រាជធានីភ្នំពេញ ៖ កាលពីព្រឹកថ្ងៃទី២២ ធ្នូ ក្រុមអាជីវករលក់ដូរនៅផ្សារប៉េសេ ដែលមានទីតាំងនៅសង្កាត់បឹងទំពុន ខណ្ឌមានជ័យ បាននាំគ្នាចេញមកឈរតវ៉ានៅមុខផ្សារ ក្នុងគោលបំណងទាមទារសុំឱ្យអាជ្ញាធរជួយអន្តរាគមន៍ កុំឱ្យថៅកែផ្សារដំឡើងថ្លៃឈ្នួលតូបតាមតែចិត្តនឹកឃើញ ។ ក្រុមអាជីវករ បាននិយាយថា អ្នកលក់ដូរតាមតូបតូច-ធំ និងកន្លែងលក់ដូរកំប៉ិកកំប៉ុកជុំវិញផ្សារត្រូវថៅកែទាមទារឱ្យដំឡើងប្រាក់ឈ្នួលក្នុង មួយកន្លែងគុននឹង៣ដងនៃតំលៃលក់សព្វថ្ងៃ ។ ក្រុមអាជីវករបានបន្តថា ដោយសារតែបញ្ហានេះហើយ ទើបពួកគាត់ទាំងអស់គ្នាចេញមុខមកតវ៉ាសុំឱ្យអាជ្ញាធរមូលដ្ឋានជួយអន្តរាគមន៍ទប់ស្កា ត់ទៅលើម្ចាស់ផ្សារកុំឱ្យដំឡើងថ្លៃតូបស្រេចតែចិត្ត ។
សូមបញ្ជាក់ថា ថ្លៃឈ្នួលតូបលក់ដូរតាមកន្លែងតូច-ធំក្នុងផ្សារប៉េសេមានគិតជាថ្ងៃផង និងគិតជាខែផង ក្នុងតំលៃចាប់ពី២.០០០រៀល រហូតដល់១០០ដុល្លារក្នុងមួយខែៗក៏មានដែរ ។ ក្រុមអាជីវករបន្ថែមថា កាលពីផ្សារពុំទាន់ដំណើរការ ថៅកែផ្សារបានលួងលោមពួកគាត់ឱ្យចូលមកលក់ដូរ ប៉ុន្តែនៅពេលដែលផ្សារមានដំណើរការបណ្តើរៗ ស្រាប់តែម្ចាស់ផ្សារទាមទារដំឡើងថ្លៃឈ្នួលតូបតែម្តង ។ ដូច្នេះពួកគាត់ពុំមានលទ្ធភាពលក់ដូរ រកប្រាក់បង់ថ្លៃឈ្នួលតូបជូនថៅកែតាមតែការទាមទារនោះបានទេ ព្រោះក្នុងផ្សារលក់ដូរអត់ដាច់ផង ។ ចំពោះបញ្ហានេះថៅកែផ្សារប៉េសេពុំអាចទំនាក់ទំនងសុំការបំភ្លឺបានឡើយ ។ ហើយដំណោះស្រាយយ៉ាងណានោះក៏ពុំទាន់ដឹងនៅឡើយដែរ ៕