ខេត្តកណ្តាល ៖ កាលពីរសៀលថ្ងៃទី១៨ ធ្នូ ឆ្នាំ២០១០ អង្គការមូលនិធិអភិវឌ្ឍន៍មុស្លិមកម្ពុជា សហការជាមួយអង្គការសុខុមាលភាពអ៊ិស្លាមម៉ាឡេស៊ី (Perkim) បានប្រារព្ធពិធីសាងសង់វិហារអ៊ិស្លាមនៅភូមិព្រែកតាពៅ ឃុំដើមមៀន ក្រុងតាខ្មៅ ខេត្តកណ្តាល ក្រោមអធិបតីភាពលោកឧកញ៉ា អូស្មាន ហាស្សាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ និងជាទីប្រឹក្សាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានអង្គការមូលនិធិអភិវឌ្ឍន៍មុស្លិមកម្ពុជា និងលោកជំទាវ ។ នៅក្នុងពិធីនោះក៏មានការអញ្ជើញចូលរួមជាគណៈអធិបតីពីលោកឧកញ៉ា សុះ កំរី ចាងហ្វាងនៃគណៈដឹកនាំជាន់ខ្ពស់នៃសាសនាអ៊ិស្លាមកម្ពុជា លោកហ្សាការីយ៉ា អាដាម តំណាងរាស្ត្រមណ្ឌលកណ្តាល-អនុប្រធានអង្គការមូលនិធិអភិវឌ្ឍន៍មុស្លិមកម្ពុជា លោកស្មាន ទៀត តំណាងរាស្រ្តមណ្ឌលពោធិ៍សាត់-អនុប្រធានអង្គការមូលនិធិអភិវឌ្ឍន៍មុស្លិមកម្ពុជា ព្រមទាំងលោក លោកជំទាវ សមាជិករាជរដ្ឋាភិបាល មន្ត្រីមូលដ្ឋាន លោកគ្រូ អ្នកគ្រូ សិស្សានុសិស្ស ហាកិម ទូន និងបងប្អូនប្រជាពលរដ្ឋជាច្រើនកុះករអញ្ជើញចូលរួម ។
ក្រោយពីបានអានរបាយការណ៍ស្វាគមន៍ និងរាយការណ៍ពីស្ថានភាពរបស់ភូមិដោយ លោកហ្សាការីយ៉ា អាដាម រួចមក លោក Tuan Haji Abdul Hanif Bin Harun តំណាងគណៈប្រតិភូអង្គការសុខុមាលភាពអ៊ិស្លាមម៉ាឡេស៊ី បានមានមតិសំណេះសំណាល និងបានសំដែងនូវការសប្បាយរីករាយជាខ្លាំង ដែលគណៈប្រតិភូរបស់លោកបានមកទស្សនកិច្ចនៅប្រទេសកម្ពុជា ជាថ្មីម្តងទៀត ហើយបានមកជួបជុំជាមួយបងប្អូនសិស្សានុសិស្សនៅទីនេះ ក្នុងគោលបំណងដើម្បីសួរសុខទុក្ខ និងពាំនាំយកមកនូវថវិកាចំនួន១០០.០០០ដុល្លារ ដើម្បីជួយឧបត្ថម្ភចូលរួមសាងសង់នូវវិហារអ៊ិស្លាមដ៏ថ្មីមួយនៅទីនេះដែលមានតំលៃជិត១៥០.០ ០ដុល្លារ ។ លោកប្រធានគណៈប្រតិភូក៏បានបញ្ជាក់ផងដែរថា នៅក្នុងដំណើរទស្សនកិច្ចលើកនេះ លោកសូមផ្តល់ថវិកាចំនួន១០.០០០ដុល្លារសិន ដោយឡែកថវិកាដែលនៅសល់ លោកនឹងផ្ញើជាតំណាក់កាលតាមរយៈអង្គការមូលនិធិអភិវឌ្ឍន៍មុស្លិមកម្ពុជា ជាបន្តបន្ទាប់ទៀត ។
លោកឧកញ៉ា អូស្មាន ហាស្សាន់ ប្រធានអង្គការមូលនិធិអភិវឌ្ឋន៍មុស្លិមកម្ពុជា បានថ្លែងអំណរគុណចំពោះលោក Tuan Haji Abdul Hanif Bin Harun ដែលជាតំណាងគណៈប្រតិភូអង្គការសុខុមាលភាពអ៊ិស្លាមម៉ាឡេស៊ី និងក្រុមការងាររបស់លោកដែលបានចំណាយពេលវេលា និងថវិកាមួយចំនួន ដើម្បីជួយសាងសង់វិហារអ៊ិស្លាមនៅទីនេះ ដើម្បីចូលរួមអភិវឌ្ឍន៍សហគមន៍អ៊ិស្លាមនៅកម្ពុជា ។ ទោះបីជាយ៉ាងណាក៏ដោយ ក្នុងនាមយើងជាប្រជាពលរដ្ឋដែលរស់នៅទីនេះ ត្រូវចេះជួយគ្នាឱ្យអស់លទ្ធភាពជាថវិកា ក៏ដូចជាបញ្ចេញនូវកំលាំងកាយ និងកំលាំងចិត្តចូលរួមបដិភាគធ្វើយ៉ាងណាឱ្យវិហារថ្មីរបស់យើងនេះសាងសង់បានសំរេចជាស្ថាព រមួយរយភាគរយ ព្រោះ យើងខ្វះថវិកាប្រមាណជិត៥០.០០០ដុល្លារថែមទៀត ដើម្បីធ្វើការសាងសង់វិហារនេះ ឱ្យរួចរាល់ ។ គណៈប្រតិភូម៉ាឡេស៊ី និងផ្តល់ថវិកា១០.០០០ដុល្លារផងដែរដើម្បីជួយបង្ហើយនូវវិហារភូមិជីរោ ខេត្តកំពង់ចាម ដែលកំពុងសាងសង់ ។
លោកឧកញ៉ា អូស្មាន ហាស្សាន់ បានបញ្ជាក់ឱ្យដឹងបន្ថែមទៀតថា ដើម្បីចូលរួមចំណែកក្នុងការកសាងវិហារអ៊ិស្លាមនៅភូមិព្រែកពៅ ឃុំដើមមៀន ក្រុងតាខ្មៅ ខេត្តកណ្តាល តាមរយៈថ្នាក់ដឹកនាំកំពូលគណបក្សប្រជាជនកម្ពុជាទាំងបី សម្តេចអគ្គមហាធម្មពោធិ៍សាល ជា ស៊ឹម ប្រធានព្រឹទ្ធសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី សម្តេចអគ្គមហាពញាចក្រី ហេង សំរិន ប្រធានរដ្ឋសភា ក៏បានជួយឧបត្ថម្ភនូវថវិកាចំនួន២០.០០០ដុល្លារផងដែរ ដើម្បីចូលរួមចំណែកក្នុងការសាងសង់វិហារអ៊ិស្លាមនៅទីនេះ ៕