៊ើបអង្កេតលើករណីនេះ ៕