រាជធានីភ្នំពេញ ៖ ទោះបីជាច្បាប់ចរាចរណ៍ត្រូវបានរដ្ឋសភាជាតិចេញឱ្យប្រើប្រាស់និងអនុវត្ត ហើយប្រជាជន មន្ត្រីរាជការ នៅទូទាំងប្រទេស ក៏ត្រូវតែគោរពច្បាប់ឱ្យបានត្រឹមត្រូវផងដែរ ។ ប៉ុន្តែសព្វថ្ងៃ ការគោរពច្បាប់ចរាចរណ៍នៅមានកំរិតដូចជា រថយន្តឈ្នួលតូចធំមួយចំនួននៅតែមិនគោរពច្បាប់ចរាចរណ៍ ហើយសមត្ថកិច្ចមួយចំនួន ក៏មិនចាត់វិធានការបានល្អដែរ ដោយសារពួកគេចង់បានលុយពីអ្នកប្រព្រឹត្តខុសច្បាប់ ។ ជាក់ស្តែងកាលពីព្រឹកថ្ងៃទី១៩ ធ្នូ ឆ្នាំ២០១០ រថយន្តធុនធំដឹកអីវ៉ាន់សំពីងសំពោងតាមផ្លូវជាតិលេខ៥ ចេញពីភ្នំពេញ ឆ្ពោះទៅខេត្តកំពង់ឆ្នាំង ដល់ផ្លូវចូលចំណតរថយន្តច្រាំងចំរេះ ក្នុងសង្កាត់ច្រាំងចំរេះទី១ នៅចំណុចគីឡូម៉ែត្រលេខ៩ ខណ្ឌឫស្សីកែវ ក្រុមសមត្ថកិច្ច សន្តិសុខបេនឡាន ចំណតរថយន្តគីឡូម៉ែត្រលេខ៩ នោះ មិនបានឃាត់ឱ្យឈប់ចូលចំណតទេ គឺគ្រាន់តែលូកដៃយកលុយប្រមាណពី១.០០០ទៅ២.០០០រៀលប៉ុណ្ណោះ ។
ពួកគេអនុញ្ញាតឱ្យរថយន្តដែលផ្ទុកលើសចំណុះទាំងនោះធ្វើចរាចរណ៍ទៅបានយ៉ាងរលូន ដោយមិនគិតពីការខូចខាតផ្លូវជាតិដ៏រលោងស្អាត ទើបនឹងស្ថាបនារួចនោះទេ ។ ជាពិសេសការដឹកជញ្ជូនបែបនេះ និងបណ្តាលឱ្យកើតមានគ្រោះថ្នាក់ចរាចរណ៍ទៅលើអ្នកធ្វើចរាចរណ៍តាមដងផ្លូវនានាជាយថាហ េតុ ។ ជាការពិតណាស់កន្លងមក ភាគច្រើនរថយន្តដែលផ្ទុកទំនិញលើសចំណុះ សំពីងសំពោងខ្ពស់ហួសប្រក្រតី ច្រើនតែបង្កគ្រោះថ្នាក់ជាហូរហែ ។ ប៉ុន្តែសន្តិសុខបេនឡាននឹងប៉ូលិសចរាចរបែរជាមិនធ្វើការហាមឃាត់ទេ គឺគេបើកភ្នែកមើលយ៉ាងសប្បាយចិត្តដោយចង់បានលុយពីអ្នកប្រព្រឹត្តិខុសច្បាប់ ដោយមិនគិតពីការខូចខាតផ្លូវជាតិ និងស្ពានដែលរាជរដ្ឋាភិបាលខិតខំប្រឹងប្រែងស្ថាបនាកន្លងមកឡើយ ។ ក្រៅពីនេះ ពួកគេមិនគិតពីសុវត្ថិភាពប្រជាពលរដ្ឋដែលធ្វើចរាចរណ៍នៅតាមដងផ្លូវនោះទេ ។
បច្ចុប្បន្នគេសង្កេតឃើញរថយន្តឈ្នួលគ្រប់ប្រភេទនៅតែផ្ទុកទំនិញលើសចំណុះនឹងដាក់មនុស្សលើ សចំនួន រហូតមានអ្នកខ្លះជិះពីក្រោយ និងអង្គុយលើដំបូលរថយន្តក៏មានដែរ ។ ដូចមានរូបនៅតាមផ្លូវជាតិលេខ៥ ផ្លូវជាតិលេខ២ ផ្លូវជាតិលេខ១ ជាដើម ។ ការធ្វើចរាចរណ៍បែបនេះ កំពុងតែប្រថុយជីវិតដ៏គ្រោះថ្នាក់បំផុតដោយមិនដឹងខ្លួន ដូច្នេះប្រជាពលរដ្ឋគួរតែមានការប្រុងប្រយ័ត្នដោយខ្លួនឯង កុំប្រព្រឹត្តខុសពីច្បាប់ចរាចរណ៍ ទើបយើងជាប្រជាពលរដ្ឋល្អ មិនខាតបង់ទ្រព្យសម្បត្តិ និងអាយុជីវិតខ្លួនឯង យើងទាំងអស់គ្នាត្រូវតែស្វែងយល់ពីច្បាប់ចរាចរ ទើបមានសុវត្ថិភាព ៕