ខេត្តស្ទឹងត្រែង ៖ ក្មេងស្រីរងគ្រោះអាយុទើបតែ៣ឆ្នាំ បានទទួលរងការចាប់រំលោភយ៉ាងឃោរឃៅពីជនល្មោភតណ្ហា កាលពីវេលាម៉ោង៨ និង៣០នាទីយប់ ថ្ងៃទី១៧ ធ្នូ ខណៈដែលឪពុក ម្តាយនាងមិននៅផ្ទះ។ លោកពុត ហូយ អាយុ៣២ឆ្នាំ រស់នៅស្រុកសៀមបូក បានឱ្យដឹងថា កាលពីវេលាម៉ោង៨ និង៣០នាទីយប់ ថ្ងៃទី១៧ ធ្នូ ២០១០ ជនសង្ស័យម្នាក់ឈ្មោះពេជ្រ ប៊ុនសឿន អាយុ២០ឆ្នាំ រស់នៅឃុំកោះស្រឡាយ ស្រុកសៀមបូក បច្ចុប្បន្នមកស្នាក់នៅបណ្តោះអាសន្នផ្ទះបងស្រីរបស់ខ្លួន។ ជននេះបានបបួលឪពុកក្មេងស្រីរងគ្រោះទៅរកសត្វក្នុងព្រៃ។ ពេលនោះឪពុកជនរងគ្រោះក៏បានទៅមុនដោយទុកឱ្យប្រពន្ធ និងកូនតូចពីរនាក់នៅផ្ទះ ម្នាក់អាយុ៣ឆ្នាំ និងម្នាក់ទៀតអាយុជាង១ឆ្នាំ ពេលនោះជនសង្ស័យក៏បានប្រើល្បិចឱ្យស្ត្រីជាម្តាយទៅរកទិញប្រេងបំភ្លឺ ឆក់ឱកាសនោះហើយ ដែលជនសង្ស័យចាប់រំលោភកូនស្រី។
តាមប្រភពឱ្យដឹងថា បុរសជាឪពុកពេលទៅដល់ព្រៃមិនឃើញជនសង្ស័យក៏ត្រឡប់មកផ្ទះវិញ ស្រាប់តែឃើញកូនស្រីរបស់ខ្លួនយំ ហើយឃើញប្រដាប់ភេទរបស់កូនមានស្នាមរបួសទៀតនោះ ទើបដឹងថា ជនសង្ស័យបានចាប់រំលោភកូន។ នៅព្រឹកថ្ងៃទី១៨ ធ្នូ ឪពុកម្តាយក្មេងស្រីរងគ្រោះបានមកដាក់ពាក្យបណ្តឹងនៅអធិការដ្ឋានស្រុកសៀមបូក។ បច្ចុប្បន្នជនសង្ស័យស្ថិតក្នុងការតាមចាប់ខ្លួនពីសមត្ថកិច្ចដើម្បីយកមកផ្តន្ទាទោសតាមផ្ល ូវច្បាប់។ មន្ត្រីការិយាល័យប្រឆាំងការជួញដូរមនុស្ស និងការពារអនីតិជនបានឱ្យដឹងថា ជនសង្ស័យបានរត់គេចខ្លួនបន្ទាប់ពីប្រព្រឹត្តអំពើអមនុស្សធម៌ទៅលើក្មេងស្រីដែលទើបតែមាន អាយុ៣ឆ្នាំ ខណៈដែលឪពុក ម្តាយពុំបាននៅផ្ទះ។ ក្រោយមកឪពុកម្តាយជនរងគ្រោះបានមកដាក់ពាក្យបណ្តឹងនៅអធិការដ្ឋានស្រុក និងបន្តទៅការិយាល័យប្រឆាំងការជួញដូរមនុស្ស និងការពារអនីតិជនខេត្តស្វែងរកការគាំទ្រពី មន្ទីរកិច្ចការនារីផងដែរ៕