ខេត្តស្វាយរៀង ៖ សត្វស្លាបមានកុកក្រក, កុកគ្រោង, ស្លាបត្រពាំង, ខ្វែកច្រាច់, លលក, ក្រួច និងពពេចជាដើម ដែលព្រានបោចរោមរួចជាស្រេច តែពុំទាន់សម្លាប់ ត្រូវបានគេចងព្យួរដាក់លក់ មើលទៅគួរឱ្យខ្លោចផ្សា និងមិនស័ក្តិសមជាប្រទេសកាន់ព្រះពុទ្ធសាសនាឡើយ ។ ជាមួយគ្នានេះ អំបូរសត្វស្លាបទាំងនេះស្ទើរតែបាត់បង់ផុតពូជ ប៉ុន្តែស្ថាប័នមានសមត្ថកិច្ចហាក់ដូចជាពុំអើពើ និងអភិរក្សទេ បែរជាទុកឱ្យពួកព្រានឆ្លុះចាប់យកមកលក់យ៉ាងអនាធិបតេយ្យ នៅតាមចិញ្ចើមផ្លូវជាតិលេខ១ ចំណុចខាងកើតស្ពានទន្លៀងទី២ ស្ថិតក្នុងភូមិស្វាយតឿ សង្កាត់ស្វាយតឿ ក្រុងស្វាយរៀង ។
នៅចំណុចនេះមានតូបចំនួន១០តែងបានព្យួរសត្វស្លាបក្នុងមួយតូបប្រមាណពី៥០ទៅ៦០ ក្បាល សំរាប់ដាក់លក់ និងមានសត្វដែលចៀនឆ្អិនហើយជាច្រើនក្បាលទៀត ។ ទិដ្ឋភាពបែបនេះធ្វើឱ្យមានការព្រួយបារម្ភយ៉ាងខ្លាំងមួយ ទោះបីជាការផ្សាយព័ត៌មាននេះហាក់បានប៉ះពាល់ដល់មុខរបររបស់ប្រជាពលរដ្ឋមួយចំនួន ក្តីក៏ដោយ ក៏ការផ្សាយនេះបានផ្អែកទៅលើប្រយោជន៍សាធារណៈ ពិសេសគឺចង់អភិរក្សសត្វស្លាបទាំងនេះឱ្យគង់វង្ស ។ ទាក់ទិននឹងករណីខាងលើ ស្ត្រីអ្នកលក់សត្វស្លាបម្នាក់បានប្រាប់កោះសន្តិភាពថា តូបលក់សត្វស្លាបទាំងនេះបានលក់ជាច្រើនឆ្នាំមកហើយ ពុំដែលមានស្ថាប័នណាមកហាមឃាត់ទេ ។ ជាទូទៅសត្វស្លាបដែលអ្នកស្រុកចាប់យកមកលក់គឺចំពោះកុកក្រកមួយក្បាលតំលៃ៤.០០០រៀល កុកគ្រោងមួយក្បាលតំលៃ៥.០០០រៀល ស្លាបត្រពាំងមួយក្បាលតំលៃ៣.០០០រៀល លលកមួយក្បាល៧.០០០រៀល ក្រួចមួយក្បាល៤.០០០ក្បាល ក្រសារមួយក្បាល១៥.០០០រៀល ហើយក៏មានចៀនឆ្អិនស្រាប់ និងលក់ទាំងរស់ដែរ ។ ជាងនេះទៀតក៏មានលក់កង្កែបអាំងទាំងស្បែក តាឡនតនមួយក្រាស់៥.០០០រៀល ទឹកត្នោតជូរមួយលីត្រមួយពាន់រៀល និងមានលក់ភេសជ្ជៈគ្រប់មុខផងដែរ ។
ស្ត្រីរូបនេះបន្តទៀតថា អ្នកដំណើរខ្លះទិញ ទៅផ្ទះ អ្នកខ្លះក៏ពិសា «ក្លែម» នៅនឹងតូបតែម្តង ។ ចំពោះសត្វស្លាបទាំងនេះត្រូវព្រានឆ្លុះចាប់នៅពេលយប់តាមព្រៃ ដើមឈើ និងឆ្លុះតាមត្រពាំងទឹក ឬតាមថ្លុកក្នុងស្រែ ។ ព្រានម្នាក់បានប្រាប់កោះសន្តិភាពថា ប៉ុន្មានខែចុងក្រោយនេះសត្វលលកឆ្លុះមិនសូវបានទេ ក្នុងមួយយប់ឆ្លុះបានត្រឹមតែ២ទៅ៣ក្បាលប៉ុណ្ណោះ ឯសត្វពពេចក៏ដូច្នេះដែរ គឺជិតផុតពូជទៅហើយ នៅសំបូរតែសត្វកុកក្រក ចំណែកសត្វស្លាបត្រពាំង សត្វខ្វែក កុកគ្រោង ក្រសារ ខ្វែកច្រាច់ នៅមានតិចតួច និងឈានទៅរកការដាច់ពូជហើយ ពីព្រោះបើគិតជាមធ្យម១០តូបនេះមិនតិចជាង៥០០ក្បាលទេក្នុងមួយថ្ងៃ ។ ចំពោះចាបស្រុកវិញក៏ជិតដាច់ពូជហើយដែរ ៕