ខេត្តបន្ទាយមានជ័យ ៖ កាលពីវេលាម៉ោង២និង២៥នាទីរសៀល ថ្ងៃទី២៥ ធ្នូ នៅលើកំណាត់ផ្លូវជាតិលេខ៥ ខាងត្បូងស្ពានសែសិនចំងាយប្រហែល១០០ម៉ែត្រ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ មានហេតុការណ៍គ្រោះថ្នាក់មួយកើតឡើងដោយគោយន្តកន្ត្រៃសណ្តោងរ៉ឺម៉កបុកកង់រថយន្តផ្នែក ខាងក្រោយ បណ្តាលឱ្យរបួសមនុស្សម្នាក់ធ្ងន់ និងម៉ាស៊ីនគោយន្តដាច់ធ្លាក់លើផ្លូវ ។ មន្ត្រីប៉ូលិសចរាចរខេត្តបានឱ្យដឹងថា អ្នករងរបួសក្នុងឧប្បត្តិហេតុគ្រោះថ្នាក់នេះ ឈ្មោះហាន់ អ៊ាត ភេទប្រុស អាយុ២៣ឆ្នាំ នៅភូមិឃូស្វាយ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ ជាអ្នកបើកបរគោយន្តដែលក្នុងនោះមានមនុស្សជិះចំនួន២៤នាក់ ។
តាមសាក្សីនៅកន្លែងកើតហេតុបានប្រាប់ថា គោយន្តកន្ត្រៃបើកមកពីទិសខាងជើង លុះទៅដល់ចំណុចខាងលើក៏រេដៃចង្កូតទៅខាងឆ្វេងដៃ បណ្តាលឱ្យម៉ាស៊ីនគោយន្តជ្រុលទៅបុកកង់រថយន្តម៉ាកហ៊ីយ៉ាន់ដាយ ពណ៌ស ពាក់ស្លាកលេខបន្ទាយមានជ័យ 3A-0439 ដែលធ្វើដំណើរក្នុងទិសដៅបញ្ច្រាសគ្នា និងបើកបរដោយឈ្មោះសឿ រិទ្ធី ភេទប្រុស អាយុ៣៩ឆ្នាំ នៅភូមិហ្លូង ឃុំឫស្សីក្រោក ស្រុកមង្គលបុរី ។ ក្នុងហេតុការណ៍នេះ បណ្តាលឱ្យអ្នកបើកគោយន្តកន្ត្រៃត្រូវដៃគោយន្តវាត់ខ្ទាតទៅចិញ្ចើមផ្លូវរបួសធ្ងន់ ។
លោកវរសេនីយ៍ទោ ឈឿម សុផុន នាយការិយាល័យចរាចរណ៍បានបន្តឱ្យដឹងដែរថា មូលហេតុគឺមកពីគោយន្តដឹកមនុស្សលើសចំណុះហើយគួបផ្សំនឹងកន្លែងកើតហេតុជាផ្លូវក ោង និងចំណោតផងនោះ ទើបបណ្តាលឱ្យគោយន្តរេដៃចង្កូតទៅបុកកង់រថយន្ត ។ ជនរងគ្រោះត្រូវបានសមត្ថកិច្ចដឹកទៅសង្គ្រោះបន្ទាន់ភ្លាមៗ ចំណែកវត្ថុតាងនាំយកមករក្សាទុកនៅការិយាល័យចរាចរណ៍ ៕