ក្រុងប៉ោយប៉ែត ៖ ទារកមានអាយុប្រមាណ១ខែ ត្រូវគេយកទៅប្លុងចោលនៅមុខផ្ទះប្រជាពលរដ្ឋម្នាក់ ក្នុងភូមិគីឡូម៉ែត្រលេខ៤ សង្កាត់ប៉ោយប៉ែត ។ តាមការបំភ្លឺពីស្ត្រីឈ្មោះផែន ផាវី អាយុ៣៤ឆ្នាំ ម្ចាស់ផ្ទះដែលគេប្លុងទារកនេះឱ្យដឹងថា នៅវេលាម៉ោងប្រមាណ៩ និង៣០នាទីព្រឹក ថ្ងៃទី២០ ធ្នូ ពេលដែលគាត់ចេញពីក្នុងផ្ទះ ស្រាប់តែឃើញទារកនេះនៅលើគ្រែដោយមានរុំដណ្តប់កន្សែងពណ៌ស ហើយបានហៅគេឯងឱ្យជួយមើល ។ ពេលបើកកន្សែងមើលឃើញទារកនេះមានលក្ខណៈធម្មតា ហើយបានរាយការណ៍ដល់សមត្ថកិច្ចប៉ូលិសក្រុងផងដែរ ។
ស្ត្រីឈ្មោះផែន ផាវី បញ្ជាក់ថា រូបគាត់ពុំមានលទ្ធភាពទទួលយកក្មេងនេះចិញ្ចឹមបានទេ ដោយសារតែជីវភាពក្រីក្រ និងប្រកបរបរជាជាងកាត់ដេរ ចំណែកប្តីជាប៉ូលិសការពារព្រំដែនមានប្រាក់ខែតិចតួច ។ ម្យ៉ាងទៀតរូបគាត់មានកូនតូចម្នាក់ផងដែរ ។ ស្ត្រីរូបនោះបានអំពាវនាវថា បើមានអ្នកណាចង់បានទារកនេះយកទៅចិញ្ចឹម រូបគាត់នឹងប្រគល់ឱ្យ ។ លោកអនុសេនីយ៍ឯក អ៊ុំ សុផល អធិការក្រុងប៉ោយប៉ែតឱ្យដឹងថា ទារកនេះលោកឱ្យស្ត្រីឈ្មោះផែន ផាវី ជួយចិញ្ចឹមបណ្តោះអាសន្នសិន ហើយបើមានអ្នកណាចង់បានយកទៅចិញ្ចឹមសូមទៅទាក់ទងជាមួយសមត្ថកិច្ចដើម្បីធ្វើលិខិតស្នាមឱ ្យបានត្រឹមត្រូវចៀសវាងកុំឱ្យមានបញ្ហាអ្វីកើតឡើងផ្ទុយពីផ្លូវច្បាប់ ។
តាមការពិនិត្យជាក់ស្តែងឃើញថា អ្នកនាំទារកនេះយកទៅប្លុងចោលគឺមិនមែនចេះតែប្លុងចោលទេ គឺមានចេតនាចង់ឱ្យម្ចាស់ផ្ទះជាអ្នកទទួលយកចិញ្ចឹម ។ ទោះបីជាបែបណាមានប្រភពព័ត៌មានក្រៅផ្លូវការជាច្រើនត្រូវបានគេនិយាយជុំវិញទារកនេះ ៕