ខេត្តកំពង់ចាម ៖ លោកស្រីគឹម លុយ ចៅក្រមស៊ើបសួរនៃសាលាដំបូងខេត្ត បានចេញដីកាបង្គាប់ឱ្យឃុំខ្លួនលេខ១១៧៣ ចុះថ្ងៃទី២៣ ធ្នូ ២០១០ ដោយចោទទៅលើឈ្មោះវាំង វេត ភេទប្រុស អាយុ៣២ឆ្នាំ រស់នៅក្នុងឃុំត្រពាំងផ្លុង ស្រុកពញាក្រែក ពីបទប៉ុនប៉ងរំលោភសេពសន្ថវៈលើស្រ្តីម្នាក់អាយុ២១ឆ្នាំ ក្នុងខណៈពេលដែលឪពុកម្តាយរបស់នាងមិននៅផ្ទះ ។ តាមលោកវរសេនីយ៍ត្រី ថូ ឡងឌី នាយរងការិយាល័យប្រឆាំងការជួញដូរមនុស្សនិងការពារអនីតិជននៃស្នងការដ្ឋាននគរបាលខេត្តបានឱ្យដឹងថា កាលពីវេលាម៉ោង១រំលងអធ្រាត្រឈានចូលថ្ងៃទី២១ ធ្នូ បុរសឈ្មោះវេត ដែលមានកូនចំនួន២នាក់ទៅហើយនោះ បានលួចក្រោកចេញពីលើផ្ទះដើរលបៗ ទៅក្រោមផ្ទះរបស់ស្រ្តីខាងលើ ដែលដេកនៅលើគ្រែតែម្នាក់ឯង ដោយមិនឱ្យប្រពន្ធដឹងនោះទេ ដើម្បីប៉ងចាប់រំលោភសេពសន្ថវៈ ។ ប៉ុន្តែភ្លាមៗនោះត្រូវស្រ្តីរងគ្រោះដឹងខ្លួនទាន់ក៏បានស្គាល់ភិនភាគជនសង្ស័យច្បាស់ គឺឈ្មោះវេត បន្ទាប់មកបានទូរស័ព្ទប្តឹងទៅលោកនាយប៉ុស្តិ៍រដ្ឋបាលឃុំត្រពាំង ផ្លុងឱ្យជួយអន្តរាគមន៍ ។ នៅវេលាម៉ោង៥និង៣០នាទីភ្លឺ សមត្ថកិច្ចក៏បានឃាត់ជនសង្ស័យរូបនេះបញ្ជូនមកកាន់អធិការដ្ឋាននគរបាលស្រុកពញាក្រែកដើម្បីសួរនាំ ។
ជនសង្ស័យឈ្មោះវាំង វេត បានឆ្លើយសារភាពថា កាលពីវេលាម៉ោងប្រហែល៧យប់ ថ្ងៃទី២០ធ្នូ រូបគេដេកនៅលើផ្ទះជាមួយប្រពន្ធ បន្ទាប់មកបានក្រោកដើរចេញទៅផ្ទះរបស់ស្ត្រីខាងលើដែលនៅភូមិជាមួយគ្នា ក្នុងបំណងចាប់រំលោភសេពសន្ថវៈ ព្រោះឪពុកម្តាយរបស់នាងមិននៅផ្ទះ ។ ក្នុងពេលនោះគ្រាន់តែចាប់ជើងរបស់នាងបានបន្តិចស្រាប់តែនាងស្រែកជេរនិងមិនបានធើ្វអ្វីបន្តទៀតទេក៏ប្រ ញាប់ដើរមកផ្ទះវិញចូលដេកជាមួយនឹងប្រពន្ធ ក្រោយមកស្រាប់តែត្រូវសមត្ថកិច្ចមកចាប់ខ្លួនដល់ផ្ទះតែម្តង ។ លោកវរសេនីយ៍ត្រី ថូ ឡងឌី បានបញ្ជាក់ថា បុរសកំហូចរូបនេះត្រូវបានចាប់ខ្លួនយោងតាមបណ្តឹងរបស់ស្រ្តីរងគ្រោះ ហើយត្រូវបានលោកស្រីគឹម លុយ ចៅក្រមស៊ើបសួរចេញដីកាឃុំខ្លួន ដោយចោទប្រកាន់ពីបទប៉ុនប៉ងរំលោភសេពសន្ថវៈ៕