ខេត្តកំពង់ស្ពឺ ៖ មកដល់ថ្ងៃទី២៤ ធ្នូ ២០១០ នេះ គឺរយៈពេល២ថ្ងៃហើយ ដែលស្ថាប័នពាក់ព័ន្ធបានបញ្ជូនគ្រឿងចក្រទៅឈូសឆាយផ្លូវចេញពីផ្លូវលំដែលមានស្រាប់ទៅកា ន់កន្លែងឃាតកដំរីអាសំបូរ រស់នៅ ដើម្បីងាយស្រួលក្នុងការដឹកជញ្ជូនវាទៅកាន់សួនសត្វភ្នំតាម៉ៅ ។ មន្ត្រីរដ្ឋបាលព្រៃឈើបានឱ្យដឹងថា ទ្រុងដែកសំរាប់ដាក់អាសំបូរ ធ្វើរួចរាល់អស់ហើយ នៅឡើយតែផ្លូវអាចបើកបរចេញ-ចូលបានប៉ុណ្ណោះ នឹងដឹកវាចេញពីភូមិឋានប្រជារាស្ត្រហើយ ។ ផ្លូវឈូសឆាយទៅកាន់កន្លែងដែលអាសំបូរកាន់កាប់នោះអាចនឹងបើកបរបាននៅថ្ងៃចន្ទ ទី២៧ ធ្នូ ២០១០ ខាងមុខ ហើយអាសំបូរ ក៏អាចនឹងត្រូវដឹកចេញទៅកាន់សួរសត្វភ្នំតាម៉ៅនៅដើមសប្តាហ៍ក្រោយនេះដែរ ។
ប្រធានសួនសត្វភ្នំតាម៉ៅ លោកញឹក រតនៈ ពេជ្រ បានប្រាប់កោះសន្តិភាពតាមទូរស័ព្ទនៅរសៀលថ្ងៃពុធ ទី២២ ធ្នូ ២០១០ ថា មកដល់ពេលនេះឃាតករឈ្មោះអាសំបូរ នៅតែមានចរិតកាចសាហាវដដែល វាមិនទាន់ផ្លាស់ប្តូរពីកោងកាចមកទន់ភ្លន់សុភាពរាបសានៅឡើយទេ បើទោះបីជាមន្ត្រីជំនាញខិតខំអប់រំវាយ៉ាងណាក៏ដោយ ហើយវាកំពុងចុះប្រេងយ៉ាងច្រើន ។ លោកញឹក រតនៈពេជ្រ បន្តថា នៅពេលនេះទ្រុងសំរាប់ដាក់អាសំបូរនោះ បានរៀបចំរួចរាល់ហើយ ហើយគ្រោងនឹងដឹកអាសំបូរ បញ្ជូនទៅសួនសត្វភ្នំតាម៉ៅភ្លាមៗ ដែលយ៉ាងហោចណាស់ក៏ដើមសប្តាហ៍ក្រោយនេះដែរ ។
គួរបញ្ជាក់ថា អាសំបូរ ត្រូវបានក្រុមជំនាញសត្វព្រៃចាប់ដាក់ច្រវាក់ ដើម្បីអប់រំ និងផ្សាំងវាកាលពីថ្ងៃទី១៥ ធ្នូ កន្លងមកនេះ ក្រោយពេលដែលវាបានសំលាប់មនុស្សម្នាក់កាលពីរសៀលថ្ងៃសៅរ៍ ទី៤ ធ្នូ នៅចំណុចជ្រោះបាក់ ស្ថិតក្នុងភូមិមន ឃុំធម្មតាអរ ស្រុកសំរោងទង ខេត្តកំពង់ស្ពឺ និងធ្វើឱ្យប្រជាសហគមន៍មានការភ័យខ្លាចចំពោះវាយ៉ាងខ្លាំង ។ បុរសដែលត្រូវអាសំបូរ ជាន់សំលាប់នោះឈ្មោះសែ ណុល អាយុ៥៤ឆ្នាំ មានទីលំនៅក្នុងភូមិ-ឃុំកន្លែងកើតហេតុខាងលើ ។ ហេតុការណ៍ដ៏កម្រជួបប្រទះ និងគួរឱ្យសោកស្តាយនេះបានកើតឡើង ខណៈពេលជនរងគ្រោះ និងម្ចាស់របស់វាដែលពិការជើងម្ខាង កំពុងស្រាយច្រវាក់ចេញពី.កដំរី ស្រាប់តែដំរីនោះបានបុះជនរងគ្រោះឱ្យដួល រួចជាន់ពីលើរហូតដល់ស្លាប់នៅ នឹងកន្លែង ៕