ខេត្តរតនគិរី ៖ ប្រជាពលរដ្ឋក្នុងសហគមន៍កែងសាន់ ឃុំសេដា ស្រុកលំផាត់ ឱ្យដឹងថា មានមនុស្សមួយក្រុមប្រមាណ១០នាក់បាននេសាទ ដោយដាក់របាំងធ្នស់សាច់អួនក្រឡាញឹកនៅក្នុងព្រែកអូរនាងដែលជាតំបន់អភិរក្ស(ជំរកសត្វព្រៃ លំផាត់) តាមព្រះរាជក្រឹត្យចុះថ្ងៃទី១ ខែវិច្ឆិកា ឆ្នាំ១៩៩៣ ។ រហូតមកដល់ពេលនេះពុំទាន់មានសមត្ថកិច្ចណាបង្ក្រាបទេ ហើយអ្នកនេសាទខុសច្បាប់ទាំងនោះគ្មានញញើតប្រជាសហគមន៍បន្តិចទេ ដោយសារគេមានលិខិតអនុញ្ញាតពីលោកនាយផ្នែកជលផលស្រែពក និងលោកនាយខណ្ឌរដ្ឋបាលជលផលខេត្តឱ្យនេសាទដោយប្រើអួននេះ ។
ប្រភពព័ត៌មានបញ្ជាក់ថា គេបោះបង្គោលកូនឈើទំហំប៉ុនភ្លៅប្រវែង៧ម៉ែត្រចំនួន១០ដើមចូលទៅក្នុងដីបាតព្រែក ដោយចន្លោះពីបង្គោលមួយទៅបង្គោលមួយប្រមាណ១០ម៉ែត្រ ហើយផ្នែកខាងលើទឹកសន្ធឹងខ្សែកាបទំហំ១២លី កាត់ទទឹងព្រែកពីម្ខាងទៅម្ខាងទៀត ដោយរឹតឱ្យតឹង ។ គេចងក្បាលបង្គោលភ្ជាប់ទៅនឹងខ្សែកាបដើម្បីទប់ចរន្តទឹកហូរ ហើយយកសាច់អួនពាសធ្វើជារបាំងធ្នស់ ។ ពេលទឹកហូរខ្លាំងគេដាក់ដាយ និងពេលទឹកហូរតិចៗគេដាក់យ៉ដែលធ្វើអំពីសាច់អួន មិនខុសពីឡូត៍នេសាទឡើយ ។ ប្រភពព័ត៌មានបន្តទៀតថា ចាប់តាំងពីពេល ធ្វើរបាំងធ្នស់សាច់អួនរហូតដល់ពេលនេះគេចាប់បានត្រីជាច្រើនតោនរួចមកហើយដែលសុទ្ធសឹងជា ត្រីមេពូជក្នុងដងទន្លេស្រែពក ។ បើសកម្មភាពនេះនៅតែបន្តទៀតនោះត្រីមេពូជដែលមានក្នុងទន្លេពិតជាហិនហោចអស់មិនខាន ។ ពួកគាត់ឆ្ងល់ថា មន្ត្រីជំនាញហេតុអ្វីមិនជួយការពារធនធានធម្មជាតិដែលមាននៅក្នុងតំបន់នោះផង? តើថ្នាក់លើបានដឹងដែរឬទេរឿងនេះ?
មន្ត្រីជលផលធ្វើការងារជាមួយគំរោងអង្គការក្រៅរដ្ឋាភិបាលដែលចាំបាច់ត្រូវផ្ញើរបាយកា រណ៍លទ្ធផលការងារប្រចាំខែទៅកាន់ភ្នំពេញនោះត្រូវផ្ញើរបាយការណ៍នោះទៅជូនមន្ត្រី នៅខេត្តស្ទឹងត្រែងពិនិត្យសិន រួចផ្ញើទៅខេត្តរតនគិរីវិញដើម្បីបោះត្រាមុនបញ្ជូនទៅភ្នំពេញ ។ រាល់លិខិតទាំងនោះមុនទៅដល់ភ្នំពេញត្រូវចំណាយពេលរាប់អាទិត្យ ។ ដើម្បីការពារធនធានធម្មជាតិឱ្យបានគង់វង្សសំរាប់កូនចៅជំនាន់ក្រោយ ប្រជាពលរដ្ឋសហគមន៍នេសាទកែងសាន់ ឃុំសេដា សហគមន៍ជ័យឧត្តម ឃុំជ័យឧត្តម ស្រុកលំផាត់ បានសំណូមពរដល់លោកណៅ ធួក ប្រធានរដ្ឋបាលជលផល និងលោកច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទឱ្យចាត់វិធានការទប់ស្កាត់ការបំផ្លាញធនធានធម្មជាតិក្នុងដងទន្លេស្រែពកផង និងចាត់ការតាមច្បាប់ចំពោះមន្ត្រីអសកម្មដែលបានឃុបឃិតគ្នា ។ តាមប្រភពព័ត៌មានថា មន្ត្រីអសកម្មមួយចំនួនកំពុងដាក់ខែរាប់ក្បាលឡានដឹកត្រីចូលខេត្តរតនគិរី គឺរថយន្ត១គ្រឿងត្រូវបង់ចាប់ពី៣០ទៅ៤០ម៉ឺនរៀល ហើយមានរថយន្តជាច្រើនដែលត្រូវបង់លុយឱ្យមន្ត្រីទាំងនោះ ៕
