រាជធានីភ្នំពេញ ៖ លោកអនុប្រធានសភាវៀតណាមបានកោតសរសើរចំពោះការរីកចំរើនដ៏ឆាប់រហ័សរបស់ប្រទេសកម្ពុជា ក្នុងរយៈពេល១០ឆ្នាំចុងក្រោយនេះ ហើយថាភាពជោគជ័យរបស់កម្ពុជាក៏ដូចជាជោគជ័យសំរាប់វៀតណាមផងដែរ ។ ការកោតសរសើររបស់លោកអនុប្រធានវៀតណាមង្វៀន ឌឹកកៀន នាពេលនេះ គឺបានធ្វើឡើងនៅក្នុងជំនួបជាមួយសម្តេចអគ្គមហាពញាចក្រីហេង សំរិន នៅឯវិមានរដ្ឋសភាកាលពីព្រឹកថ្ងៃទី២៧ ធ្នូ ២០១០ ។ នេះបើយោងតាមការបញ្ជាក់ប្រាប់តាមទូរស័ព្ទពីសំណាក់លោកគាំ កុសល ជំនួយការផ្ទាល់របស់សម្តេចប្រធានរដ្ឋសភា ហេង សំរិន ។
លោកគាំ កុសល បន្តថា លោកអនុប្រធានវៀតណាមង្វៀន ឌឹកកៀន ធ្លាប់បានមកទស្សនកិច្ចនៅប្រទេសកម្ពុជាម្តងរួចមកហើយ កាលពីឆ្នាំ២០០០ ហើយលោកង្វៀន ឌឹកកៀន បានកោតសរសើរចំពោះការរីកចំរើនរបស់កម្ពុជានៅក្នុងរយៈពេល១០ឆ្នាំចុងក្រោយនេះ ។ នៅក្នុងជំនួបនោះ លោកអនុប្រធានសភាវៀតណាមក៏បានពាំនាំនូវការផ្តាំផ្ញើសួរសុខទុក្ខពីសំណាក់លោកង្វៀនគូ ចុង ប្រធានសភាវៀតណាមផងដែរ ហើយបានវាយតំលៃខ្ពស់ចំពោះភាពរីកចំរើននៃទំនាក់ទំនងរវាងសភានៃប្រទេសទាំង២ តាមរយៈការផ្លាស់ប្តូរដំណើរទស្សនកិច្ចគ្នាទៅវិញទៅមក ៕