រាជធានីភ្នំពេញ ៖ វគ្គបំប៉នកាយសម្បទានិងក្បាច់គុនតេក្វាន់ដូជំនាន់ទី១ ដល់កងកំលាំងនគរបាលជាតិនៃនាយកដ្ឋានអង្គរក្ស ត្រូវបានប្រារព្ធពិធីបិទកាលពីព្រឹកថ្ងៃទី២៤ ធ្នូ កន្លងមក បន្ទាប់ពីបានធ្វើការហ្វឹកហាត់អស់រយៈពេល៦ខែ។ លោកឧត្តមសេនីយ៍ត្រី ម៉ក់ សំអុល អនុប្រធាននាយកដ្ឋានអង្គរក្ស និងជាប្រធានគណៈគ្រប់គ្រងការហ្វឹកហាត់បានមានប្រសាសន៍ថា វគ្គបំប៉ននេះបានរៀបចំធ្វើឡើងតាំងពីថ្ងៃទី១៩ ឧសភា មកដែលមានសិក្ខាកាមជាមន្ត្រីប៉ូលិសនៅក្នុងនាយកដ្ឋានអង្គរក្សចូលរួមធ្វើការហ្វ ឹកហាត់ចំនួន៥៣នាក់ (ស្រី៦នាក់) និងបានការជួយឧបត្ថម្ភគាំទ្រពីលោកគ្រូ ឆយ យ៉ុងសុខ គ្រូបង្ហាត់ក្បាច់គុនតេក្វាន់ដូជនជាតិកូរ៉េ ប្រចាំកម្ពុជា។ លោកឧត្តមសេនីយ៍បានបន្តថា គោលបំណងដែលនាំឱ្យមានការហ្វឹតហាត់ក្បាច់គុនតេក្វាន់ដូដល់មន្ត្រីប៉ូលិសនាយកដ្ឋានអ ង្គរក្សនេះ គឺធ្វើយ៉ាងណាដើម្បីឱ្យសិក្ខាកាមទាំងអស់ទទួលបាននូវជំនាញឯកទេសក្បាច់គុនតេក្វាន់ ដូ ព្រមទាំងបទពិសោធន៍ថ្មីៗបន្ថែមទៀត ដើម្បីរួមចំណែកក្នុងការបំពេញភារកិច្ចចំពោះមុខ ធានាបាននូវសន្តិសុខ សុវត្ថិភាពជូនដល់ថ្នាក់ដឹកនាំជាន់ខ្ពស់ជាតិ-អន្តរជាតិ។
ឆ្លៀតក្នុងឱកាសនោះ លោកឧត្តមសេនីយ៍ឯក យូ ស៊ុនឡុង អគ្គស្នងការរងនគរបាលជាតិ បានមានប្រសាសន៍ផ្តាំផ្ញើដល់កងកំលាំងទាំងអស់ បន្ទាប់ពីបានបញ្ចប់វគ្គនេះទៅ ត្រូវយកជំនាញទាំងនេះទៅបំរើជាតិមាតុភូមិ និងថ្នាក់ដឹកនាំហ៊ានធ្វើពលីកម្មគ្រប់បែបយ៉ាងក្នុងបុព្វហេតុបំរើជាតិ ដែលថ្នាក់លើប្រគល់ឱ្យដោយចរិតសកម្មប្រយុទ្ធឥតរួញរា ហើយក៏មិនត្រូវយកចំណេះដឹងទាំងនេះទៅធ្វើអ្វីដែលនាំឱ្យប្រាសចាកពីសីលធម៌ឡើយ និងក៏មិនត្រូវយកទៅសំឡុតគំរាមកំហែងជនស្លូតត្រង់ដែរ។ លោកក៏បានថ្លែងនូវការកោតសរសើរយ៉ាងខ្លាំងចំពោះការខិតខំប្រឹងប្រែងរបស់សិក្ខាកាមទាំង អស់ដែលបានខិតខំហ្វឹកហាត់អស់រយៈពេលជាច្រើនខែមកនេះ ដោយមិនខ្លាចនឿយហត់ឡើយ។ សូមបញ្ជាក់ថា ក្នុងចំណោមសិក្ខាកាមទាំង៥៣នាក់ ទទួលបាននិទ្ទេសល្អប្រសើរចំនួន៤នាក់ និទ្ទេសល្អ៨នាក់ និទ្ទេសល្អបង្គួរ៨នាក់ និទ្ទេសបង្គួរ៧នាក់ និងនិទ្ទេសមធ្យម២៦នាក់៕