រាជធានីភ្នំពេញ ៖ អាជ្ញាធររាជធានីភ្នំពេញបាននិងកំពុងត្រៀមរៀបចំធ្វើពិធីបើកការដ្ឋានស្ថាបនាស្ពានអាកាស ទី២ នៅចំណុចប្រសព្វដ៏សំខាន់ចំនួន៥ នៅចំណុចភ្លើងស្តុបមន្ទីរពេទ្យព្រះកុសុមៈ បន្ទាប់ពីស្ពានអាកាសក្បាលថ្នល់ ត្រូវបានដាក់ឱ្យប្រើប្រាស់រួចហើយកាលពីពាក់កណ្តាលឆ្នាំ២០១០នេះ។ ពិធីបើកការដ្ឋាននេះគ្រោងនឹងធ្វើនៅថ្ងៃទី២៩ ធ្នូ ២០១០ ស្ថិតក្រោមអធិបតីភាពសម្តេចតេជោហ៊ុន សែន នាយករដ្ឋមន្ត្រី និងលោកជំទាវបណ្ឌិតប៊ុន រ៉ានី ហ៊ុន សែន ដោយមានមន្ត្រីអាជ្ញាធររាជធានីភ្នំពេញ និងស្ថាប័នជាច្រើនចូលរួម។
មន្ត្រីជំនាញសាលារាជធានីភ្នំពេញបានឱ្យដឹងថា ស្ពានអាកាសទី២នៅចំណុចភ្លើងស្តុបមន្ទីរពេទ្យព្រះកុសុមៈ ដែលត្រៀមរៀបចំបើកការដ្ឋានស្ថាបនានាពេលនេះ ជាប្រភេទស្ពានបេតុងអាមេ មានប្រវែង៣៤៥ម៉ែត្រ ទទឹង១៥,២០ម៉ែត្រ លាតសន្ធឹងស្របពីលើមហាវិថីសហព័ន្ធរុស្ស៊ីចំណុចកណ្តាលមានកំពស់៥,៥ម៉ែត្រ យកត្រង់ចំណុចប្រសព្វផ្លូវបំបែកជា៤ មហាវិថីសហព័ន្ធរុស្ស៊ី និងផ្លូវលេខ៥៩៨ និងមានកូនដៃស្ពានអាកាសភ្ជាប់មួយទៀត ទំលាក់ទៅតាមមហាវិថីកម្ពុជាក្រោម ដើម្បីរំដោះចរាចរណ៍ ។ ស្ពានអាកាសថ្មីនេះជាស្ពានទ្វេទិសចរាចរណ៍ដែលមាន២កន្លែង សំរាប់រថយន្តទៅមក និងគ្មានចិញ្ចើមសំរាប់ថ្មើរជើងនោះទេ ។ ស្ពានអាកាសទី២នេះវែង ហើយធំជាងស្ពានអាកាសទី១ ក្បាលថ្នល់ ដែលអនុវត្តដោយក្រុមហ៊ុន OCIC ។ ចំណែកប្រាក់ចំណាយសាងសង់គឺបានមកពីការជួលដីកោះពេជ្រ ដូចការសាងសង់ស្ពានទី១ដែរ ៕