ខេត្តពោធិ៍សាត់ ៖ យុវសិស្សម្នាក់ត្រូវក្រុមក្មេងទំនើងដេញកាប់ឡើងសុសសាច់ ខណៈពេលទៅមើលការប្រគំតន្រ្តីផ្សព្វផ្សាយពាណិជ្ជកម្មស្រាបៀរលីអូនៅស្ថានីយទូរទស្សន៍ជាតិកម្ពុជា ប៉ុស្តិ៍លេខ១០ ពោធិ៍សាត់។ ករណីនេះបានកើតឡើងកាលពីថ្ងៃទី២៣ ធ្នូ ឆ្នាំ២០១០ វេលាម៉ោង៩យប់នៅខាងមុខទីស្នាក់ការសាខាកាកបាទក្រហមកម្ពុជាខេត្ត ខាងលិចជាប់របងស្ថានីយទូរទស្សន៍ ស្ថិតក្នុងភូមិពាលញែក២ សង្កាត់ផ្ទះព្រៃ ក្រុងពោធិ៍សាត់។ លោក ស សន្យា ប្រធានផ្នែកសំណុំរឿងនៃការិយាល័យនគរបាលព្រហ្មទណ្ឌកំរិតធ្ងន់ឱ្យដឹងថា ជនរងគ្រោះឈ្មោះថៃ រ៉ូម៉ា ភេទប្រុស អាយុ១៩ឆ្នាំ មានទីលំនៅភូមិក្របៅជ្រុំ ឃុំបាក់ចិញ្ចៀន ស្រុកភ្នំក្រវាញជាសិស្សរៀនថ្នាក់ទី11p នៃវិទ្យាល័យពោធិ៍សាត់ និងជាកូនលោកនាយប៉ុស្តិ៍បាក់ចិញ្ចៀន។ ជនរងគ្រោះត្រូវក្រុមដៃដល់កាប់ចំនួន១៤កាំបិត គឺត្រូវចំដៃស្ដាំ៥កន្លែង ឆ្អឹងជំនី១កន្លែងធ្លាយដល់សួត ដើមទ្រូង២កន្លែង ខ្នង២កន្លែង ជើងស្ដាំ១កន្លែង ត្រគាក១កន្លែង ក្បាលពីក្រោយ១កន្លែង ដៃឆ្វេង១កន្លែង ព្រមទាំងដាល់មួយដៃចំភ្នែកឡើងខៀវទៀតផង។
នៅមន្ទីរពេទ្យជនរងគ្រោះបានរៀបរាប់ថា នៅយប់ថ្ងៃទី២៣ នោះ ខ្លួននិងមិត្តភក្តិ២នាក់ទៀត បាននាំគ្នាទៅមើលគេប្រគំតន្ត្រីផ្សព្វផ្សាយស្រាបៀរលីអូនៅស្ថានីយទូរទស្សន៍ជាតិកម្ពុជា ប៉ុស្តិ៍លេខ១០ ពោធិ៍សាត់។ កម្មវិធីយប់នោះ គឺមានប្រគំតន្ត្រី ចាប់ឆ្នោត និងតំរៀបតុត្រៀបត្រាលក់ស្រាបៀរលីអូ ស្រាបៀរសិង្ហ។ ចំណែកនៅខាងក្រៅវិញ មានល្បែងគប់ប៉េងប៉ោង បោះកង លក់ផលិតផលនានា និងសំភារហូបចុក ប្រើប្រាស់គ្រប់ប្រភេទ។ ពួកខ្លួនបានចូលទស្សនាមួយសន្ទុះធំ លុះក្រោយមកវេលាម៉ោងប្រហែល៩យប់ ក៏នាំគ្នាចេញមកក្រៅវិញ។ ខណៈពេលកំពុងឈរក្បែររបងស្ថានីយទូរទស្សន៍ខាងមុខឆៀងខាងកើតកាកបាទក្រហមខេត្ត ស្រាប់តែមានក្មេងទំនើងមួយក្រុមមានគ្នា៤-៥នាក់ ម្នាក់កំពុងនិយាយទូរស័ព្ទ ពេលក្រឡេកឃើញពួកខ្លួនភ្លាម ក៏ស្រែកចង្អុលមកថា ពួកវាហ្នឹងហើយ រួចក៏នាំគ្នាសំរុកចូលមកតែម្ដង ដោយមានកាំបិត និងដំបងកាន់នឹងដៃផង។
ឃើញដូច្នេះពួកខ្លួនក៏នាំគ្នារត់ ប៉ុន្តែដោយខ្លួនរត់មិនរួចដួលក្រោយគេ ក៏ត្រូវពួកនោះកាប់ជាច្រើនកាំបិត រួចហើយនាំគ្នារត់បាត់អស់។ ចំពោះក្រុមជនដៃដល់ខ្លួនមិនធ្លាប់ស្គាល់ទេ ប៉ុន្តែមិត្តភក្តិរបស់ខ្លួនដែលដើរជាមួយស្គាល់ម្នាក់ឈ្មោះយក់ វិចិត្រ ភេទប្រុស អាយុ១៩ឆ្នាំ នៅភូមិព្រែកស្ដី សង្កាត់លលកស ក្រុងពោធិ៍សាត់ រៀនថ្នាក់ទី11Q នៃវិទ្យាល័យពោធិ៍សាត់។ លោកវរសេនីយ៍ត្រី ស៊ឹង សុភក្រ័្ត នាយការិយាល័យនគរបាលព្រហ្មទណ្ឌកំរិតធ្ងន់មានប្រសាសន៍ថា តាមចំលើយរបស់ជនរងគ្រោះសមត្ថកិច្ចបានកំណត់មុខសញ្ញាក្រុមដៃដល់អស់ហើយ និងកំពុងស្រាវជ្រាវឈានទៅរកចាប់ខ្លួនយកមកផ្ដន្ទាទោសតាមច្បាប់។ ទោះបីជនរងគ្រោះឆ្លើយថាមិនដឹងមូលហេតុ ប៉ុន្តែពេលដែលចាប់ជនដៃដល់បាន នឹងដឹងរឿងពិតមិនខាន៕