ក្រុងប៉ោយប៉ែត ៖ ជនសង្ស័យចែកចាយ និងសេពគ្រឿងញៀនចំនួន៧នាក់ មានប្រុសមានស្រី បានត្រូវប៉ូលិសក្រុងប៉ោយប៉ែត ធ្វើការឃាត់ខ្លួនកាលពីវេលាម៉ោង៨និង៣០នាទីព្រឹក ថ្ងៃទី២០ ធ្នូ ឆ្នាំ២០១០ នៅចំណុចក្បាលកោះ ភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខណៈពួកគេកំពុងធ្វើសកម្មភាពជាក់ស្តែង ។ មន្ត្រីប៉ូលិសនិយាយថា ជនទាំង៧នាក់នេះ រួមមាន ១-ឈ្មោះកែវ ហាក់ ភេទប្រុស អាយុ៥៣ឆ្នាំ ២-ឈ្មោះអឿន យ៉ុន ភេទស្រី អាយុ៥១ឆ្នាំ ៣-ឈ្មោះនាង ផល្លា ហៅម៉ៅ ភេទប្រុស អាយុ៤៧ឆ្នាំ ៤-ឈ្មោះភី សុភ័ណ ភេទប្រុស អាយុ២៩ឆ្នាំ ៥-ឈ្មោះយិន សាវុធ ភេទប្រុស អាយុ៣៩ឆ្នាំ ៦-ឈ្មោះធា ប៉ែត ភេទប្រុស អាយុ២៥ឆ្នាំ និង៧-ឈ្មោះស៊ី ថា ភេទប្រុស អាយុ៥០ឆ្នាំ ។ ពួកគេទាំងអស់គ្នាមានទីលំនៅក្នុងភូមិក្បាលស្ពាន ក្នុងនោះឈ្មោះកែវ ហាក់ និងឈ្មោះអឿន យ៉ុន ជាប្តីប្រពន្ធនឹងគ្នា ហើយក្នុងចំណោម៧នាក់នេះដែរ ឈ្មោះនាង ផល្លា ហៅម៉ៅ និងឈ្មោះអឿន យ៉ុន ជាអ្នកចែកចាយ ។ ជាមួយនឹងការឃាត់ខ្លួនជនទាំង៧នាក់ខាងលើ ប៉ូលិសធ្វើការឹបអូសបានថ្នាំញៀនប្រភេទយ៉ាម៉ា ពណ៌ក្រហម ចំនួន១០គ្រាប់ និងបំពង់ជក់ចំនួន៣ ព្រមទាំងឧបករណ៍សំរាប់ជក់មួយចំនួនទៀត ។ ក្នុងពេលធ្វើការបង្ក្រាបនោះស្ត្រីឈ្មោះអឿន យ៉ុន ដែលជាអ្នកចែកចាយនិងជាម្ចាស់ផ្ទះត្រូវប៉ូលិសឱ្យដឹងថា បានព្យាយាមទំលាក់ថ្នាំញៀនតាមប្រហោងរនាបទៅដី ប៉ុន្តែត្រូវប៉ូលិសឃើញទាន់ ។
លោកអនុសេនីយ៍ឯក អ៊ុំ សុផល អធិការនគរបាលក្រុងឱ្យដឹងថា ដោយអនុវត្តតាមគោលការណ៍ភូមិ ឃុំ មានសុវត្ថិភាពដែលបានដាក់ចេញដោយក្រសួងមហាផ្ទៃ តាមអនុសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងដោយមានការណែនាំចង្អុលបង្ហាញពីលោកឧត្តមសេនីយ៍ស្នងការខេត្ត ក៏ដូចជាលោកអភិបាលក្រុង ទើបលោកបានដាក់កំលាំងចុះស្រាវជ្រាវ រហូតឈានដល់ការចុះបង្ក្រាបនិងឃាត់ខ្លួនជនសង្ស័យទាំង៧នាក់ខាងលើនេះ ។ លោកអធិការប្រាប់ថា ក្រោយការសួរនាំ និងធ្វើកំណត់ហេតុរួច នឹងបញ្ជូនពួកគេទៅស្នងការដ្ឋានខេត្តបន្ទាយមានជ័យ ដើម្បីចាត់ការបន្តតាមនីតិវិធីច្បាប់ ៕