ខេត្តបាត់ដំបង ៖ ជនមិនស្គាល់មុខម្នាក់បានចូលទៅវាយព្រះគ្រូចៅអធិការវត្ត និងកូនសិស្សរបស់ព្រះអង្គម្នាក់ បណ្តាលឱ្យរបួសធ្ងន់ ក្នុងគ្រាដែលព្រះអង្គ និងកូនសិស្សកំពុងសិង និងដេកនៅក្នុងកុដិ ស្ថិតក្នុងវត្តអម្ពវ័ន ហៅវត្តស្វាយ នៅក្នុងភូមិស្វាយធំ ឃុំអូរដំបង២ ស្រុកសង្កែ កាលពីវេលាម៉ោង១១និង៥០នាទីយប់ថ្ងៃទី៣០ ធ្នូ កន្លងទៅនេះ ។ អំពើដ៏ឃោរឃៅដែលបង្កដោយជនទមិឡ វាយទៅលើព្រះសង្ឃទាំងកំរោលនេះ បានធ្វើឱ្យមានការសន្និដ្ឋានផ្សេងៗគ្នា រវាងសមត្ថកិច្ច និងសាក្សីនៅក្បែរវត្តនោះ ។ សមត្ថកិច្ចបានសន្និដ្ឋានថា ទង្វើរបស់ជនពាលទៅលើព្រះគ្រូចៅអធិការវត្ត និងកូនសិស្សរបស់ព្រះអង្គនេះគឺជារឿងគំនុំ ប៉ុន្តែសាក្សីដែលមានអ្នកភូមិ និងព្រះសង្ឃនៅក្នុងវត្តនោះផងនិយាយថា វាជាករណីប្លន់តែមិនបានសំរេច ដែលទង្វើបែបនេះធ្លាប់មានកន្លងមកទៅលើព្រះសង្ឃ ។ ព្រះគ្រូចៅអធិការដែលរងការវាយដំពីជនអប្រិយនោះព្រះនាមជា ហ៊ឺ ព្រះជន្ម៧១ឆ្នាំ ព្រះអង្គរបួសដៃឆ្វេង និងខ្នង រីឯកូនសិស្សរបស់ព្រះអង្គឈ្មោះទូច នឹក អាយុ១១ឆ្នាំ របួសបែកក្បាលដេរចំនួន៤ថ្នេរ ដោយសារជនពាលប្រើដំបងវាយ ។
តាមការបំភ្លឺពីអ្នកភូមិ និងព្រះសង្ឃនានានៅក្នុងវត្តអម្ពវ័ន ហៅវត្តស្វាយនេះ បានឱ្យដឹងថា នៅក្នុងកុដិរបស់ព្រះគ្រូចៅអធិការនាយប់នោះបានបើកទូរទស្សន៍ ហើយមាននេនៗជាច្រើនទៅមើល ។ ប៉ុន្តែនេនៗទាំងនោះបានចុះទៅអស់ ក្រោយពីចប់រឿងនៅវេលាម៉ោងប្រហែល៩យប់ ហើយក្នុងគ្រានោះមាននេនមួយអង្គគង់នៅក្រោយគេ ។ បើតាមការស្រង់សំដីពីកូនសិស្សដែលរបួសបាននិយាយថា នេនមួយអង្គនោះបានអង្គុយមើលទូរទស្សន៍យូរជាង
គេ ។ លុះនេនអង្គនោះនិមន្តចុះទៅកុដិបានមួយសន្ទុះស្រាប់តែមានរឿងនេះកើតឡើងតែម្តង ខណៈដែលទ្វារកុដិមិនបានដាក់គន្លឹះ ។ កោះសន្តិភាពមិនអាចសុំការបំភ្លឺពីលោកប៊ុត ប៊ុនធឿន អធិការនគរបាលស្រុកសង្កែបានទេនាព្រឹកថ្ងៃទី៣១ ធ្នូ ដោយលោកមិនលើកទូរស័ព្ទ ។
ប៉ុន្តែលោកសឹង ឌៀប នាយនគរបាលប៉ុស្តិ៍អូរដំបង២ បានប្រាប់ថា ករណីខាងលើនេះ វាកើតចេញពីរឿងគំនុំដែលព្រះគ្រូចៅអធិការធ្លាប់មានបញ្ហាកន្លងមកនៅក្នុងវត្តនេះ ។ លោកនាយប៉ុស្តិ៍ប្រាប់ថា ជនល្មើសបានប្រើរំពាត់វាយទៅលើព្រះអង្គ និងកូនសិស្សក្នុងគ្រាដែលព្រះអង្គកំពុងសិងលង់លក់ជាមួយកូនសិស្សហើយព្រះអង្គកំពុងមានអា ពាធទៀតផង ។ ប៉ុន្តែផ្ទុយពីនេះ សាក្សីបាននិយាយថា ជនពាលនេះបានព្យាយាមចូលទៅប្លន់ទ្រព្យរបស់ព្រះអង្គ ហើយដោយសារតែមានការភ្ញាក់ផ្អើលខ្លាំង ហើយនេនៗចេញវាយរគាំងប្រកាសអាសន្នផង ទើបជនពាលរត់បាត់ទៅ ដែលករណីនេះទំនងសមត្ថកិច្ចអាចកំណត់មុខសញ្ញាបានហើយ ៕