ខេត្តស្វាយរៀង ៖ ស្រី្តម្នាក់បានយកដុំថ្មទៅគប់ទ្វារធនាគារអេស៊ីលីដាស្វាយរៀង និងស្រែកឡូឡានៅមុខធនាគារ ធ្វើឱ្យផ្អើលមនុស្សម្នាមកចោមរោមមើល ហើយសន្តិសុខយាមធនាគារបានចេញមកឃាត់ និងចាប់សាកសួរតែពុំបានសំរេច ដោយស្ត្រីរូបនេះទាញដុំថ្មវាយប្រហារទៅលើសន្តិសុខវិញ ទើបឈានដល់ទូរស័ព្ទហៅសមត្ថកិច្ចឱ្យមកធ្វើអន្តរាកមន៍ ។ ករណីនេះបានកើតឡើងកាលពីថ្ងៃទី២១ ធ្នូ វេលាម៉ោង៧ព្រឹក ក្នុងភូមិកៀនសាំង សង្កាត់ស្វាយរៀង ក្រុងស្វាយរៀង ។
ស្ត្រីដែលអុកឡុកធនាគារអេស៊ីលីដា ផ្អើលទាំងព្រឹកនេះឈ្មោះប៉ែន សុបិន អាយុ៣១ឆ្នាំ មានទីលំនៅភូមិស្វាយរៀង សង្កាត់ស្វាយរៀង ក្រុងស្វាយរៀង ។ តាមស្ត្រីម្នាក់សុំមិនបញ្ចេញឈ្មោះ និងបានដឹងពីជីវិតរបស់ស្ត្រីរូបនេះ បានប្រាប់កោះសន្តិភាពថា ស្ត្រីរូបនេះមានវិបត្តិមិនខុសពីនាងបដាចារទេ ។ នាងជាកូនកំព្រា មានប្តី និងមានកូនប្រុសម្នាក់ កន្លងមកធ្លាប់រស់នៅយ៉ាងសុខសាន្តដូចអ្នកឯទៀតដែរ តែក្រោយមកស្រាប់តែប្តីលួចចាកចេញចោលទៅប្រទេសអាមេរិក ។ លុះដល់ថ្ងៃឡើងយនុ្តហោះ ទើបនាងដឹងក៏ឡើងរថយន្តទៅតាមប្តី ប៉ុន្តែពេលទៅដល់ព្រលានយន្តហោះពុំបានជួបមុខប្តីជាចុងក្រោយទេ គឺយន្តហោះចាកចេញទៅហើយ នាងបានត្រឹមតែទ្រហោយំសំលឹងតាមមើលយន្តហោះដែលកំពុងហោះឡើងលើលំហមេឃធ្វើឱ្យនាងយំ រហូតសន្លប់បាត់ស្មារតី ហើយត្រូវសាច់ញាតិខាងប្តី នាំត្រឡប់មកផ្ទះវិញ ។
ប្រភពដដែលបានរៀបរាប់ទៀតថា តាំងពីពេលនោះមកនាងក៏ចាប់ផ្តើមលែងនិយាយ អង្គុយស្ងៀមស្ងាត់ តែម្នាក់ឯង លុះបីឆ្នាំក្រោយមកកូនប្រុសនាងអាយុ៥ឆ្នាំ ក៏មានជំងឺ ហើយស្លាប់ចោលទៀត នាងក៏ចាប់ផ្តើមខូចចិត្តខ្លាំងឡើង ។ ពេលខ្លះនាងអង្គុយស្ងៀមស្ងាត់ ពេលខ្លះនាងស្រែកទ្រហោយំ ពេលខ្លះនាងក៏ដើរគប់ផ្ទះគេ ហើយប៉ុន្មានខែចុងក្រោយនេះនាងប៉ែន សុបិន តែងតែដើរចោលផ្ទះ និងត្រូវពួកប្រុសព្រានលួងលោមយកទៅដេករហូតមានផ្ទៃពោះ ក៏ពុំដឹងថាប៉ុន្មានខែទេ ។ ស្រាប់តែនៅព្រឹកថ្ងៃទី ២១ ធ្នូ នាងមានចរិតកាចខុសសព្វមួយដង យកដុំថ្មទៅគប់ចូលក្នុងធនាគារអេស៊ីលីដាស្វាយរៀង រួចស្រែកជេរបញ្ចោរអ្នកធ្វើការនៅក្នុងធនាគារដោយឥតមូលហេតុ លុះពេលសន្តិសុខចាប់ឱ្យចេញក៏កើតការប្រវាយប្រតប់ទៅលើសន្តិសុខយ៉ាងចាស់ដៃ នេះមកពីនាងខូចសរសៃប្រសាទ ។
ពេលប៉ូលិសចាប់យកទៅដល់អធិការដ្ឋានក្រុង សួរនាំទើបដឹងថា នាងសរសៃប្រសាទ ស្អប់អ្នកមាន ដោយចោទថា អ្នកមានបាននាំពង្រត់ប្តីរបស់នាងចេញទៅក្រៅប្រទេស ។ ប្តីប្រពន្ធមិនដែលឈ្លោះប្រកែកគ្នាម្តងណាសោះ ស្រាប់តែលួចរត់ចោលទៅក្រៅប្រទេស ទើបបណ្តាលឱ្យនាងឆ្កួតចិត្ត ។ សមត្ថកិច្ចបានចាប់ឃុំ និងអប់រំនាងឱ្យស្ងប់ចិត្ត និងរកសាច់ញាតិឱ្យមកយកត្រឡប់ទៅផ្ទះវិញ ៕