ខេត្តកំពង់ចាម ៖ ក្មេងទំនើងប្រុសស្រីមួយក្រុមមានគ្នា៩នាក់ ជិះម៉ូតូ៣គ្រឿង បានស្ទាក់វាយលើគូបដិបក្សមានគ្នា៤នាក់ជិះម៉ូតូ២គ្រឿង ពេលចេញពីក្លឹបមួយកន្លែង ស្ថិតនៅសង្កាត់សំបួរមាស ក្រុងកំពង់ចាម កាលពីវេលាម៉ោង១២និង១៥នាទីយប់រំលងអធ្រាត្រឈានចូលថ្ងៃទី២៣ ធ្នូ ឆ្នាំ២០១០ ដោយតាមវាយរហូតដល់ផ្លូវជាតិលេខ៧ថ្មី ម្តុំមុខក្រុមហ៊ុនស្រាបៀរអង្គរ ស្ថិតនៅភូមិបឹងស្នាយ សង្កាត់សំបួរមាស ក្រុងកំពង់ចាម ។ ពេលនោះភាគីដែលមានគ្នា៤នាក់បានជិះម៉ូតូរត់គេចខ្លួនរួច២នាក់ ឯ២នាក់ទៀតរត់ចោលម៉ូតូម៉ាកអាយខន ត្រូវបានក្រុមក្មេងទំនើងមានគ្នា៩នាក់នោះយកដុំថ្មវាយកំទេចម៉ូតូ បណ្តាលឱ្យខូចខាតខ្ទេចខ្ទីអស់ ទើបនាំគ្នាជិះគេចខ្លួនទៅវិញបាត់ ក្រោយមកត្រូវសមត្ថកិច្ចតាមស្រាវជ្រាវចាប់បាន២នាក់ ។
ប្រភពពីមន្ត្រីនគរបាលក្រុងកំពង់ចាមបានប្រាប់ថា មុនពេលកើតហេតុ ក្រុមអ្នករងគ្រោះដែលមានគ្នា៤នាក់បានចូលរាំលេងនៅក្លឹបកំសាន្តជិតទន្លេអុំ និងមិនមានបញ្ហាទំនាស់ណាមួយកើតឡើងនោះទេ ដោយរាំលេងសប្បាយជាធម្មតា ។ ប៉ុន្តែពេលដែលពួកគេទាញម៉ូតូជិះត្រឡប់មកផ្ទះវិញ ស្រាប់តែត្រូវក្រុមទំនើងខាងលើជិះម៉ូតូដេញតាមពីក្រោយ ។ ពេលនោះមានម៉ូតូ១គ្រឿងបានជិះមកកៀកនឹងម៉ូតូរបស់ឈ្មោះភក្ត្រ ដែលជាភាគីរងគ្រោះ ហើយឈ្មោះភក្ត្របានសួរពួកនោះថា មានការអី? សួរមិនទាន់ចង់ស្រួលបួលផង ក៏ត្រូវពួកនោះទះ២-៣កំផ្លៀង ធ្វើឱ្យភាគីរងគ្រោះខឹងប្រុងតបតវិញ ប៉ុន្តែពេលក្រឡេកមើលក្រោយឃើញមានម៉ូតូ២គ្រឿងទៀតជិះមក តាមទើបប្រញាប់បន្ថែមល្បឿនជិះរត់គេចចូលទៅផ្លូវវត្តថ្មី ។ ពេលនោះម៉ូតូរបស់ឈ្មោះភក្ត្រ បានជិះរត់គេចចូលទៅបាត់មុន រីឯម៉ូតូរបស់ឈ្មោះសំណាង វិញ ពេលជិះមកដល់មុខផ្ទះប្រជាពលរដ្ឋក្បែរកន្លែងឡនំបុ័ងត្រូវក្រុមនោះតាមទាន់ ក៏មានការប្រវាយប្រតប់គ្នា ដោយ ដឹងថាមិនអាចតតាំងជាមួយពួកនោះបាន ឈ្មោះសំណាង និងមិត្តភក្តិម្នាក់ទៀតបានរត់ចោលម៉ូតូចូលទៅពួនសម្ងំនៅក្នុងព្រៃ ។ ភ្លាមនោះ ក្រុមក្មេងទំនើងបាននាំគ្នាយកដុំថ្មវាយ និងគប់កំទេចម៉ូតូឡើងខ្ទេចខ្ទីអស់ ទើបពួកគេនាំគ្នាជិះរត់គេចខ្លួនអស់ ។ តាមរយៈការស្រាវជ្រាវ ដោយមានការបំភ្លឺពីភាគីរងគ្រោះផង ជនសង្ស័យ២នាក់ ម្នាក់ឈ្មោះជាតិ សោភ័ណ្ឌ ភេទប្រុស អាយុ២៨ឆ្នាំ រស់នៅភូមិរកាលើ សង្កាត់សំបួរមាស ក្រុងកំពង់ចាម និងម្នាក់ទៀតឈ្មោះម៉េន ចាន់ណារ៉េត ភេទប្រុស អាយុ២៤ឆ្នាំ រស់នៅភូមិកោះប៉ែន ឃុំកោះមិត្ត ស្រុកកំពង់សៀម ត្រូវបានហៅមកសួរនាំនៅអធិការដ្ឋានក្រុងកំពង់ចាមក៏ធ្វើការឃាត់ខ្លួនតែម្តង ។
មន្ត្រីនគរបាលបានបញ្ជាក់ថា យោងទៅ តាមបទបញ្ជារបស់លោកវរសេនីយ៍ឯក ជឹម សេងហុង ស្នងការរងនគរបាលខេត្ត សមត្ថកិច្ចបានកសាងសំណុំរឿងបញ្ជូនជនទាំង២នាក់នេះ ទៅកាន់សាលាដំបូងខេត្ត និងសុំដីកាតាមចាប់បក្សពួកមួយចំនួនទៀតយកមកផ្តន្ទាទោសតាមច្បាប់ ។ គួររំលឹកថា នាពេលកន្លងមកនេះក៏មានក្មេងទំនើង១ក្រុមបានជិះម៉ូតូដេញធាក់ម៉ូតូ១គ្រឿងដែលជិះគ្នា៣នាក់ចេញពីត្រង់ចំណ ុចរង្វង់មូលនាគព័ន្ធស្រុកកំពង់សៀម លុះមកដល់ម្តុំធនាគារអេស៊ីលីដា ស្ថិតនៅភូមិទី៦ សង្កាត់វាលវង់ ក្រុងកំពង់ចាម ដោយសារភ័យពេកម៉ូតូជិះឌុបគ្នា៣នាក់នោះបានបុកបង្គោលភ្លើងអគ្គីសនីធ្វើអំពីដែក បណ្តាលឲ្យស្លាប់២នាក់ និងរងរបួសធ្ងន់ម្នាក់ ។ រហូតមកដល់ពេលនេះ ក្រុមក្មេងទំនើងទាំងនោះមិនទាន់ត្រូវបានចាប់ខ្លួននៅឡើយទេ ៕