រាជធានីភ្នំពេញ ៖ បុរសម្នាក់បានស្លាប់នៅមន្ទីរពេទ្យព្រះកុសុមៈ កាលពីវេលាម៉ោង៣ទៀបភ្លឺថ្ងៃទី២៧ ខែធ្នូ បន្ទាប់ពីជិះម៉ូតូម៉ាកវីវ៉ាពណ៌ខ្មៅ ពាក់ស្លាកលេខបាត់ដំបង 1C-1860 មួយគ្រឿងជួបគ្រោះថ្នាក់ចរាចរណ៍កាលពីវេលាម៉ោង១និង៤៥នាទីរំលងអធ្រាត្រឈានចូលថ្ងៃទី២៧ ខែធ្នូ នៅតាមវិថីកម្ពុជាក្រោម សង្កាត់ទឹកល្អក់ទី១ ខណ្ឌទួលគោក ។ បុរសរូបនោះពុំត្រូវគេស្គាល់អត្តសញ្ញាណទេ មានអាយុប្រមាណជាង៣០ឆ្នាំ ។ តាមប្រភពមន្ត្រីប៉ូលិសខណ្ឌទួលគោកបានឱ្យដឹងថា នៅវេលាម៉ោង១និង៤៥នាទីរំលងអធ្រាត្រថ្ងៃទី២៧ ធ្នូ បុរសរូបនោះបានជិះម៉ូតូម៉ាកវីវ៉ា ពណ៌ខ្មៅ ពាក់ស្លាកលេខបាត់ដំបង 1C-1860 មួយគ្រឿងធ្វើដំណើរតាមមហាវិថីកម្ពុជាក្រោមក្នុងទិសដៅពីកើតទៅលិច។
នៅពេលធ្វើដំណើរមកដល់មុខមន្ទីរពេទ្យពហុព្យាបាលអង្គរធំ ក្នុងសង្កាត់ទឹកល្អក់ទី១ ខណ្ឌទួលគោក ក៏បានជួបគ្រោះថ្នាក់ចរាចរណ៍ប៉ះជាមួយម៉ូតូមួយគ្រឿងទៀតដែលធ្វើដំណើរក្នុងទិសដៅស្រប គ្នា ។ បន្ទាប់ពីជួបគ្រោះថ្នាក់ បុរសរូបនោះត្រូវរថយន្តសង្គ្រោះដឹកបញ្ជូនទៅកាន់មន្ទីរពេទ្យព្រះកុសុមៈ ។ ដោយសារតែរបួសបោកក្បាលធ្ងន់ធ្ងរពេកនៅវេលាម៉ោង៣ទៀបភ្លឺថ្ងៃទី២៧ ធ្នូ បុរសនោះបានស្លាប់តែម្តងទៅ ។ សពត្រូវបានតំកល់នៅមន្ទីរពេទ្យព្រះកុសុមៈ ពុំត្រូវគេស្គាល់អត្តសញ្ញាណនៅឡើយ ។ ព័ត៌មាននេះទុកជាការជូនដំណឹងដល់ក្រុមគ្រួសារដែលបានបាត់សមាជិករបស់ខ្លួន ៕